I.
Oriolanz en haut solier
sospirant prist a lermoïer
et regrate son dru Helier:
- amis, trop vos font esloignier
de moi felon et losengier.
Deus, tant parvient sa joie lente
a celui cui ele atalente.
II.
Amis, bels douz amis Helier,
qant me membre de l'embracier,
de l'acoler et dou baisier,
dou dolz parlemant senz noisier,
coment me puis vivre lassier!
Deus, tant parvient sa joie lente
[a celui cui ele atalente.]
III.
Amis, je vos fis esloignier
de moi plus que li losengier.
Kant je onques vos fis dangier,
de m'amor vos fis estrangier.
Or en reçoi si dur loïer.
Deus, tant parvient sa joie lente
[a celui cui ele atalente.]
IV.
Amis, la nuit en mon couchier,
en dormant, vos cuit embracier;
et qant g'i fail au resveillier,
nule riens ne m'i puet aidier.
Lors me reprent au sohaidier.
Deus, tant parvient [sa joie lente
a celui cui ele atalente.]
V.
Amis, or voil a deu proïer,
s'il me doit jamais conseillier,
que je vos voie senz targier.
Mais a ceu vient plus d'encombrier,
dont on a plus grant desirrier. -
Deus, tant parvient [sa joie lente
a celui cui ele atalente.]
VI.
Que ke la bele fait sez criz,
Heliers est de cort departiz,
vient chevalchant par un lairiz,
si a les douz plainz entroïz:
durement s'en est resjoïz.
Deus, tant parvient [sa joie lente
a celui cui ele atalente.]
VII.
La bele sosleva son vis,
voit ke c'est Heliers ses amis.
Baisier et acoler l'a pris,
si l'a entre ses beax braz mis,
assez i ot jué et ris.
Dex, tant parvient sa joie lente
[a celui cui ele atalente.]
VIII.
Oriolanz li dist: - amis,
malgré losengeors chaitis,
estes vos or de moi saisiz.
Or parleront a lor devis,
et nos ferons toz noz plaisirs. -
Deus, tant parvient [sa joie lente
a celui cui ele atalente.]
IX.
Ne sai que plus vos en devis.
ensi avengne a toz amis;
et je, qui ceste chanson fis
sor la rive de mer pansis,
comanz a deu bele Aelis.
Deus tant parvient [sa joie lente
a celui cui ele atalente.]