I.
De la joie que desir tant
D'amors, qui m'a a soi tourné,
Ne puis leissier que je ne chant
Puiz que ma dame vient a gré,
En cui j'ai mis cuer et pensé
A trestoute ma vie;
Maiz trop me font anui de lé
Genz, qui Dieus maleïe!
II.
A touz faiz joie sans talent,
Neis ciauz que de mon cuer hé:
Felon, anuieuz, mesdisant,
Dont deable font tel plenté
Que trestoute lor pöesté
Tournent en felenie;
Ançoiz sunt du mal apensé
Que l'amour soit jehie.
III.
Petit puet lor guerre valoir
Quant ma dame voudra amer;
Et s'ele a talent ne voloir
De plus loial ami trover
Qui soit, donc me puis je vanter
Qu'a haute honeur d'amie
Ne porroit nus a moi monter
Pour nule seignourie.
IV.
Se longue atente et bon espoir
Ne me font joie recovrer,
Donc m'ont amours trahi pour voir,
Car touz jours le m'ont fet cuider;
Maiz uns vis m'en doit conforter
Qui mainte ame a trahie,
Et si sai qu'en desesperer
A orgueill et folie.
V.
Bele douce dame, merci
De moi, qui ainc maiz ne fui priz
D'amours! Maiz or m'en est einsi
Qu'a tous amans m'en aatiz.
De cuer vous proi volenteïz
Qu'en vostre compaignie
M'acueilliez, ainz qu'il m'en soit piz
Par felenesse envie.
VI.
Dame, mout ai petit servi
A tel don con je vous ai quis,
Maiz mes cuers m'a vers vous plevi
D'estre li pluz loiauz amis
Del mont, si le serai touz dis,
Qu'amour ai si saisie
Que nus n'en a point, ce m'est vis,
Tant que l'aie [en] partie.
VII.
Odin proi et mant et devis
Que ceste chançon die
A ciaus qu'il savra ententiz
D'amer sanz tricherie.