I.
Tant m'a mené force de seignorage
et une amours qui au cuer me descent,
que je ne, puis pluz celer mon corage,
si chanterai, s'ire nel me desfent;
que cele m'a grevé trop longuement
qui de mon cuer ne prist onques hostage,
puis qu'ele l'ot a son conmandement.
II.
Pechié fera s'ele tient a outrage
ce que je l'aim si amorousement;
qu'en li amer ne criem mort ne damage.
teus est l'amours qui m'alume et esprent:
morir en puis, maiz point ne m'en repent,
quar mon fin cuer li donai d'avantage
quant j'esguardai son cors premierement.
III.
Une des rienz qui plus me tient en ire
si est de ce qu'ele fait bel semblant
vers une gent c'on ne puet trop despire,
felon, sans foi, cruel et mesdisant;
et quant les truis devant li anuiant
lors si ne sai que faire ne que dire;
toz esbahiz m'i oubli en estant.
IV.
De ceste amour, dont je trai tel martire
que devant li me fait dormir veillant,
ne porroit nus, ce cuit, mon mieus eslire,
car autresi mi resveill en dormant.
Lors vient ma joie et vait a son talant;
si angoisseus me truis a l'escondire
qu'a pou mes cuers ne part en souspirant.
V.
Douce dame, onques ne mi seu faindre
de vous amer, einsi l'ai conmencié;
ma volentez en est chascun jour graindre,
ne contre ce n'avez de moi pitié;
qu'Amors le m'a conmandé et proié
que fins amis doit morir u ataindre
ce qu'a tous jours pensé et covoitié.
VI.
Nus ne se doit de loial Amour plaindre
puis qu'il i a son service otroié.
Ce n'a mestier; tant ne mi set destraindre
que ja vers li aie mon cuer irié;
et se li plaist, mout m'a bien essaié;
c'onques ne seu decevoir ne ataindre,
dont maint felon seroient avancié.
VII.
Amis Gillés, lons tans m'a traveillié
ma loiautez qui ne puet pas remaindre;
si cuit qu'Amours vous ait mesconseillié.