I.
Iriez et destroiz et pansis
chanterai amoreusement,
que contre mon cuer l'ai empris;
a pou que je ne m'en repent!
Car qui savroit le grief torment
dont la nuit et le jour me sent
por fine amour veraie,
de voir diroit qu'a son grant tort m'esmaie.
II.
Dex! tant m'avra cist maus sopris,
s'en garrai, si ne sai coment;
et se je muir lëax amis,
c'est garir honoreement;
et s'en vivant ma joie atent,
je l'atendrai mout bonement,
quel que mal que j'en traie.
Bien ait dolor qui si grant joie apaie.
III.
En maintes menieres devis
ma joie, mais trop me vient lent.
Se j'en fusse poësteïz
saichiez qu'il alast autrement,
car quant plus a amer entent
Amors me grieve plus forment,
sanz nul bien que j'en aie
fors seulement qu'esperance m'espaie.
IV.
Onques ma dame ne requis
riens outre son comandement;
car ses genz cors et ses clers vis
et sa granz valours me deffent
que je n'aie fol hardement
de prïer ensi hautement;
ainz atendrai menaie.
Dex, que ferai, se Merciz me delaie!
V.
Mout i ai eüz enemis
faux et cruelx vilainnement;
car plus dout et ferai touz dis
lor ennui qu'autrui hardement,
car plus ainment decevanment.
Li traïtres qui jure et ment
ocist plus tost sanz plaie
que li hardiz qui en valor s'essaie.
VI.
Sire, se ma vie me rent
cele qui m'a mort longuement,
a son oés revivroie.
Cil ne vit pas cui granz ire maistroie.