I.
En dous tans et en bone eure
vueill retraire ma chanson.
Mestiers est qu'or me sekeure
fausse rienz, a cuer felon,
en cui je ai m'atendance.
Guardez com sui en balance
qui en atent guerredon!
II.
Quant de moi est au desseure,
n'i a rienz se merci non;
maiz trop d'assez me demeure,
s'en doi avoir guerison.
S’au daerrain ne m'avance,
donques m'a mort esperance,
en guise de trahison.
III.
N'os pas tout mon pensé dire
celi qui amis je sui;
mais duels m'ocirra et ire
se je l'aim avec autrui.
G'en parol com en faillance,
quar de dure contenance
la trovai, las, quant g'i fui.
IV.
Conseill quier de mon martire,
seigneur, maiz ne sai a cui;
conment puet sa joie eslire
qui par tout voit son anui?
Maiz j'ai apris des m'enfance
une fole acoustumance
d'amer la u je ne dui.
V.
Cil est bien en aventure
qu'Amours a en son pooir;
tous me mis en sa mesure
pour ma greigneur joie avoir;
maiz tant dout ma mescheance,
que je n'ai mie fiance
que rienz me puisse valoir.
VI.
Li anuis qui tant me dure
m'eüst mort au mien espoir;
maiz adés me rasseüre
et fait ma dolour voloir;
quar une douce samblance
me dist sanz aparcevance
un mentir pour decevoir.
VII.
Gasses de sa mesestance
mandet a Odin en France;
pour Dieu qu'il en die voir!