I.
En tous tans ma dame ai chiere;
en yver et en estey
m'est s'amour frache et premiere,
tous seus a sa volentei,
se ne m'an peus traire arriere,
ke trop m'i seus ans bouteis;
mon cuer ait enrasineit,
mais pais n'i voi ma santeit,
e n'ai gaires joie sovant,
mais la grignor del mont atant.
II.
Anui font gent noveliere,
de mort soient acoreit,
ke par lor face prïere
ont ci cest siede atorneyt
c'Amours n'est mais droituriere:
c'est coneüt et proveit
ke cil ke plus ait peneit
en ait plus petit de greit;
trop sont de dous acointemant,
plusors en ait greveit sovant.
III.
Simple et de bone maniere
fui cant g'i mis mon panseir,
or la truis crüele et fiere,
sans pitiet et sans bonteit,
et met çou davant darriere;
li mavais ont tot torneit
et font faillir bonteit,
s'an ai mon cuer aïreit.
Dame ki gueredon ne rans,
a tes cors ne faille a tormant.