I.
Chanter m'estuet ireement.
He las, conment porrai chanter,
quant je ne puis voër souvent
ma douce amie au biau vis cler?
Plus sui pour li en grant torment
que d'estre sanz batel en mer
et sanz nul autre garnement.
II.
Puis que felon m'ont tant grevé
que ne la puis voër souvent,
bien devroit mon fin cuer crever
de la grant doleur que je sent,
et si n'en os fere senblant
pour ces felons maleürez,
dont il est plus que d'autre gent.
III.
Onques d'amors n'oi se mal non
– ha las, conment porrai durer?
ne de ma dame guerredon
fors d'un seul petit regarder.
Las, q'ai je dit? dont n'est ce assez?
Li bons jors li soit hui donez,
qu'en tout le monde n'a sa per.
IV.
Ma dame, s'il ne vous fust griez,
feïssiez moi alegement.
Se vos felon m'i trouvissiez,
feïssiez moi autel senblant
con vos fere mi solïez,
si en seroit mes cuers plus liez
et si en seroit plus joianz.
V.
Onques si tres bele ne vi
n'onques de tel n'oï parler.
Ele a gent cors et cler le vis:
en li se porroit on mirer.
Les euz a vairs el chief assis,
ne hom qui soit de mere nez
ne vit si bele sanz fausser.