I.
A mon vers dirai chansso
ab leus motz ez ab leu so
ez en rima vil’ e plana
(puois aissi son encolpatz
qan fatz avols motz als fatz),
e dirai so q’en cossir —
qui qe·m n’am mais o·m n’azir!
II.
D’amar tornon en tensso
cill on anc Amors non fo
plus q’en mi obra vilana,
e ditz qecs: “Ie·n teing los datz”;
en sai mais que nuills hom natz,
per qe·m platz a devezir
d’aco q’eu a moutz n’aug dir.
III.
E si torn en ochaizo
cel dig qe·m fai plus fello,
no m’o tengatz ad ufana;
car per trops es autrejatz;
c’alz mais aug dir (e no·m platz!)
que dompna se vol aucir
que ric home deign’ auzir.
IV.
Qecs a dreig que se·n razo,
mas vers venz qui be·l despo,
ez ieu dic paraula sana:
que mieills deu esser amatz
rics hom francs ez enseignatz
qui·l pot pro e bel chausir
per dompna q’aus precs soffrir.
V.
Mas dompna c’am’ a lairo,
ab semblan de traizo,
non deu jes esser autana;
mas en bas luoc se solatz
si que sia sos coingatz
e qe·i puosc’ endevenir
la nuoich e·l jorn ses dezir.
VI.
Anc dompna, qui q’en sermo,
per nuill ric home non fo,
ni tornet de pretz, sotana;
ez ieu sai, ez es vertatz:
deu pros cavalliers privatz,
vista tal dompna, ·s delir;
c’om s’en degra sepeillir.
VII.
E dirai en mais? — Ieu no!
Ar en aquesta sazo!
Mas si negus hom si vana
c’ab me se·n contrast’ iratz
adoncs m’auziretz viatz
tals motz per me ses mentir
c’om non poiria cobrir.
VIII.
Dieus retenc lo cel e·l tro
a sos ops ses compaigno,
ez es paraula certana,
c’a mi donz laisset en patz
c’a seignoriu vas totz latz,
qe·l mons totz li deu servir
e sos volers obezir.
IX.
Ja de mort ni de preiso
no·m gart Dieus, ni gaug no·m do
si mi donz, qe·m te ses cana,
no val pro mais c’autr’ assatz,
segon q’eu cre; e sapchatz
que totz hom que la remir
s’enten en lieis al partir.
X.
Dompna, ieu vos dei grazir
so q’ieu sai ben far e dir.
XI.
E si·m datz ab lonc desir
lo ben qe·m degratz offrir.