I.
La douce voiz du louseignol sauvage
qu'oi nuit et jour cointoier et tentir
m'adoucist si le cuer et rassouage
qu'or ai talent que chant pour esbaudir;
bien doi chanter puis qu'il vient a plaisir
cele qui j'ai fait de cuer lige homage;
si doi avoir grant joie en mon corage,
s'ele me veut a son oez retenir.
II.
Onques vers li n'eu faus cuer ne volage,
si m'en devroit pour tant mieuz avenir,
ainz l'aim et serf et aour par usage,
maiz ne li os mon pensé descouvrir,
quar sa biautez me fait tant esbahir
que je ne sai devant li nul language;
nis reguarder n'os son simple visage,
tant en redout mes ieuz a departir.
III.
Tant ai en li ferm assis mon corage
qu'ailleurs ne pens, et Diex m'en lait joïr!
c'onques Tristanz, qui but le beverage,
pluz loiaument n'ama sanz repentir;
quar g'i met tout, cuer et cors et desir,
force et pooir, ne sai se faiz folage;
encor me dout qu'en trestout mon eage
ne puisse assez li et s'amour servir.
IV.
Je ne di pas que je face folage,
nis se pour li me devoie morir,
qu'el mont ne truis tant bele ne si sage,
ne nule rienz n'est tant a mon desir;
mout aim mes ieuz qui me firent choisir;
lors que la vi, li laissai en hostage
mon cuer, qui puiz i a fait lonc estage,
ne ja nul jour ne l'en quier departir.
V.
Chanson, va t'en pour faire mon message
la u je n'os trestourner ne guenchir,
quar tant redout la fole gent ombrage
qui devinent, ainz qu'i1 puist avenir,
les bienz d'amours (Diex les puist maleïr!)
a maint amant ont fait ire et damage;
maiz j'ai de ce mout cruel avantage
qu'il les m'estuet seur mon pois obeïr.