I.
Trop est costumiere Amors
des loiaus amans grever,
et d'aidier les trecheors
ki la servent de giller;
certes, c'est mout grans dolors,
c'on voit faus cuers recovrer,
et ceaus faillir as doçors
ki les sevent achater
par bien amer.
II.
Mais nient plus ke cose painte
aïue a comparison,
ne vaut joie d'amor fainte
celi de service bon,
quant Amors en rent guerredon.
En cuer est Amors estainte
awulé de traïson,
n'il ne set k'Amors est sainte
ne combien valent si don
ne ke vilains set d'esperon.
Non porquant bel font lor plainte
li faus, por çou les croit on:
s'en est engignie mainte
ki estoit de haute renon
par beaus mos, par fause orison.
III.
Dame ou j'ai men<ten>tion
dru sont semé li felon;
neïs en religion
a de la gent Guenelon.
Ki ceaus a a compaignon
boivre i puet male puison;
bontés sans discretion
ne puet pas avoir fuison.
IV.
Dame, sans cui n'a poissance
Amors ke j'aie respas,
n'aiés cure d'acointance
ki ne dure k'un trespas.
Se li faus ont mesestance
torné sont en es le pas,
et se on lor fait pitance
li n'en font el ke lor gas.
Pesés en droite balance
mes biens fais et lor baras,
s'arai vostre bien voellance,
et il ne l'averont pas.
Avoir me font grant dotance
de perdre quanques je fas,
k'a ceste sole caance,
ai mis tot, et haut et bas.
V.
Dame, de moi seul amee,
covoitie de pluisors,
vostre haute renomee
vos fait venir des faus tors.
Tant est plus de vent grevee
com plus est haute la tors;
vens ichi est apellee
parole de trecheors.
VI.
Dame, trop ai dure vie,
jalosie me destruit;
ke, se vo bontés m'aïe,
ke nus grever me puist;
lors me redist jalosie:
n'est pas tot ors quanques luist.
Tele est male ki aïe,
et tele est bone ki nuist.
VII.
Merchi vos pri, biaus cuers dos,
s'ai riens dite encontre vos,
ne doit avoir entre nos
fors deboinaire coros.
Estre me convient jalos:
c'est drois de fin amoros.
Si entirement sui tos
vostres ke n'i ai rescos,
fors ke j'ai por vos chanté
del cuer ke vos ai doné,
cui vos avés tormenté,
n'ainc ne changai volenté
por dolor ne por grieté:
tot ai beü por santé,
ki se cangera en mort
se je n'ai hastiu confort.
Itex novelles vos port
chis chans ke j'apel descort.