I
Ben vuelh que sapchon li pluzor
d'est vers si's de bona color,
qu'ieu ai trag de bon obrador:
qu'ieu port d'ayselh mestier la flor,
et es vertatz,
e puesc ne traire·l vers auctor
quant er lassatz.
II
Ieu conosc ben sen e folhor,
e consoc anta et honor,
et ai ardimen e paor;
e si·m partez un juec d'amor
no suy tan fatz
no·n sapcha tiar lo melhor
d'entre·ls malvatz.
III
Ieu conosc ben selh qui be·m di,
e selh qui·m vol mal atressi,
e conosc ben selhuy qui·m ri,
e si·l pro s'auzaton de mi,
conosc assatz
qu'atressi dey voler lor fi
e lor solatz.
IV
Mas ben aya selh qui·m noyri,
que tan bo mestier m'eschari
que anc a negu non falhi;
qu'ieu sai jogar sobre coyssi
a totz tocatz;
mais en say de nulh mo vezi,
qual que·m vejatz.
V
Dieu en lau e Sanh Jolia:
tant ai apres del juex doussa
que sobre totz n'ai bona ma,
e selh qui cosselh mi querra
non l'er vedatz,
ni us de mi non tornara
descosselahtz.
VI
Qu'ieu ai nom "maistre certa":
ja m'amigu'anueg no m'aura
que no·m vuelh'aver l'endema;
qu'ieu suy d'Aquest mestier, so·m va,
tan ensenhatz
que be·n sai guazanhar mon pa
en totz mercatz.
VII
Pero no m'auzetz tan guabier
qu'ieu non fos rehusatz l'autr'ier,
que jogav'a un joc grossier,
que·m fon trop bos al cap premier
tro fuy 'ntaulatz;
quan gardiey, no m'ac plus mester,
si·m fon camjatz.
VIII
Mas elha·m dis un reprovier:
"Don, vostre dat son menudier,
et ieu revit vos a doblier."
Fis m'ieu: "Qui·m dava Monpeslier,
non er laissatz."
E leviey un pauc son taulier,
ab ams mos bratz.
IX
Et quant l'aix levat lo taulier,
empeis los datz,
e·ill duy foron cairavallier
e·l terz plombatz.
X
E fi·ls fort ferir al taulier,
e fon joguatz.