Testo Careri 1996, p. 396.
| Can lo rossinhol el foillos Dona damor enquier en pren E mou son chan iauzen ioios E remira sa par souen E ill riu son clar eill prat son gen Pel nouel deport que renha Me uai al cor gran ioi iazer. |
I. Can lo rossinhol el foillos dona d'amor e·n quier e·n pren, e mou son chan jauzen joios e remira sa par soven, e ill riu son clar e ill prat son gen, pel novel deport que renha, me vai al cor gran joi jazer. |
| Dunamistat soi enueios Car non sai ioi plus ualen Cor e dezir que bonam fos Sim fazia damor prezen Quel cors a gras dalgat e gen E noia re ques descouenha A samor bona bon saber. |
II. D'un'amistat soi enveios, car non sai joi plus valen, cor e dezir que bona·m fos si·m fazia d'amor prezen: que·l cors a gras, dalgat e gen e no·i a re que·s descovenha; a s'amor bona bon saber. |
| Daquestamor soi tan coitos Que cant ieu uauc ues lieis corren Veiaire mes careir torn eque las nan fugen E mos E mos cauals uai tan len Que greu cug mais quei atenha Sela nos uol aremaner. |
III. D'aquest'amor soi tan coitos que, cant ieu vauc ues lieis corren, vejaire m'es careir torn e que las n'an fugen. E mos cavals vai tan len, que greu cug mais que·i atenha s'ela nos vol aremaner. |
| Daquestamor soi consiros Veillan e pueis somian durmen Car lai ai ioi merueillos Perquieu la iau iauzitz iauzen Mas si beutatz nom ual nien Car nuills amicx de mi non a Com ieu naia bon saber. |
IV. D'aquest'amor soi consiros veillan e pueis somjan durmen: car lai ai joi merveillos, per qu'ieu la jau jauzitz jauzen. Mas si beutatz no·m val nien, car nuills amicx de mi non a com ieu n'aia bon saber. |
| Amor alegres part de uos Per so car uauc mon meills queren E fui en tan auenturos Quenqueras nai mon cor iauzen Mai pero per mon bon guiren Quem uol e mapella em denha Mes ops apartir mon uoler. |
V. Amor, alegres part de vos per so car vauc mon meills queren; e fui en tan aventuros qu'enqueras n'ai mon cor jauzen: mai pero per Mon Bon Guiren, que·m vol e m'apella e·m denha m'es ops a partir mon voler. |
| E qui sai rema deleitos E dieu non sec enbelleen No sai com iamai sia pros Ni com ia uenhaguerimen Quieu sai e cre mon essien Que sel qui ihus ensenha Segura escola pot tener. |
VI. E qui sai rema deleitos e Dieu non sec en Belleen, no sai com jamai sia pros ni com ja venh'a guerimen; qu'ieu sai e cre, mon essien, que sel qui Ihus ensenha segura escola pot tener. |