| Arnautz daniels. En cest sonet coind eleri. Fauc motz ecapuig edoli. Que serant uerai e cert. Qan naurai passat la lima. Qua mors ma deplan edaura. Mon chantar q(ue) de liei mou. Q(ue) pretz manten egouerna. |
Arnautz Daniels. En cest sonet coind e leri Fauc motz e capuig e doli Que serant verai e cert Qan n'aurai passat la lima Qu'amors m'a de plan e daura Mon chantar que de liei mou Que pretz manten e governa. |
| Mil messas naug enproferi. enart lum de cera ...................... |
Mil messas n'aug e.n proferi E n'art lum de cera e d'oli Que dieus m'en don bon issert De lieis on no.m val escrima E qand remir sa crin saura E.l cors q'a graile e nou Mais l'am que qi.m des luserna. |
| Tant l'am de cor e la queri C'ab trop voler cuig la.m toli S'om ren per ben amar pert Lo sieus cors sobretracima Lo mieu tot e non si saura Tant ai de ver fait renou C'obrator n'ai e taverna. |
|
| Tot iorn meillur et esmeri Car la gensor serv e coli Del mon so.us dic en apert Sieus suis del pe tro c'en cima E si tot venta.ill freidura L'amors q'inz del cor me mou Mi ten chaut on plus iverna. |
|
| Ges pel maltraich q'ieu soferi De ben amar no.m destoli Liei anz dic en descovert Car si.m fatz los motz en rima Pieitz trac aman c'om que laura C'anc plus non amet un ou Cel de Moncli N'Audierna. |
|
| Non vuoill de Roma l'emperi Ni c'om mi fassa apostoli Q'en lieis non aia revert Per cui m'art lo cors e.m rima E si.l maltraich no.m restaura Ab un baissar anz d'an nou Mi auci e si enferna. |
|
| Ieu sui Arnautz q'amas l'aura E chatz la lebre ab lo bou E nadi contra suberna. |