| Rubrica | |
| mest(r)e. R(ichart). de semilli. |
Mestre Richart de Semilli |
| I | |
| Chancon ferai plain dire et de pensee. pour cele riens el mont qui plus magree. he las onques nama. de cuer qui li blasma. dex pour quoi escondit ma. el ma lamort donee. douce dame de p(ri)s. qui ie lo tant et pris. si ma u(ost)re amor sorpris plus uous aim q(ue) riens nee. |
Chançon ferai plain d’ire et de pensee pour cele riens el mont qui plus m’agree. Hé las, onques n’ama de cuer qui li blasma. Dex, pour quoi escondit m’a? El m’a la mort donee! Douce dame de pris, qui je lo tant et pris, si m’a vostre amor sorpris, plus vous aim que riens nee. |
| II | |
| La fine amor q(ui) mest el cuer entree. nen puet partir cest dont chose passee. bien uoi tuer me puis. ou noier enun puis. car ia naurai ioie puis qua ma mor refusee. Douce. . |
La fine amor qui m’est el cuer entree n’en puet partir, c’est dont chose passee; bien voi, tüer me puis ou noier en un puis, Car ja n’avrai joie puis qu’a m’amor refusee. Douce [dame de pris, qui je lo tant et pris, si m’a vostre amor sorpris, plus vous aim que riens nee] |
| III | |
| Ele est et bele et blonde et acesmee. plus blanche assez que la flor en la pree. ne sai de son ator. nen chastiau ne entour. nule sen sui autor. de morir sil lig(r)ee. douce. . . |
Ele est et bele et blonde et acesmee, plus blanche assez que la flor en la pree, ne sai de son ator, n’en chastiau, ne en tour; nule s’en sui au tor de morir s’il li gree. Douce [dame de pris, qui je lo tant et pris, si m’a vostre amor sorpris, plus vous aim que riens nee] |
| IV | |
| Douce dame qui iai tant desirree. ou iai tout mis cuer et cors et pensee. iames nul mal neust. ne morir ne deust. qui entre uoz braz geust. iusq(ue)s alainz iornee. Douce. |
Douce dame qui j’ai tant desirree, ou j’ai tout mis cuer, et cors, et pensee, jamés nul mal n’eüst, ne morir, ne deüst qui entre voz braz geüst, jusques a l’ainzjornee. Douce [dame de pris, qui je lo tant et pris, si m’a vostre amor sorpris, plus vous aim que riens nee] |
| V | |
| Cha(n)co(n) que iai par fine amor trouuee. ua deuant luis si seras citolee. ou la tres bele maint. qui ma fet ennui maint. prie li quele maint ou ma ioie est finee. |
Chançon que j’ai par fine amor trouvee, va devant l’uis si seras citolee ou la tres bele maint qui m’a fet ennui maint; prie li qu’ele m’aint, ou ma joie est finee. [Douce dame de pris, qui je lo tant et pris, si m’a vostre amor sorpris, plus vous aim que riens nee] |