| I | |
| Dame cist uostres fins amis. qui tout son cuer a en uos mis. de uos amer est si sorpris. que de nuit et de ior est pris. uos mande que sachiez de uoir. quil uos aime sanz deceuoir. en uos am(er) na pas mespris. |
Dame, cist vostres fins amis, qui tout son cuer a en vos mis - de vos amer est si sorpris que de nuit et de jor est pris -, vos mande que sachiez de voir q’il vos aime sanz decevoir; en vos amer n’a pas mespris. |
| II | |
| Dame quant de uos me souient. une tel ioie au cuer men uient. quamors melace qui me tient. u(ost)re douz regars me soustient. qui soef ma le cuer enble. et souuent me ra il senble. que de uos toute ioie uie(n)t. |
Dame, quant de vos me sovient, une tel joie au cuer m’en vient qu’Amors me lace, qui me tient. Vostre douz regars me soustient, qui soëf m’a le cuer enblé; et souvent me ra il senblé que de vos toute joie vient. |
| III | |
| Amours aiez de moi merci. que mon cuer qui nest mie ci. faites ioiant et pri ez li. que il li soueigne de mi. mais certes uos nen ferois rien. car ie uos aim sur toute rien. porce sel metres en oubli. |
Amours, aiez de moi merci, que mon cuer, qui n’est mie ci, faites joiant, et priez li que il li soveigne de mi. Mais certes vos n’en ferois rien, car je vos aim sur toute rien; por ce sel metres en oubli. |
| IV | |
| Onques nus ne uos ama tant. con ie fas qui toz iors entent. auos seruir ueraie ment. porce sont perdu li amant. que trop lor faites acheter. ce dont il deuroient chanter. dex si faites pechie trop grant. |
Onques nus ne vos ama tant con je fas, qui toz jors entent a vos servir veraiement. Por ce sont perdu li amant, que trop lor faites acheter: ce dont il devroient chanter. Dex si faites pechié trop grant! |
| V | |
| Dame merci merci cent fois. demoi qui sui issi des trois. por uos quor sui cha us or sui frois. or chant or plor or sospir. ie comant a uos mon espoir. ne sai se merci enaurois. |
Dame, merci, merci cent fois, de moi qui sui issi destrois por vos, qu’or sui chaus, or sui frois, or chant, or plor, or sospir. Je comant a vos mon espoir; ne sai se merci en avrois. |