| I | |
| Au tans plain de felonie denuie (et) de traison de tort (et) de mesprison sanz b(ie)n (et) sans cortoisie (et) que entre nos barons fai sons tot le siecle empirier que ie uoi escomenier ceus qui plus offrent reson lor uueil dire une chancon. |
Au tans plain de felonie, d’envie et de traïson, de tort et de mesprison, sanz bien et sans cortoisie, et que entre nos barons faisons tot le siecle empirier, que je voi escomenïer ceus qui plus offrent reson, lor vueil dire une chançon. |
| II | |
| Li roiaumez de surie nos dit (et) crie a haut ton se nos ne nos amendon por dieu que nos ni alons mie ni ferions se mal non. dex aime fin cuer droitu rier se uelt de tel gent aidier cil essau ceront son non (et) (con)querront sa mai son. |
Li roiaumez de Surie nos dit et crie a haut ton, se nos ne nos amendon, por Dieu! Que nos n’i alons mie: n’i ferions se mal non. Dex aime fin cuer droiturier, se velt de tel gent aidier; cil essauceront son non et conquerront sa maison. |
| III | |
| Encor aim mielz toute uoie de morer ou saint pais que aler po ures chaitis la ou ia solas nauroie phelipe en doit paradis conquerre par mesaise auoir que uos ni troue rez ia uoir bon estre ne ieux ne ris q(ue) uos auiez apris. |
Encor aim mielz toute voie demorer ou saint païs que aler povres, chaitis la ou ja solas n’avroie. Phelipe, en doit Paradis conquerre par mesaise avoir, que vos n’i troverez ja, voir, bon estre ne jeux ne ris que vos avïez apris. |
| IV | |
| Amors a coru en proie (et) si men meine tot pris en lostel ce mest auis dont ia issir ne querroie sil estoit a mon deuis dame cui biaute fet oir ia de prison nistrai uis ainz morrai loialz amis. |
Amors a coru en proie et si m’en meine tot pris en l’ostel, ce m’est avis, dont ja issir ne querroie s’il estoit a mon devis. Dame, cui biaute fet oir, ja de prison n’istrai vis, ainz morrai loialz amis. |
| V | |
| Dame moi couuient remaindre de uos ne me quier partir. de uos amer (et) ser uir ne me soi onq(ue)s ior faindre si me uaut bien (un) morir lamor qui mas saut souuent. ades u(ost)re merci aten que bien ne me puet uenir se nest par uostre plaisir. |
Dame, moi couvient remaindre, de vos ne me quier partir. De vos amer et servir ne me soi onques jor faindre, si me vaut bien un morir l’amor qui m’assaut souvent. Adés vostre merci aten, que bien ne me puet venir, se n’est par vostre plaisir. |
| VI | |
| Chancon ua dire lore(n)t quil se gart bien outreement de g(ra)nt folie enuahir q(ue)n li auroit faus ma(n)tir |
Chançon, va dire Lorent qu’il se gart bien outreement de grant folie envahir, qu’en li avroit faus mantir! |