| [...]Ernart de uentadorn si fo de lomozi del castel de uentadorn. hom fo de pau bra generacio. fils dun siruen del castel quera forniers q(ue)scaudaua lo forn a co zer pa. bels homs era e adreitz. e saub be chantar e trobar. e uenc cortes e ensey natz. el uescoms lo sieu seyner de uenta dorn sabeli molt de lui. e de son trobar e de son chantar. e faziali gran honor el uezcoms de uentadorn si aui moyler Ioue e gentil e gaia. e si sabeli den bernart e de soas chansos e se namoret delui. e el dela domna. si quel fes sas chansos e sos uers della delamor quel auia az ella. e de la ualor de lieis. lonc temps duret lur amors. ans quel uezcoms ni lautra gens sen ap(er)ceubes E can lo uezcoms sen ap(er)ceup si se stranhet de lui. e la domna li fes dar comiat an bernart quel se partis es lonhes daquela enco(n)trada et el li sen partit e sen anet ala duguessa de normandia. quera ioue e de gran ualor e sentendia en pretz e en honor e en ben dig de lauzor. e plazion li fort las chansos den bernat e ill uers. e ela lo receup alegramen. grans temps estet. b(ernart). en sa cort e lai fes man tas chansos. e apelaua la. b(ernart). alauzeta p(er) amor dun caualier q(ue) lama ua. e ella apelet lui rai. e un iorn uenc lo caualiers ala duguessa e entret en la cambra la dona q(ue)l ui leua adonc lo pan del mantel e mes li sobral col e laissasi cazer e lieg e .b(ernart). ui tot car. i. donzela de la domna li ac mostrat cubertamen. e p(er) aq(ue)sta razo fes adonc la canso que dis. Quan uei la lauzeta mouer. e no(n) paset puei gran te(m)ps quel rei enric dalgenterra passet enormandia e ui la dug hessa e agradet li tan q(ue) p(er) forsza la pres e menet la en enguelter(r)a car era mort so marit elai la pres amoyler. b(ernart). uiso si trist tan q(ue) p(er) pauc el no(n) mori de dol. e maintenen el si parti de normandia e uenc al cont Ramon. el cont lo receup alegramen e mizell en gran riqueza e demoret li tro quel cont mori. b(ernart). remas dolens e marritz e p(er) quella t(ri)steza. el simis el ordre de dalon e fes peniten ça. e aq(ui) mori. sia coneguda cauza a totz homes auzens q(ue)l coms nebles de uentadorn q(ue) fo filhs daquela meseysza uescontesa que .b(ernart). tant amet. Contet ame be. de sain sire. totz aiso quieu ai fag escriure den. b(ernart). en aquest liure a de las soas chansos. |
[...]ernart de Ventadorn si fo de Lomozi, del castel de Ventadorn. Hom fo de paubra generacio, fils d'un sirven del castel qu'era forniers qu'escaudava lo forn a cozer pa. Bels homs era e adreitz; e saub be chantar e trobar, e venc cortes e enseynatz. E·l vescoms, lo sieu seyner de Ventadorn, s'abeli molt de lui e de son trobar e de son chantar, e fazia li gran honor. E·l vezcoms de Ventadorn si avi moyler iove e gentil e gaia, e si s'abeli d'En Bernart e de soas chansos, e s'enamoret delui e el de la domna, si qu'el fes sas chansos e sos vers d'ella, de l'amor qu'el avia az ella, e de la valor de lieis. Lonc temps duret lur amors ans que·l vezcoms ni l'autra gens s'en aperceubes; e can lo vezcoms s'en aperceup, si s'estranhet de lui; e la domna li fes dar comiat a'N Bernart qu'el se partis e·s lonhes d'aquela encontrada. Et el li s'en partit e s'en anet a la duguessa de Normandia, qu'era iove e de gran valor, e s'entendia en pretz e en honor e en ben dig de lauzor. E plazion li fort las chansos d'En Bernat e·ill vers, e ela lo receup alegramen. Grans temps estet Bernart en sa cort, e lai fes mantas chansos; e apelava la Bernart Alauzeta per amor d'un cavalier qu'el'amava, e ella apelet lui Rai. E un iorn venc lo cavaliers a la duguessa e entret en la cambra. La dona que·l vi, leva adonc lo pan del mantel, e mes li sobr'al col e laissa si cazer e lieg. E Bernart vi tot, car una donzela de la domna li ac mostrat cubertamen. E per aquesta razo fes adonc la canso que dis: Quan vei l'alauzeta mover. E non paset puei gran temps que·l rei Enric d'Algenterra passet e Normandia e vi la dughessa; e agradet li tan que per forsza la pres e menet la en Enguelterra, car era mort so marit; e lai la pres a moyler. Bernart vi so si trist, tan que per pauc el non mori de dol. E maintenen el si parti de Normandia e venc al cont Ramon. E·l cont lo receup alegramen e miz'ell en gran riqueza e demoret li tro que·l cont mori. Bernart remas dolens e marritz, e per quella tristeza el si mis el ordre de dalon e fes penitença, e aqui mori. Sia coneguda cauza a totz homes auzens que·l coms N'Ebles de Ventadorn, que fo filhs d'aquela meseysza vescontesa que Bernart tant amet, contet a me be, de Sain Sire, totz aiso qu'ieu ai fag escriure d'En Bernart en aquest liure a de las soas chansos. |