| Bernart de uentador si fo de lemoisin dun chastel de uentador de paubra generation fils dun siruen E duna fornegeira si con dis Peire dal uergne de lui en son chantar qan dis mal de totz los tro- badors. Lo terz Bernartz de uentador. Qes meindre dun borneil un dorn. En son Paire ac bon siruen qe portaua des arc dal born. E sa dusia les sermen. Mas de qi qel fos fils dieus li det bella persona et auinen e gentil cor. don fo el comensamen gentilessa e cortesia e gen parlar. et auria sotilessa et art de trobar bos motz e gais se de la uescomtessa de uentador Moillier de so seingnor. E dieus li det tant de uentura per son bel captenemen. e per son gai trobar qella li uolc ben outra mesura. qe noi gardet sen. ni gentilessa ni honor. ni ualor. ni blas- me. mas fugi son sen. e seget sa uoluntat si con dis narnautz de meruoil. Consir lo ioi et oblit la foudat. e fuc mon sen. e sec ma uoluntat. qen aissi sauen de fin aman qel sens non a poder contral talan. Et el fo honoratz e presiatz per tota bon gen. E fas chansos honradas gra- sidas. E fo uesuz et ausiz e receubuz mout uoluntiers. E foron li faich grand honor e gran don per los grans barons. e per los grans homes don el anaua en gran arnes. e en gran honor mout duret lor amors longa sason enans qel uescoms sos maritz se aperceubes. E qan sen aperceubut mout fo dolens e tris. E mes la uescomtessa soa moillier en gran tristessa et en gran dolor E fez dar cumiat a Bernat de uentador qel issis de la sua encontrada. et el sen issi. e sen anet en Normandia ala Dukessa qera adonc domna dels normans et era ioues e gaia e de gran ualor e de prez e de gran poder et entendia mout en ho- nor et en prez et ella lo receub con gran Plaiser e con grant honor. e fo mout alegra de la soa uenguda e fetz lo seingnor e maistre de tota la sai cort. Et en aissi con el sen amo- ret de la moillier de so seingnor. enaissi sena- moret de la duchessa et ella de lui lonc temps ac gran ioia della. e gran benanansa entro qella tolc lo rei Enric dangleterra per ma- rit e dangleterra si qel nola ui mai. ni so mesatge don el puois de duol e de tristessa qe ac de lei si se fetz monges en labaia de dalon. Et a qui perseuera tro a la fin. |
Bernart de Ventador si fo de Lemoisin, d'un chastel de Ventador, de paubra generation, fils d'un sirven e d'una fornegeira, si con dis Peire d'Alvergne de lui en son chantar, qan dis mal de totz los trobadors: «Lo terz Bernartz de Ventador / q'es meindre d'un Borneil un dorn; / en son paire ac bon sirven / qe portav'ades arc d'alborn; / e sa mair'escaudava·l forn, / e·l paire dusia l'essermen». Mas de qi q'el fos fils, Dieus li det bella persona et avinen e gentil cor, don fo el comensamen gentilessa e det li sen e saber e cortesia e gen parlar; et auria sotilessa et art de trobar bos motz e gais sons. Et enamoret se de la vescomtessa de Ventador, moillier de so seingnor. E Dieus li det tant de ventura per son bel captenemen e per son gai trobar, q'ella li volc ben outra mesura, qe no·i gardet sen, ni gentilessa, ni honor, ni valor, ni blasme, mas fugi son sen e seget sa voluntat, si con dis N'Arnautz de Meruoil: «Consir lo ioi, et oblit la foudat, / e fuc mon sen, e sec ma voluntat». E si con dis Gui D'Uisel: «q'enaissi s'aven de fin aman / qe·l sens non a poder contra·l talan». Et el fo honoratz e presiatz per tota bon gen, e sas chansos honradas, grasidas. E fo vesuz et ausiz e receubuz mout voluntiers, e foron li faich grand honor e gran don per los grans barons e per los grans homes, don el anava en gran arnes e en gran honor. Mout duret lor amors longa sason enans qe·l vescoms, sos maritz, se aperceubes. E qan s'en aperceubut, mout fo dolens e tris; e mes la vescomtessa, soa moillier, en gran tristessa et en gran dolor; e fez dar cumiat a Bernat de Ventador q'el issis de la sua encontrada. Et el s'en issi e s'en anet en Normandia, a la Dukessa q'era adonc domna dels normans, et era ioves e gaia e de gran valor e de prez e de gran poder, et entendia mout en honor et en prez. Et ella lo receub con gran plaiser e con grant honor, e fo mout alegra de la soa venguda, e fetz lo seingnor e maistre de tota la sai cort. Et enaissi con el s'enamoret de la moillier de so seingnor, enaissi s'enamoret de la duchessa et ella de lui. Lonc temps ac gran ioia d'ella, e gran benanansa, entro q'ella tolc lo rei Enric d'Angleterra per marit e la·n mena outra lo braç del mar d'Angleterra, si q'el no la vi mai, ni so mesatge. Don el, puois de duol e de tristessa qe ac de lei, si se fetz monges en l'abaia de Dalon, et aqui persevera tro a la fin. |