| I | |
| Tuit mi desir et tuit mi grief torment; uiennent de la ou sont tuit mi pense. g(ra)nt poor ai pour ce que toute gent qui ont ueu son gent cors a cors cesme. mont si sorpris de bone uolente. nes dex laime gel sai a escient; grant mer ueille est quant il en suesfre tant. |
Tuit mi desir et tuit mi grief torment viennent de la ou sont tuit mi pensé. Grant poor ai, pour ce que toute gent qui ont veü son gent cors a cors cesmé m’ont si sorpris de bone volenté. Nés Dex l’aime, gel sai a escïent; grant merveille est, quant il en suesfre tant. |
| II | |
| Touz esbahis mo bli en merueilla(n)t; ou dex trouua si estrange biaute. quant il la mist ca ius entre lagent; mult nous enfist grant de bounerete. car tout le mont en a enlumine. de sa ualor sont tuit li bien si grant; nus ne lauoit qui nen die autretant. |
Touz esbahis m’obli en merveillant ou Dex trouva si estrange biauté; quant il la mist ça jus entre la gent, mult nous en fist grant debounereté. Car tout le mont en a enluminé, de sa valor sont tuit li bien si grant; nus ne la voit qui n’en die autretant. |
| III | |
| Souuiengne uous dame du douz acueil; que ie ai fet par si grant de sirrier. que norent pas tant de pouoir mi oeil; que ie u(er)s uous les osasse lancier. de ma bouche ne uos o sai prier. ne poi dire dame ce que ie uueil; tant sui coarz las chetis or men dueil. |
Souviengne vous, dame, du douz acueil que je ai fet par si grant desirrier, que n’orent pas tant de povoir mi oeil que je vers vous les osasse lancier; de ma bouche ne vos osai prïer, ne poi dire, dame, ce que je vueil; tant sui coarz, las, chetis! Or m’en dueil. |
| IV | |
| Bone auenture auiengne fol espoir; qui les amanz fet uiure et resioir. desperance fet languir et do loir; et mes fox cuers pense ades aguerir. sil fust sages il me feist morir. pour ce fet bon de la folie auoir; quen t(ro)p grant sens puet il bien mes cheoir. |
Bone aventure aviengne fol espoir, qui les amanz fet vivre et resjoïr! Desperance fet languir et doloir, et mes fox cuers pense adés a guerir; s’il fust sages, il me feïst morir. Pour ce fet bon de la folie avoir, qu’en trop grant sens puet il bien mescheoir. |