| I | |
| De grant trauail et de pe tit esploit; uoi le siecle chargie et enconbre. que tant sont mes plain de maleurte. que nus ne pense afere ce qil doit. ainz a uons si le deable trousse. qua li seruir chascuns pense et essaie et dex quiot pour nos la cruel plaie. auons mes tuit arriere dos boute. mult est hardiz qui pour mort ne sesmaie. |
De grant travail et de petit esploit voi le siecle chargié et enconbré, que tant sont mes plain de maleürté que nus ne pense a fere ce q’il doit; ainz avons si le Deable troussé qu’a li servir chascuns pense et essaie; et Dex, qui ot pour nos la cruël plaie, avons mes tuit arriere dos bouté: mult est hardiz qui pour mort ne s’esmaie. |
| II | |
| Dex qui tout set et tout puet et tout uoit; nos auroit tost un entre (deus) gete. se la dame ]p[ plaine de grant bonte. qui est lez lui pour nous ne li prioit. si tres douz moz plesanz (et) sauo re. le grant coroz du haut seig neur rapaie. mult par est fox qui autre amor essaie. quen ces tui na barat ne faussete. ne es autres ne merci ne manaie. |
Dex, qui tout set et tout puet et tout voit, nos avroit tost un entre deus geté, se la dame, plaine de grant bonté, qui est lez lui, pour nous ne li prioit. Si tres douz moz plesanz et savoré le grant coroz du haut Seigneur rapaie. Mult par est fox qui autre amor essaie, qu’en cestui n’a barat ne fausseté. Ne es autres ne merci ne manaie. |
| III | |
| La soriz qiert por son cors ga rantir; contre liuer la noiz et le forment. et nous chetis nalo(n)s mes riens querant. quant nos morrons ou nos puissons gue rir. nous ne cherchons fors q(e)n fer. le pullant. ore esgardez qu ne beste sauuage. poruoit de loing encontre son damage. et nous nauons ne sens ne escie(n)t il mest auis que plain sommes de rage. |
La soriz qiert, por son cors garantir contre l’iver, la noiz et le forment, et nous, chetis! N’alons més riens querant, quant nos morrons, ou nos puissons guerir; nous ne cherchons fors q’Enfer le pullant. Ore esgardez q’une beste sauvage porvoit de loing encontre son damage, et nous n’avons ne sens ne escïent; il m’est avis que plain sommes de rage. |
| IV | |
| Li deable ont gete pour nous rauir; (quatre) aimecons aoschiez de torment. couuoitise lance premierement. et puis or gueil pour sa grant rois emplir. luxure ua le batel trainant. felo nie les gouuerne et les nage ensi peschent et uiennent au riuage. dont dex nos gart par son conmandement. en qui sai(n)z fonz nous feismes honmage. |
Li Deable ont geté pour nous ravir quatre aimeçons aoschiez de torment: couvoitise lance premierement et puis orgueil pour sa grant rois emplir; luxure va le batel traïnant, felonie les gouverne et les nage; ensi peschent et viennent au rivage, dont Dex nos gart par son conmandement, en qui sainz fonz nous feïsmes honmage! |
| V | |
| Les preudonmes doit on tenir mult chiers; la ou il sont et seruir et amer. mes apaines en puet on nus trouuer. car il sont mes si com li faus de niers. que on ne puet entre buchet uerser. ainz le gete on sanz coing et sanz balance. tors et pechiez en eus fine et uen iance. |
Les preudonmes doit on tenir mult chiers la ou il sont et servir et amer, més a paines en puet on nus trouver, car il sont mes si com li faus deniers que on ne puet en trebuchet verser, ainz le gete on sanz coing et sanz balance; tors et pechiez en eus fine et venjance. |