| B. d(e) ue(n)tador(n). | B. de Ventadorn. |
| I | I |
| Lo dos tems de pascor. ab la dossa uerdor. nos adutz fuelhe flor. de diuersa color. per que tug lamador. son gai e chantador. mais ieu que planh e plor cui ioi noma sabor. |
Lo dos tems de pascor ab la dossa verdor nos adutz fuelh’e flor de diversa color, per que tug l’amador son gai e chantador mais ieu, que planh e plor, cui ioi no m’a sabor. |
| II | II |
| A totz me clam senhors. de mi do(n)s e damors. aq(ue)st duy tra- idor. car me fiaue(n) lor. mi fan uieure a dolor. p(er) be(n) e p(er) honor. cai fait ala ge(n)sor. q(ue) nom ual nim secors. |
A totz me clam, senhors, de midons e d’amors. Aquest duy traidor, car me fiav’en lor, mi fan vieure a dolor per ben e per honor c’ai fait a la gensor, que no·m val ni·m secors. |
| III | III |
| Las ieu mu- ere q(ue) ual car no uei. a iornal mo(n) fin ioi natural. el lieg al fe- nestral. blanc e frescatrestal. com par neus a nadal. si camdui p(er) cabal. murirem a egal. |
Las! Ieu muer’e que val? Car no vei a iornal mon fin ioi natural el lieg, al fenestral blanc e fresc atrestal com par neus a Nadal, si c’amdui per cabal murirem a egal. |
| IV | IV |
| No uis drut tan lial que pietz aia sal q(ui)eu port amor coral. a lieis de mi noil cal. ena(n)s di q(ue) p(er) als nom aira mortal. e sim p(er) som fay mal peccat fai crimi- nal. |
No vis drut tan lial que pietz aia sal, qu’ieu port amor coral, a lieis de mi no·il cal. Enans di que per als no m’a ira mortal; e si·m per so·m fay mal, peccat fai criminal. |
| V | V |
| Pus fom amdui efan. lai amada e la blan. el uay mamor dobla(n). a cascun ior(n) de lan. e si nostrai ]or[ e(n) amor. el bel semblan. pus er uuelh e deman que maia bon talan. |
Pus fom amdui efan, l’ai amada e la blan; e·l vay m’amor doblan a cascun iorn de l’an. e si no·s trai en amor e·l bel semblan, pus er vuelh e deman que m’aia bon talan. |
| VI | VI |
| Pe- ne dolor e dan nai auut. e nay gran mals suffers o aitan. no mo tenc ad afan. ca(n)c hom no ui aman mielhs ames ses e(n)ian q(ui)eu no(m)z uau cambian. si com las donas fan. |
Pen’e dolor e dan n’ai avut e n’ay gran; mals suffers o ai tan, no m’o tenc ad afan; c’anc hom no vi aman, mielhs ames ses enian, qu’ieu no·mz vau cambian si com las donas fan. |
| VII | VII |
| Be foruei mai sazos. bela dona e pros. quem fos datz gazardos. dun du(n) iazer arescos. car no soi e(n)ueios. e ia p(er) als no fos ual dau- tres dos. cant p(er) forsa es datz dos. |
Be for’ueimai sazos, bela dona e pros, que·m fos datz gazardos d’un d’un iazer a rescos, car no soi enveios (e ia per als no fos) val d’autres dos, cant per forsa es datz dos. |
| VIII | VIII |
| Can uei uostra faisos el ient cors amoros. bem merauilh de uos. com es de brau respos. car be(n) es trassios. cant hom esefenh bos. e pueis es er- gulhos. lais o(n) es pod(er)os. |
Can vei vostra faisos e·l ient cors amoros, be·m meravilh de vos com es de brau respos, car ben es trassios, cant home se fenh bos e pueis es ergulhos lais on es poderos. |
| IX | IX |
| Bel uezer si no fos. mos enans totz e(n) uos. ieu laisera chansos. p(er) mal dels e(n)ueios. |
Bel Vezer, si no fos mos enans totz en vos, ieu laisera chansos per mal dels enveios. |