| Bernardus. | Bernardus. |
| I | I |
| Pos mi preiaç segnor Qeu chant eu chanterai. E q(a)nt cuit cantar plor. Cora qeu oessai Greu ueres chantador Ben chant qant mal li uai. Uai mi donc mal damor Ainç miels qe no(n) fe mai. E do(n)cs p(er) que mes mai. |
Pos mi preiaç, segnor, q’eu chant, eu chanterai: e qant cuit cantar, plor, cora q’eu o essai. Greu veres chantador, ben chant, qant mal li vai. Vai mi donc mal d’amor? Ainç miels qe non fe mai! E doncs, per que m’esmai? |
| II | II |
| Grant ben (et)gra(n)t honor Conosc qades mi fai Qeu am la belesor Et il mi ben osai. Et eu sui sai aillor E no sai com lestai. Ço mauci de dolor Car occason no(n) ai. De suuent uenir lai. |
Grant ben et grant honor conosc q’ades mi fai, q’eu am la belesor et il mi, ben o sai. Et eu sui sai, aillor, e no sai com l’estai! Ço m’auci de dolor, car occason non ai de suvent venir lai. |
| III | III |
| Mais p(er)o tant mi plai Qant deli mi souen Qem qim crida nim brai Eu no(n) au nulla re. Tan dolçame(n)t mi trai. La bellal cor dese. Qe tal diç qeu sui çai. Qel se cuya el so cre. Ges des oils nu(m) ue. |
Mais pero tant mi plai qant de li mi soven, qe·m qi·m crida ni·m brai, eu no·n au nulla re. Tan dolçament mi trai la bella·l cor de se, qe tal diç q’eu sui çai, qe·l se cuya e·l so cre, ges des oils nu·m ve. |
| IV | IV |
| Amor eu qeu farai Seu ia garrai abte. Cades cre qen morrai Del desirer qem ue. Sel bela lai on gai Non mallegra lonc se. Qeu la braç ellabai. Elam tegna lonc me. Lo seo cors fresc (et)le. |
Amor, eu q’eu farai? S’eu ia garrai ab te? C’ades cre q’e·n morrai del desirer qe·m ve, se·l bela lai on gai non m’allegra lonc se, q’eu l’abraç e lla bai, ela·m tegna lonc me lo seo cors fresc et le. |
| V | V |
| Bela do(m)na merce Del uostro fin aman. Qeus am p(er) bona fe. Qanc re non ame tan. Mans iontas ab cor clui Mius rent emius coman. Ese loc ses de ue Faç me un bel semblan Qe mult nai gran talan. |
Bela domna, merce del vostro fin aman! Qe·us am per bona fe q’anc re non ame tan. Mans iontas ab cor clui, mi·us rent e mi·us coman; e se loc s’esdeve, faç me un bel semblan, qe mult n’ai gran talan! |
| VI | VI |
| Ges do(m)na no recre. P(er) mal ni p(er) affan. Ainç qan deu mi fa ben Nol refug nil soian. Eqant ioi no men ue Sai gent soffrir mon dan. Ca la cor sa coue. Com se ane lognan. Per miel saillir enan. |
Ges, domna, no recre per mal ni per affan; ainç qan Deu m’i fa ben, no·l refug ni·l soian; e qant ioi no m’en ve, sai gent soffrir mon dan, c’a la cor sa cove c’om se ane lognan per miel saillir enan. |