| B. de ue(n)tedor(n) | B. de Ventedorn |
| I | I |
| PUs mi preiatz senhor quieu chant ieu chantarai. e quan cug chantar plor. quora quieu men assai. greu ueiretz chantador. ben chan pus mal li uai. ua mi ben donc damor mout miels quanc no fetz mai. e doncs per que mesmai. |
Pus mi preiatz, senhor, qu’ieu chant, ieu chantarai; e quan cug chantar, plor qu’ora qu’ieu me·n assai, greu veiretz chantador, ben chan, pus mal li vai. Va mi ben donc d’amor? Mout miels qu’anc no fetz mai! E doncs, per que m’esmai? |
| II | II |
| Gran ben e gran honor. conosc que dieus me fai. quieu am la belazor. (et) elha me so sai. mas ieu sui sai alhor. e no sai cum sestai. so mauci de dolor. quar ochaizon non ai. de souen a nar lai. |
Gran ben e gran honor conosc que Dieus me fai, qu’ieu am la belazor et elha me, so sai. Mas ieu sui sai alhor, e no sai cum s’estai! So m’auci de dolor, quar ochaizon non ai de soven anar lai. |
| III | III |
| Mas pero tan mi plai. quan de lieys me soue. cui que cride ni brai. eu non aug nulha re. tan dousamen matrai. la bellal cor a se. que tals ditz q(ui)eu sui sai. e so cui e so cre. ges de sos huelh(s) nom ue. |
Mas pero tan mi plai quan de lieys me sove, cui que cride ni brai, eu no·n aug nulha re. Tan dousamen m’atrai la bella·l cor a se, que tals ditz qu’ieu sui sai, e so cui e so cre, ges de sos huelhs no·m ve. |
| IV | IV |
| Amors e que farai. guerrai ieu ia ab te. tamal ai don morrai. del dezirier quem ue. sil belha lai on iai. nom a- cuelh pres de se. q(ui)eu lembratz e la bay. el estrenha uas me. so(n) belh cors gras e le. |
Amors, e que farai? Guerrai ieu ia ab te? Ta mal ai don morrai del dezirier que·m ve, si·l belha lai on iai no·m acuelh pres de se, qu’ieu l’embratz e la bay e l’estrenha vas me son belh cors gras e le. |
| V | V |
| Ges damor nom recre. p(er) mal ni per afan. e quan dieus mi fai be. non refus ni soan. e quant alre maue. ben sai suffrir lafan. qua lo saui coue. ques ane alu nhan. per miels falhir enan. |
Ges d’amor no·m recre per mal ni per afan; e quan Dieus m’i fai be, non refus ni soan; e quant al re m’ave, ben sai suffrir l’afan, qua lo savi cove que s'ane alunhan per miels falhir enan. |
| VI | VI |
| Bona dona merce del uostre fin a man. q(ui)eus am per bona fe. qua(n)c res non amei tan. mas iuntas ab cap cli. uos mautrei em coma(n). e sen loc sesdeue fassat me bel se(m)- blan. que mout nai gran talan. |
Bona dona, merce del vostre fin aman! Qu’ie·us am per bona fe qu’anc res non amei tan. Mas iuntas, ab cap cli, vos m’autrei e·m coman; e s’en loc s’esdeve, fassat me bel semblan, que mout n’ai gran talan! |
| VII | VII |
| Mon escudier e me. auem cor e talan. quamdui anem truan. |
Mon Escudier e me avem cor e talan. qu’amdui anem truan. |
| VIII | VIII |
| Et ilh amen ab se. so que plus li atan. (et) ieu mon aziman. |
Et ilh a men ab se so que plus li atan, et ieu Mon Aziman! |