| Bernard | Bernard |
| I | I |
| NOn es merueilla se chan Meillz de nul autre chantador Car plus me trail cor ad amor E meillz soi faiz al seu coman Cors e cor e saber e sen Et forz e poder iai mes Sim tira uas amor lo fres Qe ues autr afar no(m) aten |
Non es merveilla se chan meillz de nul autre chantador, car plus me tra·il cor ad amor e meillz soi faiz al seu coman. Cors e cor e saber e sen et forz’e poder i ai mes; si·m tira vas amor lo fres qe ves autr’afar no·m aten. |
| II | II |
| Ben es morz qi damor no(n) sen Al cor qalqe dolce sabor Et qe ual uiure senz ualor Mas p(er) enoi far ala gen. Ia damedeu nom air tan Qeu ia pois uiua ior ni mes Puis ia de noi serai mespres Et damor naurai talan |
Ben es morz qi d’amor non sen al cor qalqe dolce sabor; et qe val viure senz valor mas per enoi far a la gen? Ia Damedeu no·m air tan q’eu ia pois viva ior ni mes, puis ia d’enoi serai mespres et d’amor n’aurai talan. |
| III | III |
| Ben uolgra fosen trian Entrels fals li fin amador Qe lausengiers e trizador Portes un corn el fron denan Tot lor del mon e tot largen I uolgrauer dat seu lagues Sol qe mado(m)pna conogues Tan ben com eu lam finamen |
Ben volgra fosen trian entrels fals li fin amador, qe lausengiers e trizador portes un corn el fron denan! Tot l’or del mon e tot l’argen i volgr’aver dat, s’eu l’agues, sol qe ma dompna conogues tan ben com eu l’am finamen. |
| IV | IV |
| Qant eu la uei ben mes paruen Als oils al uis e al cor Qe issame(n)t trenbli de paor Com fai la foilla contral uen No ai de sen p(er) un enfan Aissi soi damor antrepres Et dome qes aissi conqes Po do(m)npna auer almosna gran |
Qant eu la vei, ben m’es parben als oils, al vis e al cor, q’eissament trenbli de paor com fai la foilla contra·l ven. No ai de sen per un enfan, aissi soi d’amor antrepres; et d’ome q’es aissi conqes, po domnpna aver almosna gran. |
| V | V |
| Bona do(m)pna plus no us deman Mais qen prendaz a seruidor Qe os seruirai com bon signor Cosi qe de guederdon man Ueos mal uostre comandamen francs cor humils gens e cortes Ors ni leons no(n) es uogues Que mauciaz sa uos mi ren |
Bona dompna, plus no·us deman mais qe·n prendaz a servidor, q’e·os servirai com bon signor, cosi qe de guederdon m’an. Ve·os m’al vostre comandamen, francs cor humils, gens e cortes! Ors ni leons non es vo gues, que m’auciaz, s’a vos mi ren. |
| VI | VI |
| Aqest amors me fer tan gen Al cor duna dolza sabor Cen ues mor lo iorn de dolor Et reuio de ioi altre cen Tant es lo mals del dolz senblan Qe mais ual mos mals qaltre bes Et pois lo mal ai tan bon ses Molt uaral bens apres lafan |
Aqest’amors me fer tan gen al cor d’una dolza sabor: cen ves mor lo iorn de dolor et revio de ioi altre cen. Tant es lo mals del dolz senblan, qe mais val mos mals q’altre bes; et pois lo mal ai tan bons es, molt vara·l bens apres l’afan. |
| VII | VII |
| Per bona fes e ses engan Am la plus bella e la meillor Del cor sospir e dels oillz plor Qar tant lamei per qei ai dan Et qen pois als camor men pren Et les zartres en qe ma mes No pod clao obrir for merces Et de merce noi trob nien |
Per bona fes e ses engan am la plus bella e la meillor. Del cor sospir e dels oillz plor, qar tant l’amei, per qe i ai dan. Et qe·n pois als, c’Amor m’en pren et les zartres en qe m’a mes, no pod clao obrir for merces, et de merce no·i trob nien? |