| B. de ue(n)tador(n). | B. de Ventadorn. |
| I | I |
| Can la dossaura uenta. deues nostre pais. m(e)s ueiaire quieu senta. odor de paradis. p(er) amor de la genta uas cuy yeu soi aclis. on ai messa mententa. e mon coratia sis. car de totas partis. mon cor tan matalenta. |
Can la doss’aura venta deves nostre pais, m’es veiaire qu’ieu senta odor de paradis per amor de la genta cas cuy yeu soi aclis, on ai messa m’ententa e mon corati’asis, car de totas partis mon cor, tan m’atalenta! |
| II | II |
| Si lo ioi q(uem) prezenta. sos esgartz el clar uis. ia res pus nom cossenta. sim deu au(er) co(n)q(ui)s. no sai q(ue) nos e(n) me(n)ta. q(ue) de res no soi fis. mas greu er q(uem) repenta. p(er) una uetz q(uem) dis. q(ue) bos homs sa fortis. el maluatz sespauenta. |
Si lo ioi que·m prezenta sos esgartz e·l clar vis, ia res pus no·m cossenta, si·m deu aver conquis. No sai que no·s en menta, que de res no soi fis; mas greu er que·m repenta, per una vetz que·m dis que bos homs s’afortis e·l malvatz s’espaventa. |
| III | III |
| Dona q(ue) cuiatz faire de mi q(ue)us am (ta(n)). p(er) q(uem) faitz ta(n) maltraire ni murir deziran. a franca de bo(n) aire. fetssetz mu(n) bel sembla(n). tal don mo(n) cor sesclaire. pel mal q(ue) trac tan gra(n). e noi dei au(er) dan. car no men puesc estraire. |
Dona, que cuiatz faire de mi que·us am tan, per que·m faitz tan mal traire ni murir deziran? A! Franca de bon aire, fetssetz m’un bel semblan, tal don mon cor s’esclaire, pel mal que trac tan gran e no·i dei aver dan, car no m’en puesc estraire. |
| IV | IV |
| De donas mes uei- aire. q(ue) gra(n) falhime(n) fan. de so car no son gaire. amat li fin- aman. mas yeu no(n) dei retraire. mais so quelas uolran. ta(n) greu mes q(ue) trichaire. aia ioi ab enian. o pus o atrestan. co(m)z sel q(ue)s fis amaire. |
De donas m’es veiaire que gran falhimen fan de so car no son gaire amat li fin aman. Mas yeu no·n dei retraire mais so qu’elas volran, tan greu m’es que trichaire aia ioi ab enian o pus o atrestan comz sel qu’es fis amaire. |
| V | V |
| Si no fos gen uilana. e lauze(n)gier sauay. yeu agramor s(er)tana. mas nome(n) recreirai. de solas me(n)s humana. ca(n)t locx es ni seschai. p(er) q(ue) cre q(ue) es mana. e q(ue)nq(ue)r naurai mai. castrucx soiorne gay. el malastrucx sa fana. |
Si no fos gen vilana e lauzengier savay, yeu agr’amor sertana, mas no m’en recreirai. De solas mens humana cant locx es ni s’eschai, per que cre que es mana e qu’enquer n’aurai mai, c’astrucx soiorn’e gay e·l malastrucx s’afana. |
| VI | VI |
| Selh soi q(ue) no soana. los bes q(ui) dieus me fay. q(ue)n eysa la semana. ca(n)t ieu parti de lay. me ditz e(n) razo plana. q(ue) mos chantars li play. tota ge(n) crestiana. q(ue) es de sotz lo ray. uolg(ra) ges ta(n) de iay. co(m)z ieu ses fe(n)cha uana. |
Selh soi que no soana los bes qui Dieus me fay, qu’en eysa la semana cant ieu parti de lay, me ditz en razo plana que mos chantars li play. Tota gen crestiana que es de sotz lo ray, volgra ges tan de iay comz ieu ses fencha vana. |