Tu sei qui

Edizione diplomatica

Schede primarie

Bernard del uentedorn.
C H antars no(n) pot gaire ualer
     Si dins del cor non mou lo chan(s)
     Ni chans no(n) pot del cor mouer
Si no(n) hi es fin amors coraus
P(er) so es mo(s) cantars cabalus
Quen ioi damor ai eszenten
La boquels hueilhs el cor el sen

Ja dieus nom da aqul poder
Que damar nom prenda talans
Can ia re no(n) sabri auer
Mas chascun iorn men uengues mau(s)
Trostemps naurai bon cor siuaus
E nai mot mai s de iauzimen
Qua nai bon cor e mi aten

Amor blasmon per no(n) saber
Folla gens mas lieis no(n) es dans
Camors no(n) pot ges decazer
Si no(n) es amors comunaus
Aco no(n) es amors aitans
Nona mas lo nom el paruen
Que ren non ama si non pren

Si eu en uolgues dir lo uer

Dieu sai be de cui mou lenguans
Da quellas camors per auer
E son mercandas uenaus
Mensongiers fo s hieu efaus
Uertat endic uilanamen
E pezame car ieu non men

En agradar esz en uoler
Es lamor de dos fis amans
Nuilha res noi pot pron tener
Silh uolontatz no(n) es engas
E sel es ben fols naturaus
Qui daco qe uol la pren
E ilh lauza so qe no(n) les gen

Molt ai ben mes mon bon er
Cant ellam mostra bel(s) senblans
Quieu plus deszir e uueilh uezer
Franque dousa fin eleiaus
En cui lo reis seria saus
Bella cuenhda ab cor conuinen
Ma fait ric hom de nien

Re mais non am ni sai temer
Ni ia res nom seria afans
Sol mi dons uengues a plazer
Caisel iorn mi sembla nadaus
Cab sos bels hueilhs esperitaus
Mas garda mas so fai tan len
Cuns sols dias me dura sen

Lo uers es fis e naturaus
E bons sel ui qui be lenten
E meilhers mi quel ioi aten

Bernartz de uentadorn lenten
El ditz el fai el ioi aten