 |
Bernard. T. AB zoi mou lo uers el comenz. Et ab zoi remain (et) fenis. Et sol qe bona fos la fins. Bons tegn qes lo comensamenz. Per la bona comencansa. Mi uen iois (et) alegransa. Et per zo dei la bona fin grazir. Qar toz bons faiz uei laudar al fenir. Si ma podera iois em uenz. Qem meraueill qar o sofris. Qar non o dic (et) non es bruis. |
 |
Per qe soi tan gais ni zausenz. Mais greu uerrez fin amansa. Ses paor (et) ses doptansa. Qades tem hom ues zo qama fallir. Per qeu no maus del parlar enardir. Duna ren mauondaua mos senz. Qanc nuls hom mon zoi non enqis. Qeu uolenter no len mentis. Qe nom par bons enseignamenz. Anz es folia (et) enfansa. Qi damor a benenansa. Qer ia lo uol ad home descobrir. Sil no len pod o ualer o seruir. Non es enois ni fallimenz. Ni uilania zo mes uis. Mais dome qan se fai deuis. Dautrui amor e conoisenz. Enoios (et) qeus enansa. Sim faiz enoi ni pesansa. Cascuns se uol de son mester fornir. Mi confondez (et) uos non uei iauzir. Ben couen a do(m)pna ardimenz. Entrauols genz (et) mals uezins. Qe si bons cors no lafortis. Greu pod esser pros ni ualenz. Per qeu preg maia en menbransa. La bella en cui ai fiansa. Qe nos cange per paraulas nes uir. Qels enemicx faza denueia morir. Ia sa bella boza rienz. Non cuidei baisa(n) me trais. Qab un sol dolz baisar maucis. |
 |
Et sab altre no mes garenz. Eissamen mes per senblansa. Com de peleus la lansa. Qe del seu colp non podihom garir. Se per eis loc no sen fezes ferir. Bella do(m)pnal uostre cors genz. Eill uostre bel oill man conqis. Li bel senblant (et) li dolz ris. Et la bella bocha rienz. Qan ben men prend aesmansa. De beutat non sai engansa. La genzer es com anc pogues chausir. O non uei clar dels oillz ab qeos remir. Bel uezer senes doptanza Uei qel uostre prez enanza. Qe tant sabez de plaser far (et) dir. Nuls hom nos pot de uos amar sofrir. |