 |
Bernard. QAn par flors iustal uert foill. Et uei lo te(m)ps clar (et) sere. El dolz chanz des ausels per broill. Ma dolza lo cor em reue. Pos lhausel chanton a lor for. |
 |
Eu qai tan de ioi en mon cor. Dei ben chantar car toz li mei iornal. Son ioi (et) chant qeu non pes de ren al. Cela del mon qal eu plus uoill. Et mais lam de cor (et) de fe. Au de ioi mos diz els acoill. Et mos prex escolta (et) rete. Et se hom per ben amar mor. Eu en morrai qinz en mon cor. Li port amor tan fin (et) natural. Qe tuit son fals ues mi li plus leial. Ben sal la noich can mi despoill. En leich qe non dormirai re. Lo dormir perd qar eu lom tuoill. Per uos do(m)pna dun mi soue. Qe la on om a son tresor. Uolom ades tenir son cor. Seu no uos uei do(m)pna dun plus mi cal. Negus uezers mon bel penser nom ual. Qan mi menbra com amar suoill. La falsa de mala merce. Sapchaz qe tal ira ma cuoill. Per paoc uios de ioi nom recre. Do(m)pna per cui chant (et) demor. Per la bocham ferez al cor. Dun dolz baisar de fin amor coral. Qem torn en ioi em get dira mortal. Tal ia qi an mais dorgoill. Qan granz iois ni granz bes lor ue. Mas eu soi de meillor escuoill. Et plus francs qan deus mi fai be. Cora qeu fos damor en lor. |
 |
Et soi de lor uenguz al cor. Merce do(m)pna non ai par ni engal. Res nom sofraing sol qe deus uos mi sal. Do(m)pna se nos uezon mei oill. Ben sapchaz qe mos cor uos ue. Et nous doillaz plus qeu mi duoil. Ben sai com uos destreing per me. Mas sil gelos uos bat de for. Gardatz qe no uos toz al cor. Sios fa enoi (et) uos lui atretal. Qe ia ab uos no gadaing ren per mal. Son bel uezer gard deus diredemal. Seu soi (de) loing (et) de pres atretal. |