I.
Compains Jehan, un jeu vous voel partir;
s'en kieusissiés tost a vo volenté.
Li quele amours vaut miex a maintenir
ou de cheli qui onques n'a amé,
ou d'une autre qui d'une druerie
s'est par raison et par honnour partie?
et andeus sont d'un pris, d'une biauté.
II.
Adan, je mech en cheli mon desir
qui bien d'amour a seü et prouvé.
s'ele ot ami qui bien le set servir,
je senc mon cuer si ferm en loiauté
c'aussi et miex sera de moi servie.
S'il fu faintis, a moi n'avenra mie;
par tant porrai mieus deservir son gré.
III.
Sire Jehan, selonc le mien plaisir,
au meilleur prendre avés mal assené.
On dist qu'envis puet on son cuer partir
de la ou s'est premierement donné.
Par tant aim miex que chele soit m'amie
qui a premiers s'est a moi otroïe
et tous amans a pour moi refusé.
IV.
Adan, je di, et se n'i puis faillir,
qu'a le meilleur des deus ai assené
car s'il l'estuet ore a moi obeïr,
de tant a plus et apris et usé
a faire honneur et sens et courtoisie.
Et quant d'amour est bien en signerie
tant rent plus tost au vrai ami bonté.
V.
Sire, assés miex vous deveriés tenir
a che qui tantes fois est esprouvé.
Vous savés bien c'on voit si retenir
feme tot chou ou sen cuer a enté
que le saveur a nul jour n'en ouvlie.
Pour chou aim miex feme en mon sens nourie
que s'ele eüst a autre escole esté.