| I. 10 II. 15 20 III. 30 35 IV. 40 45 V. 55 60 |
Ancontre le tens novel
ai le cuer gai et inel
a termine de Pascor;
lors veul faire un triboudel,
car j'ain mult tribu martel,
brut et bernaige et baudor,
et, quant je suis en chaistel
plain de joie et de rivel,
lai veul estre et nuit et jor.
Triboudaine et triboudel!
Deus confonde le musel
Ki n'aime joie et baudor!
De toute joie m'est bel,
et quant j'ai lou flàihutel
soneir aveuc la tabor,
damoiselles et donzel
chantent et font grant rivel,
chascuns ait chaipel de flour,
et verdure et brondelz
et li douls chans des oixels
me remet en grant badour.
Triboudainne, triboudel !
Plux seux liés, per saint Marcel !
Ke teils ait chaistel ou tour.
Ki bien broiche lou poutrel
et tient l'escut en chantel
a comencier de l' estor
et met la lance en estel,
por muelz vancre lou sembel
vait asembleir a millour,
cil doit bien avoir juel
de belle dame et anel,
per druerie s'amor.
Triboudainne, triboudel,
Por là belle a chief blondel,
Ki ait frexe la color !
Teilz amesce en un moncel
mil mairs et fait grant fardel
ki vit a grant deshonor:
Jai n'en avra boen morcel
et diauble en ont la pel,
cors et aime sens retor.
Por ceu veul jeu mon mantel
despandre tost et inel
en bonne ville a sejor.
Triboudainne, triboudel !
K'i valt avoirs en fardel,
S'on nel despent a honor ?
Quant je la tieng ou praiel
tout entor clos d'airbrexels
en esteit a la verdour
et j'ai oies et gaistel,
pouxons, tairtes et porcel,
buef a la verde savor,
et j'ai lou vin en tonel,
froit et fort et friandel,
por boivre a la grant chalor,
muels m'i ain k'en un baitel
en la mer en grant poour.
Triboudainne, triboudel! Plux ain le jeu de praiel Ke faire malvaix sejor. |