| I. 12 II. 24 III. 36 IV. 48 V. 60 |
Ancontre le tens novel ai le cuer gai et inel au termine de pascor; lors veul faire un triboudel, car j'ain moult tribu martel, bruit et barnage et baudor, et quant je sui en chastel plain de joie et de revel, la veul estre et nuit et jor. Triboudaine et triboudel! Deus confonde le musel Ki n'aime joie et baudor! De toute joie m'est bel, et quant j'oi le flaûtel soner avuec le tabor, damoiselles et donzel chantent et font grand revel, chascuns a chapel de flour, la verdure et li brondelz et li douls chans des oisels me remet en grant baudour. Triboudainne, triboudel! Plus sui liés, par saint Marcel! Ke tels a chastel ou tour. Ki bien broche le poutre et tient l’escu en chantel au comencier de l’estor et met la lance en estel, por mielz vaincre le cembel vait assembler a meillor, cil doit bien avoir joel de belle dame et anel part druerie et amor. Triboudainne, triboudel por la belle au chief blondel ki a fresche la color! Tels amasse en un moncel mils mars et fait grant fardel ki vit a grant deshonor: ja n’en avra bon morcel et dïable en ont la pel, cors et ame sens retor. Por ceu vueul jeu mon mantel despandre tost et inel en bone ville a sejor. Triboudainne, triboudel! Ke valt avoirs en fardel, s’on nel despent a honor? Quant je la tieng ou prael tout entor clos d’arbrissels en estéa la verdour et j’ai oies et gastel, poissons, tartes et porcel, buef a la verde savor, et j’ai le vin en tonel, froit et fort et friandel por boivre a la grant chalor, miels m’i aim k’en un batel en mer en grant poour. Triboudainne, triboudel! Plus aim le jeu de prael ke faire malvais sejor. |