| I. 5 10 II. 15 20 III. 30 35 IV. 40 45 V. 55 60 |
Encontre le tens novel ai le cuer gai et isnel a termine de pascor; lors vueil faire un triboudel, car j’aim molt triboumartel, bruit et bernage et baudor: et quant je sui en chastel plain de joie et de revel, la vueil estre et nuit et jor. Triboudaine et triboudel! Deus confonde le musel qui n’aime joie et baudor De tote joie m’est bel, et quant j’oi le flaütel soner avec la tabor. damoiseles et donzel chantent et font grant revel, chascuns a chapel de flor, et verdure et broutels et li dous chans des oisels me remet en grant baudor. Triboudaine, triboudel! Plus sui liés par Saint-Marcel, que tels a chastel ou tor! Qui bien broche le poutrel et tient l’escu en chantel au comencier de l’estor, et met la lance en estel, por mieus vaincre le cembel va assembler a meillor, cil doit bien avoir joel de bele dame et anel por druerie et amor. Triboudaine, triboudel por la bele a chief blondel, qui a fresche la color! Tele amasse en un moncel mil mars et fait grant fardel qui vit a grant deshonor: ja nen avra bon morcel, et diable en ont la pel, cors et ame, sans retor. Por ce vueil je mon mantel desperdre tost et isnel en bone vile, a sejor. Triboudaine, triboudel! Qu’i vaut avoirs en fardel s’on nel despent a honor? Quant je la tieng el prael tot entor clos d’arbrissels en esté, a la verdor, et j’ai oies et gastel poçons, tartes et porcel, buef a la verde savor, et j’ai le vin en tonel froit et fort et friandel por boivre a la grant chalor, mieus m’i aim qu’en un batel en la mer en grant poor. Triboudaine, triboudel! Plus aim le jeu de prael que faire mauvais sejor! |