I.
L'autre nuit en mon dormant
fui en grant dotance
d'un gieu parti en chantant
et en grant balance,
quant Amors me vint devant,
qui me dist: - Que vas querant?
trop as corage mouvant;
ce te muet d'enfance. -
II.
Lors tressailli durement;
en grant esmaiance
dis li: - Dame, se g'entent
a ma grant pesance,
c'est par vostre faus senblant,
qui m'a mort si cruëlment.
Partir vueil de vostre gent
par vostre esloignance.
III.
- Cil n'avra ja son voloir
a longue duree
qui por mal ne paine avoir
change sa pensee;
oncor t'en puès pou doloir.
Mult doit avoir le cuer noir
qui por fere son pouoir
pert sa desirree.
IV.
- Trop savez bien decevoir,
nus n'i a duree.
Il n'est pas en son pooir,
cil qui a vos bee.
Por ce m'estuet remanoir,
ne truis en vos fors espoir;
ne bonté ne puis avoir,
s'el n'est conparee.
V.
- N'aies si le cuer desvé,
mès en moi te fie!
qui est en ma poosté
plus mauvès n'est mie,
ainz a cent tanz plus bonté,
plus valor, plus largeté.
Tost t'avrai guerredoné;
met t'en ma baillie!
VI.
- Tant m'avez biau sarmoné
que ne lerai mie
que ne face vostre gré.
Mon cors et ma vie
met en vostre volenté,
mau gré ceus qui m'ont mellé
a vous, qui j'ai creanté
a estre en aïe.
VII.
Or vos pri merci, pour Dé;
que cil qui tant a amé
a vous s'umelie. -