Conmencerai
a fere un lai
de la meillour.
Forment m'esmay,
que trop par ai
fet de dolour,
dont mi chant torront a plour.
Mere Virge savouree,
se vous fetes demouree
se prïer le haut Seignour,
bien doi avoir grant paour
du Deable, du Felon,
qui en la noire prison,
nous veut mener,
dont nus ne puet eschaper;
et j'ai forfet, douce Dame,
a perdre le cors et l'ame,
se ne m'aidiez.
Douz Dieus, aiez
merci de mes vils pechiez!
Ou sera merci trouvee,
s'ele est de vous refusee,
qui tant valez?
Sire, droiture oublïez
et destendez vostre corde,
si vaigne misericorde
pour nous aidier!
Nous n'avons de droit mestier;
quant seur touz estes puissanz,
bien devez de voz serganz
avoir merci.
Biaus, douz Sire, je vous pri
ne me metez en oubli!
se pitié ne vaint venjance,
dont serons nous sanz doutance
trop mal mené.
Dame, plaine de bonté,
vostre douz mot savouré
ne soient pas oublïé!
Prïez pour nous!
Jamès ne serons rescous,
se ne le sonmes par vous,
de voir le sai.
ci lesserai;
et Dieus nous doint sanz delai
avoir son secours verai!