I.
Quant voi le tens bel et cler,
Ainz que soit noif ne gelée,
Chant pour moi reconforter,
Car trop ai joie oublïee.
Merveill est com puis durer,
Qu'adès bée a moi grever
Du monde la mieus amée.
 
II.
Bien set que n'en puis torner,
Por ce criem que ne me hée;
Mais ne fez pas a blasmer,
Que teus est ma destinée:
Je fui fez por li amer;
Ja Deus ne m'i dont fauser,
Nes s'ele a ma mort jurée.
 
III.
Mout me plest a regarder
Li païs et la contrée
Ou je n'os sovent aler
Por la gent mal eürée;
Mez si ne savroit garder,
S'el me vuet joie doner,
Que bien ne lor soit emblée.
 
IV.
Quant oi en parole entrer
Chascun de sa desirée,
Et lor mençonge aconter
Dont il ont meinte assenblée,
Ce me fet m'ire dobler;
Si me font grief sospirer
Quant chascuns son trichier née.
 
V.
Amor, bien vos doit menbrer
S'il est a aise qui bée.
Quant plus cuit merci trover,
Plus est ma peine doublée.
Ce me fet mout trespenser
Que n'os mes a li parler
De rien, s'il ne li agrée.
 
VI.
Bien me poüst amender
Sens ce qu'ele en fust grevée;
Mais, pour Dieu, li vueil mander,
Quant je n'ai merci trovée,
Qu'autre ne vueille escouter;
Car mout li devroit peser
S'ert de faus amanz gabée.
 
VII.
Ma chançon vueill definer:
Gui, ne vous puis oblier,
Por vos ai la mort blasmée.