I.
Merci, Amours, qu'iert il de mon martire
que j'ai soufert et encor vueill soufrir
dusqu'a un jour que vous plaira a dire
que me voudroiz mon service merir,
et tant et pluz serai je vostre amis?
je vous aim tant, nule rienz ne desirre
fors vostre cors, si m'en doinst Diex joïr.
 
II.
Or sui en l'aim de morir ou de vivre
se n'ai secours de ce que pluz desir.
Les males gens me vuelent desconfire
cui touz cis mons doit blasmer et haïr.
U vueille u non si me couvient blandir,
et sachiez bien que le faiz par grant ire,
maiz autrement ne m'en puis departir.
 
III.
Douce dame, qu'iert il de vo pensee?
Porrai la ja savoir par vostre gré?
Teuz sert lonc tanz qui'n a povre soudee
et teus mout pou qui'n a a volenté.
Jel di pour moi qui tant bien ai amé
que ma doleurs seroit tost oublïee
se guerredon fuissent a droit doné.