I.
Pois tals sabers mi sortz e·m creis   
que trobar sai — et ieu o dic! —      
mal estara si non pareis              
et er mi blasmat si m’en gic;         
car so qu’om van’ ab la lenga         
taing ben que en pes lo tenga,        
car non pot aver pejor dec            
qui ditz so que no s’avenga.          

II.
Er ai gaug car sebram dels freis      
e remanon sol li abric;               
li auzellet — et es lor leis          
qe negus de chantar no·is gic —       
us quecs s’alegr’ en sa lenga         
pel novel temps que·il sovenga;       
e dels arbres qu’eron tuit sec        
lo foils pels branquils s’arenga.     

III.
E qui anc jorn d’amar si feis         
non taing q’era s’en desrazic         
c’ab lo novel temps que s’espreis     
deu quecs aver son cor plus ric;      
e qui non sap ab la lenga             
dir so que·il coven, aprenga          
consi ab novel joi s’esplec:          
c’aisi vol Pretz que·s captenga.      

IV.
Estat ai fis amics adreis             
d’una que·m enganav’ ab tric,         
e car anc s’amors mi destreis,        
tos temps n’aurai mon cor enic;       
qu’aras non voill qu’ab sa lenga      
auir lo digz que·m destrenga          
per so qu’autre ab lieis s’abrec      
et eu caz so q’aicel prenga.          

V.
Ab leis remanga·l malaveis            
e·l engans et ab son amic;            
que tals joys m’a pres e m’azeis      
dont ja non creirai fals prezic:      
anz voill c’om mi tail la lenga       
s’ieu ja de leis crei lausenga        
ni de s’amor mi desazec,              
s’ie·n sabia perdr’ Aurenga.          

VI.
Ben taing qu’eu sia fis vas leis      
car anc mais tant en aut non cric.    
Que Nostre Seigner, el mezeis,        
ab pauc de far non i faillic;         
c’apenas saup ab la lenga             
dir “Aital vuoill que devenga”;       
qu’a la beutat qu’en leis assec       
non volc c’autra s’i espenga.         

VII.
Domna, no·us sai dir loncs plaideis,  
mas far de mi podetz mendic           
o plus ric que anc no fon reis;       
del tot sui en vostre castic!         
Sol vos digatz ab la lenga            
consi voletz que·m captenga;          
qu’eu ai cor qu’enasi estec,          
e que ja d’autra no·m fenga!          

VIII.
Domna, no·us quier ab la lenga        
mas qu’en baisan vos estrenga         
en tal luoc on ab vos m’azec,         
e que d’ams mos bratz vos senga.      

IX.
Levet, fai auzir ta lengua            
en cuy beutatz se depenga;            
c’aia tal vers selha qu’ieu dec       
per so que de mi·l sovenga.