Al son desviat, chantaire,
Veirai si puosc un vers faire
De fals' Amistat menuda,
C'aissi leu pren e refuda,
Puois sai ven e lai mercada,
E morrai si no· m n' esclaire.
Testo Gaunt-Harvey-Paterson 2000
El son d’esviat chantaire,
veirai si pusc un vers faire
de fals’amistat menuda,
c’aissi leu pren e refuda,
puois sai ven e lai mercada,
e morrai si no·m n’esclaire.
II.
12
Cest' amors sap engan faire,
Ab engan ses aigua raire,
Puois, quand l'a ras, se remuda
E quier autrui cui saluda,
A cui es douss' e privada,
Tant que· l fols deven musaire.
Cest’amors sap engan faire,
ab engan ses aigua raire,
puois qan l’a ras se remuda
e qier autrui cui saluda,
a cui es doussa e privada,
tant qe·l fols deven musaire.
III.
18
Non puosc dompnas trobar gaire
Que blanch' amistatz no·i vaire,
A presen o a saubuda
N'aja vergoingna perduda,
Si que la meins afrontada.
N'a laissat cazer un caire.
Non puosc dompnas trobar gaire
que blancha amistatz no·i vair’e
a presen o a saubuda
n’aia vergoigna perduda,
si que la meins afrontada
n’a laissat cazer un caire.
IV.
24
Moillerat, per saint Ylaire,
Son d'una foldat confraire,
Qu' entr' els es guerra moguda
Tals que cornutz fa cornuda,
E cogotz copatz copada,
Puois eis la coa de braire.
Moillerat, per saint Ylaire,
son d’una foldat confraire,
q’entr’els es gerra moguda,
tals que cornutz s’acornuda,
e cogotz copatz-copaire:
puois eis la coa de[u] braire.
V.
30
Tals cuid' esser ben gardaire
De la so' e de l'autrui laire,
C'atretals es devenguda
D' aicel de sai que la cuda ;
Si l'us musa, l'autre bada
E ieu sui del dich pechaire.
Tals cuid’esser ben gardaire
de la soa e de l’autrui laire,
c’atretals es de venguda
d’aicel de sai, que la cuida:
si l’us musa l’autre bada
et ieu sui del dich pechaire.
VI.
36
De nien sui chastiaire
E de foudat sermonaire,
Car puois la flam' es nascuda
Del fol drut e de la druda,
Si·l fols art per l'abrasada,
Non sui mal meire ni laire.
De nien sui chastiaire,
e de foudat sermonaire,
car puois la flam’es nascuda
del fol drut e de la druda
si·l fols art per l’abrasada,
no·n sui mal merens ni laire.
VII.
42
Tant cant bos Jovens fon paire
Del segle e fin' Amors maire,
Fon Proeza mantenguda
A celat et a saubuda,
Mas er l'ant avilanada
Duc e rei et emperaire.
Tant cant bos jovens fon paire
del segle e fin’amors maire,
fon proeza mantenguda
a celat et a saubuda,
mas er l’ant avilanada
duc e rei et emperaire.
VIII.
48
Qu'ieu sui assatz esprovaire,
Deffendens et enquistaire,
E vei cum Jovens se tuda,
Per que Amors es perduda
E de Joi deseretada
E cum Amors es cujaire.
Q’ieu sui assatz esprovaire,
deffendens et enqistaire,
e vei cum jovens se tuda,
per que amors es perduda
e de joi deseretada,
e cum amars es cuiaire.
IX.
54
L'amors don ieu sui mostraire
Nasquet en un gentil aire,
E·l luoc[s] on ill es creguda
Es claus de rama branchuda
E de chaut e de gelada,
Qu'estrains no l' en puosca traire.
L’amors don ieu sui mostraire
nasquet en un gentil aire
el luoc on ill es creguda:
es claus de rama branchuda
e de chaut e de gelada,
q’estrains no l’en puosca traire.
X. 56
Desirat per desiraire
A nom qui · n vol Amor traire.
Desirat per desiraire
a nom qui·n vol amor traire.
