I.
Amours par sa courtoisie
m'a un mignot sens doné
de faire chancon jolie;
si chant par sa volenté
en espoir d'avoir amie;
c'est la riens c'ai covoitie
plus tous jours et desirré
sans nul voloir de folie.
II.
J'aim dame bien ensegnie
et plaine de grant bonté,
tant est de valour garnie
ke je n'aroie conté
jamais ses biens a moitie;
che me fait vivre a haskie
ke n'a cuer entalenté
de nostre amour faire onie.
III.
Si tost con je l'euc choisie
me fist un assaut privé
de ses iex ki m'ont ravie
si trestoute ma santé
ke s'a moi ne s'umelie
par pitié pour riens c'on die,
n'iere mais jour sans grieté;
tant l'aim d'amour en asprie.