I.
Or veul chanteir et soulaicier 
et faire joie et renvoixier, 
ke ne sai si loiaul mestier; 
por ceu ne le veul jeu laissier. 
Se ma douce amie 
cui je ne hei mie 
me veult faire aïe, 
bien peux esploitier: 
sa grant cortoisie 
m'ait randu la vie, 
maix gent plain d'envie 
m'en font aloignier. 
Adès se poenent d'encuseir 
ceuls ki bien aimment sens fauceir, 
se s'en doient moult bien gardeir 
et lor compaignie eschueir.
  
II.
Je veul bien ma dame noncier 
ke je seux tous siens sens trichier, 
ne jai de li pertir ne quier; 
adès veul estre en son dongier. 
Trestoute ma vie 
moinrai bone vie; 
Fine Amor m'en prie, 
ke m'i puet aidier. 
je nel lairai mie 
por la gent haïe; 
lor grant velonnie 
ne prixe un denier; 
ne servent fors ke de jangleir 
ne nuls hons nes doit escouteir; 
ja por eaus ne larai l'ameir 
ne ma grant joie a demeneir.
  
III.
Ke est malvais bien est chaitis; 
il valt aisseis muels mors ke vis. 
Proudons n'en iert jai entrepris: 
adès croist et hauce ces pris. 
Prouesce est loee, 
malvestiés blamee, 
gens desesperee 
font adès lou pis. 
Ma dame honoree, 
ki a honor beie, 
sa joie est doublee 
nés en paradix. 
Ki bien veult a siecle dureir, 
si soit prous et saiche doneir 
et loiaulment aint sens fauceir: 
ensi puet sa joie fineir.