I.
De joli cuer chanterai
– Bone amor m'an prie –,
Et trop jolis an serai
Et sans vilonie,
Car tuit bien viennent d'amer:
Por ceu ain sans faucetei,
Ne jai por chastïement
Mes fins cuers ne se tanrait
D'ameir jolïetemant.

II.
Liez et ranvoixiez serai
Por vos, douce amie;
Sachiez, tant com je vivrai,
En vostre bailie
Voil estre sans jai sevreir:
Car ou mont n'ait vostre peir,
Et tuit bien entierement
Sont an vos: si an morrai,
Se je n'ai aligement.

III.
Belle Dame, an vos mis ai
Cuer et cors et vie,
Ne ja ne m'an pertirai,
Ceu ne dout je mie;
Mais je vos veul demandeir
Ke mesdixans escouteir
Ne voilliez à vos vivant,
Car jai frans cuers n'amerait
Vantëour ne mesdixant.