I.
Compaignon, je sai tel cose
ki chanter me fait sovent:
dame plus belle que rose
ki maintient joie et jovent.
Garis est ki servir l'ose
et qui sa merite atent,
k'adés est sa chambre enclose
de tous biens entierement;
tot adés m'en resosvient:
droit a ki Amors maintient,
puis k'onours et pris l'en vient.
II.
Ma dame est si douce chose
ke, kant je la voi, sovent
li cuers m'en rist et repose
ens el cors plux doucement.
Maix de tant mes cuers m'oposet
ke je ne li os noiant
requerre, ke ne me chose,
car trop dout son maltalent.
Tot adés m'en resosvient:
droit a ki Amors maintient,
puis k'onours et pris l'en vient.
III.
Douce dame deboinaire,
tant ne mi ferés de maus,
se mi faisiés vestir haire,
si quideroie estre saus.
Tant ne mi ferés mal traire
ke ne soie plus loiaus,
car vostres clers vis m'esclaire
plus que l'estoille jornaus.
Tot adés m'en resosvient:
droit a ki Amors maintient,
puis k'onours et pris l'en vient.
IV.
Dame, en qui j'ai ma fiance,
car aiés merchi de moi!
ke vaut longe demourance?
Cuer et cors tot vous otroi,
car tant vous aim, douce et france,
et je bien faire le doi,
k'en vous a sens et vaillance,
beauté, honor, ensi croi.
Tot adés m'en resosvient:
droit a ki Amors maintient,
puis k'onours et pris l'en vient.