I.
A une fontaine
lez un bois ramé
Jeanne et Alaine
seules i trouvé
je les salué,
et la plus prochaine,
quant m’ot esgardé,
m'a lues demandé:
– quel besoin vos maine? –
II.
– Bele, amours certaine
m'a lonc tens duré,
a qui en demaine
j’ai mon cuer doné;
mes mult m’a esté
ceste amors vilaine.
Ja n’en partiré,
car en tel pensé
faz ma quarantaine. –
III.
– Chevalier, sans faillie
ensi avez non,
par adevinaille
nos grievent felon;
por ce ne volon
que nostre assenblaille
sache se nos non,
que leur träison
noz fins cuers n’asaille. –
IV.
– Bele, dex vous vaille
a ce que penson;
de max ne vos chaille,
mes touz jorz servon,
car ensi vaintron
amors sanz bataille,
se paine i meton.
Qui atent tel don,
a droit se travaille. –
V.
– Chevaliers, la joie,
quant el vient d’amors,
granz max trez apoie
et oste dolors;
et li siens secors
tout honor mestroie
en fin cuer joios.
si volons touz jorz
estre en sa manaie. –
VI.
– Bele, se j’avoie
pöoir a estros,
enfins destruiroie
felons et jalos.
Trop sont ennuios;
ne nus qui les croie,
n’iert ja amoros.
Por dieu, penons nos
d’aler droite voie! –