I.
Ahi! Amors, com dure departie 
Me convenra faire de la millor 
Ki onques fust amee ne servie! 
Dieus me ramaint a li par sa douçour, 
Si voirement con j'en part a dolor! 
Las! k'ai je dit? ja ne m'en part je mie! 
Se li cors va servir Nostre Signor, 
Mes cuers remaint del tot en sa baillie.

II.
Por li m'en vois sospirant en Surie, 
Car je ne doi faillir mon Creator. 
Ki li faura a cest besoig d'aïe, 
Saiciés ke il li faura a grignor; 
Et saicent bien li grant et li menor 
Ke la doit on faire chevallerie 
Ou on conquiert Paradis et honor 
Et pris et los et l'amor de s'amie.

III.
Dieus est assis en son saint iretaige; 
Ore i parra con cil le secorront 
Cui il jeta ce la prison ombraje, 
Quant il fu mis ens la crois ke Turc ont. 
Honi soient tot chil ki remanront, 
S'il n'ont poverte ou viellece ou malaige! 
Et cil ki sain et jone et riche sont 
Ne poevent pas demorer sans hontaige.

IV.
Tot li clergié et li home d'eaige 
Qui ens ausmogne et ens biens fais manront 
Partiront tot a cest pelerinaige, 
Et les dames ki chastement vivront 
Et loiauté feront ceaus ki iront; 
Et s'eles font par mai consel folaige, 
A lasques gens mauvaiscs le feront, 
Car tot li boin iront en cest voiaige.

V.
Ki chi ne velt avoir vie anuieuse 
Si voist por Dieu morir liés et joieus, 
Car cele mors est douce et savereuse 
Dont on conquiert le resne presïeus, 
Ne ja de mort n'en i morra uns sels, 
Ains naistront tot en vie glorïeuse; 
Et saiciés bien, ki ne fust amereus, 
Mout fust la voie et boine et deliteuse.

VI.
Dieus! tant avons esté preus par huiseuse, 
Or i parra ki a certes iert preus; 
S'irons vengier la honte dolereuse 
Dont chascuns doit estre iriés et honteus; 
Car a no tans est perdus li sains lieus 
Ou Dieus soffri por nos mort angoisseuse. 
S'or i laissons nos anemis morteus, 
A tos jors mais iert no vie honteuse.