I.
Mout m'est bele la douce conmençance 
du nouvel tanz a l'entrant de pascour, 
que boiz et pré sunt de mainte samblance, 
blanc et vermeill, couvert d'erbe et de flour; 
et je sui, las, du tout en tel balance 
qu'a mainz jointes aour 
ma bele perte u ma haute richour, 
ne sai lequel, s'en ai joie et paour, 
si que souvent chant la u du cuer plour, 
car lons respis m'esmaie et mescheance.

II.
Ja de mon cuer n'istra maiz la samblance, 
donc me couquist as mos plainz de douçour 
cele qui j'ai du tout en ramembrance, 
si que mes cuers ne sert d'autre labour. 
Ha, franche rienz, en qui j'ai ma fiance, 
merci pour vostre honour! 
car s'en vous truis le samblant menteor, 
mort m'avrïez a loi de trahitour; 
si en vaudroit mout mainz vostre valour, 
se m'ociiez einsinc par decevance.

III.
Ha, con m'a mort de debonaire lance, 
s'einsi me fait morir a tel dolour! 
de ses biauz ieuz me vint sanz desfiance 
ferir u cors, que n'i ot autre tour; 
mout volentiers en preïsse vengance 
- par Dieu le creatour! - 
tel que mil foiz la peüsse le jour 
ferir u cuer d'autretele savour; 
ne ja certes n'en feïsse clamour, 
se j'eüsse ne moi vengier poissance.

IV.
Ne cuidiez pas, dame, que je recroie 
de vous amer, se mors nel me desfent! 
quar fine amours tient mon cuer et maistroie, 
qui tout me done a vous entierement, 
si que je n'ai de moi confort ne joie 
et qu'il m'avient souvent 
que je m'oubli pensant entre la gent; 
et tel delit ai en mon pensement 
de vous, dame, a cui amours me rent, 
que, s'a vous n'ert, ja parler ne querroie.

V.
Ha, franche rienz, puiz qu'en vostre manaie 
me sui touz mis, trop me secourez lent, 
quar nus dons n'est cortoiz c'on trop delaie, 
si s'en esmaie cil qui si atent; 
q'uns petiz biens vaut mieuz - se Diex me voie! 
c'on fait courtoisement, 
que dui greigneur fait anuieusement, 
car qui le suen done retraianment 
son gré en pert, et si couste ausement 
con a celui qui volentiers l'otroie.

VI.
Chanson, va t'en la u mes cuers t'envoie 
(ne l'os dire autrement): 
la trouveras, se mes cuers ne me ment, 
cors sanz merci, graille, gras, blanc et gent, 
simple et sage, de dolz acointemant, 
et vis riant et grant biauté veraie.