I. 
Bel m'est li tens 
que la saisons renovele, 
que ses douz chanz 
rencomence l'alouele. 
Con fins amanz 
chanterai por la plus bele 
qui soit mananz 
desci q'as murs de Tudele.
  
II.
Por li sospire 
mes cuers et empire, 
mais ne li os dire 
ne mostrer ma plaie. 
S'or seüst lire 
en fuelle ou en cire, 
veïst mon martire, 
vers moi fust veraie. 
Las! tant puis dire 
n'os juer ne rire: 
mon cors fait defrire 
cele qui l'essaie. 
Deus ne fist mire 
qui poïst descrire 
mon cruel martire, 
s'ele ne l'apaie,
  
III.
que tant l'ai amee 
k'ensi a sosprise 
s'amors ma pensee, 
qui dou tout s'est en li mise, 
car bien l'ai visee, 
k'ele est trop bele a devise.
  
IV.
Ele ot brun poil, s'est plus blanche que fee, 
droit nés, blans danz con est la flors en pree, 
vairs euz rianz, boichette encoloree, 
front blanc et cler, tendre come rosee; 
gente de cors, de membres acemee, 
ainz plus bele ne fu de mere nee. 
Mais or ne sai por coi l'ai si loee, 
se ne li di tout de fi ma pensee. 
Non ferai voir, ne l'en dirai denree: 
j'aim mieuz morir k'avoir sa refusee. 
Seus amerai, telx iert ma destinee, 
ne ja par moi n'iert mais d'amors requise.

I. 
«Biaus Colins Musés, je me plaing d'une amor
ke longuement ai servie
de loiaul cuer, n'ains pitiet n'ainz .....
N'i pou troveir nen aïe,
S'i truis je mult semblant de grant dousor,
Maix se m'est vis ke il sont traïtor,
ke bouche et cuers ne s'i acordent mie.
  
II.
- Jaikes d'Amiens, laissiés ceste folor !
Fueis fauce druerie,
n'en biaul semblant ne vos fieis nul jor :
cil est musairs ki s'i fie !
Pues ke troveis son cuer a menteor,
se plux l'ameis, sovant duel et irour
en avereis et pix ke je ne die.
  
III.
- Colin Muset, ne m'iert pais deshonor,
se de li fais departie :
pues c'ai troveit son samblant tricheor,
porchaicerai moy d'amie,
car je li ai veü faire teil tour
et teil samblant et teil ensaigne aillors,
per coy je hais li et sa compaignie.
  
IV.
- Jaikes d'Amiens, il n'est duels ne irour
fors ke vient de jalousie.
Povres amans souffre mainte dolor
ki baie a grant signorie,
et un usaige ont borjoises tous jors:
jai n'amerait, tant soit de grant richour,
home, c'il n'ait la borce bien gairnie.
  
V.
- Colins Musés, gentils dame ait honor
ke a ceu ne baie mie,
maix lai ou voit sen, prouesce et valour,  
joliveteit, cortoisie !
La fauce lais por ceu, se m'en retour
a la belle, la blonde et la millor
ki onkes fust d'amors nul jor proïe.
  
VI. 
- Jaikes d'Amiens, et j'arant m'en retour
as grais chaippons et a la jancellie
et as gastiauls ki sont blanc corne flor
et a trés bon vin sor lie.
As boens morcès ai donee m' amor
et as grans feus per mi ceste froidour :
faites ensi, si moinrés bone vie !
  
-Colin Muset, kier t'aixe et ton sejor
et je querrai d'amors joie et baudor,
car consireir d'amors ne me puis mie.»

I.
De la procession 
au bon abbé Poinçon 
me covient a chanter: 
hons de religion 
ne fist mais tel pardon 
par son païs aler. 
tout a fait agaster 
et tout mis a charbon; 
s'il ne fust si proudom, 
il ne l'osast panser.
  
II.
De la procession 
la croiz et le baston 
ont chargié Guienot, 
qui ot a compaignon 
Gauterot de Greingnon, 
Ranfroi et Denisot, 
et maint autre vallot 
et maint vilain felon;
jusqu'ou Val de Suson 
n'ont laissié chacelot.
  
III.
Jehanz de Trichastel 
i vint et bien et bel 
a la procession; 
avec lui maint donzel, 
qui portent penoncel 
le conte de Chalon: 
la moiche et le brandon, 
n'i quiert autre jöel;
ne veincra mais cembel 
a Roins ne a Löon.
  
IV.
Li Loichars de Preingei 
vint devers Pelerey 
par mi Vilemurvi:
nostre abbés li mandey 
que destruisist Lerey 
et si nou lessest mi;
et il a tout saisi 
jusques vers Pelerey;
ne Fraignoy ne Poncey 
ne mist pas en obli.
  
V.
Par devers Duymois 
vint Girars li cortois, 
plus blans que flors de lis,
avec lui ses Irois. 
Trés ci qu'en Digenois 
ont gasté le païs: 
n'i laissent, ce m'est vis, 
orge, froment ne pois. 
Chargiez VII^xx chamois 
en ont devers aus mis,
 
VI.
Sanz les bues viennois, 
dont il ont cent et trois 
chargïez lor accersis, 
qu'il moinnent en Ausois; 
il nes rendront des mois, 
qu'il ne l'ont pas apris. 
Girars torna son vis 
par devers un marois. 
se ne fnst Vesinois, 
Beligney fust maumis.
  
VII.
Girars s'est bien garniz 
de portes, de postiz, 
por fermer sa maison:
n'i covient plaissëiz 
ne autre rollëiz, 
se de viez mairien non. 
or li doint Deus moisson! 
D'arches est bien garniz:
fous est qu'au viel oison 
enseingne le pasquiz!
  
VIII.
Le filz au bon Hugon 
d'a ceaus prés de Noiron 
seit bien terre gaster; 
n'i a laissié monton, 
geline ne chapon, 
qu'i ne face tuer. 
Nuns ne l'en doit blamer 
qu'i entende raison, 
car filz d'esmerillon 
doit par droit oiseler.
 

I.
Devers Chastelvilain 
me vient la robe au main 
com uns oitours norrois. 
Bon jor doint Deus demain 
le seignor que tant ain! 
Proudons est et cortois; 
de ci qu'en Navarrois 
n'a si bon chastelain; 
de son chastel a plain 
ne doute il les deus rois.
  
II.
Or vos di que Choisués 
ne me vaut mais deus oés, 
qui me soloit valoir. 
Tot mainjuent vermués 
vermin et escurués: 
n'en puis mais point avoir; 
et s'ont mis lor avoir 
en vaiches et en bués 
et s'ont fait uns murs nués, 
que Deus gart de cheoir!
  
III.
Or m'en vois a Soilli: 
piec'ai que n'assenai 
a si bone maison. 
Le seigneur demandai: 
maintes foiz m'a donné 
robes et maint bel don. 
Ce n'est pas en pardon, 
se j'en sui retornez: 
s'il n'est empeorez, 
j'en avrai guierredon.
  
IV.
Perdu ai deus chastelx, 
dont je sui mult engrex 
et bien m'en doit chaloir: 
c'est Vignoriz, Rignez. 
Deus seignors i a belx, 
qui ne doignent valoir, 
s'ont mis a nonchaloir 
armes et les cembelx. 
Il n'ont part ou mantel, 
foi que doi saint Eloir!
  

I.
En ceste note dirai 
d'une amorete que j'ai, 
et pour li m'envoiserai 
et bauz et joianz serai: 
l'en doit bien pour li chanter 
et renvoisier et jouer 
et son cors tenir plus gai 
et de robes acesmer 
et chapiau de flors porter 
ausi comme el mois de mai.
  
II.
Trés l'eure que l'esgardai, 
onques puis ne l'entroubliai; 
adès i pens et penserai: 
quant la vois, ne puis durer, 
ne dormir, ne reposer. 
Biau trés douz Deus, que ferai? 
la paine que pour li trai, 
ne sai conment li dirai: 
de ce sui en grant esmai 
oncore a dire li ai; 
quant merci n'i puis trouver 
et je muir por bien amer, 
amoreusement morrai.
  
III.
Je ne cuit pas ensi morir, 
s'ele mi voloit retenir 
en bien amer, en biau servir; 
et du tout sui a son plesir 
ne je ne m'en qier departir, 
mès toz jorz serai ses amis.
  
IV.
Hé! bele et blonde et avenant, 
cortoise et sage et bien parlant, 
a vous me doig, a vous me rent 
et tout sui vostres sanz faillir. 
Hé! bele, un besier vous demant, 
et, se je l'ai, je vous creant 
nul mal ne m'en porroit venir.
  
V.
Ma bele douce amie, 
la rose est espanie; 
desouz l'ente florie 
la vostre conpaignie 
mi fet mult grant aïe. 
vos serez bien servie 
de crasse oe rostie 
et bevrons vin sus lie, 
si merrons bone vie.
  
VI.
Bele trés douce amie, 
Colin Muset vos prie 
por Deu n'obliez mie 
solaz ne compagnie, 
Amors ne druerie: 
si ferez cortoisie! 
  
Ceste note est fenie.
 
 

I.
En mai, quant li rossignolez 
chante cler ou vert boissonet, 
lors m'estuet faire un flajolet, 
si le ferai d'un saucelet, 
qu'il m'estuet d'amors flajoler 
et chapelet de flor porter 
por moi deduire et deporter, 
qu'adès ne doit on pas muser.
  
II.
L'autr'ier en mai, un matinet, 
m'esveillerent li oiselet, 
s'alai cuillir un saucelet, 
si en ai fait un flajolet; 
mais nuns hons n'en puet flajoler, 
s'il ne fait par tout a loer 
en bel despendre et en amer 
sanz faintise et sanz guiler.
  
III.
Gravier, cui je vi joliet, 
celui donrai mon chapelet. 
De bel despendre s'entremet, 
en lui nen a point de regret, 
et por ce li vuil je doner 
qu'il ainme bruit et hutiner 
et ainme de cuer sanz fauser; 
ensi le covient il ovrer.
  
IV.
La damoisele au chief blondet 
me tient tot gay et cointelet; 
en tel joie le cuer me met 
qu'il ne me sovient de mon det. 
Honiz soit qui por endeter 
laira bone vie a mener! 
Adès les voit on eschaper, 
a quel chief qu'il doie torner.
  
V.
L'en m'apele Colin Muset, 
s'ai maingié maint bon chaponnet, 
mainte haste, maint gastelet 
en vergier et en praelet, 
et quant je puis hoste trover 
qui vuet acroire et bien preter, 
adonc me preng a sejorner 
selon la blondete au vis cler.

N'ai cure de roncin lasser 
après mauvais seignor troter: 
s'il heent bien mon demander, 
et je, cent tanz, lor refuser.

I.
Il me covient renvoisier 
en cest estey 
et joer et solacier 
et deporter: 
j'ai trovey 
mon cuer plus que je ne sueil enamoré; 
mais grever 
me cuident li mesdisant et dessevrer.
  
II.
La tousete es blans muteaus, 
es chevous lons,
celi donrai mes joiaus 
et mes granz dons. 
Sejornons, 
ensi s'en va mes avoirs a grant bandon. 
Or maingons, 
solaçons et deportons! Bons poissons, 
vins poignanz et bons rapiaux et venoisons!
  
III.
S'ele me done un baisier 
en receley, 
je n'avroie pas si chier 
une cité; 
j'en pri Dey: 
lors avrai quanque je quier a point mené.