I.
A grant tort me fet languir
Amors, qu'ainc ne soi trichier:
Ains la ser sens repentir
De fin cuer loial, entier.
Bien me devroit otriier
De ma dame un dous baisier,
Por alegier,
Que sens li ne puis avoir confort.
Amors, a grand tort
Volez ma mort.

II.
Douce riens, cui tant desir,
Ne me sai ou consellier;
Mes tant me plest a sofrir
Li maus, dont merci vos quier,
Que ne m'en puis aloignier,
Mes por Dieu vos vueil priier
De moi aidier, 
Que sens vos ne puis avoir confort.
Amors etc.

III.
Las! quant son gent cors remir
Bien vueil estre en son dangier
Si me plest mout obeïr
Solement dou desirier.
Pas ne se doit aloignier
Fins amanz, que de legier
Puet avancier;
Qu'en loiauté doit avoir confort.
Amors etc.

IV.
Deus! que porai devenir,
Quant tot le mont l'oi prisier!
N'onques ne poi tant servir
Qu'a merci puisse aproichier;
Quant plus l'aim, et moins m'a chier.
S'Amors ne fraint son cuer fier,
Ce n'a mestier
Qu'en mon vivant puisse avoir confort.
Amors etc.

V.
Faus felon et losengier,
Qui nos vuelent abessier
Par lor plaidier;
Mais ço n'iert ja se pitiez ne dort.
Amors etc.

I.
A grant tort me fait languir
Amors, k'ainz ne soi trechier;
ainz la serf senz repentir
de boen eer leial entier.
Bien me devroit outroier
de ma dame un douz baisier
por alegier,
que senz li ne puis avoir confort.
Amors, a grant tort
volez ma mort.
 
II.
Douce riens, cui tant desir,
ne me sai ou conseillier,
et tant me plaist a soffrir
li mals dont merci vos quier,
que ne me puis esloignier,
mais por Deu vos voil proier
de moi aidier,
ke senz vos ne puis avoir confort.
Amors, a grant tort
volez ma mort.
 
III.
Las! quant son gent cors remir
bien voil estre en son dangier,
si me plaist molt obeïr.
Seulement, del desierrier
pas ne se doit esloignier
fins amis qui de legier
puet avencier,
k'en lealté doit avoir confort.
Amors, a grant tort
volez ma mort.
 
IV.
Dex! que porrai devenir?
Q'a tot lo mont l'oi preisier
n'onques ne poi tant servir
q'a merci puisse aprochier:
kant plus l'aim, et moins m'a chier.
S'Amors ne fraint son cuer fier,
ceu n'a mestier
k'a mon vivant puisse avoir confort.
Amors, a grant tort
volez ma mort.
 
V.
[...]
[...]
[...]
[...]
faus felon et losengier
qui nos vuelent abaissier
par lor plaidier;
mais ceu n'iert ja se Pitiez ne dort.
Amors, a grant tort
volez ma mort.
 

I.
A la douçor de la bele seson,
Que tote riens se resplent en verdor,
Que sont bel pré et vergier et buisson,
Et li oisel chantent desor la flor,
Lors sui joianz que tuit lessent amor,
Qu'ami leal ne voi mes se moi non;
Sols vueil amer, et sols veuil ceste honor.

II.
Mout m'ont grevé li tricheor felon,
Mes il ont droit, qu'onques nes amai jor.
Lor deviner et lor fause ochoison
Fist ja cuider que je fusse des lor.
Joie en perdi, si en crut ma dolor,
Car ne mi soi garder de traïson:
Encor en dot felon et traïtor.

III.
Entor tel gent ne me sai maintenir
Qui tote honor lessent a lor pooir;
Tant com je m'aim les me covient haïr,
Ou je faudrai a ma grant joie avoir;
C'est granz enuis que d'eus amentevoir,
Mais tant les hai que ne m'en puis tenir;
Ja lor mestier ne leront dechoir.

IV.
Or me doint Dieus ma dame tant servir
Qu'il aient duel de ma joie veoir;
Bien me devroit vers li grant lieu tenir
Ma loiautez, qui ne puet remanoir.
Mais je ne puis encore apercevoir
Qu'ele des biens me vueille nus merir
Dont j'ai sofert les maus en bon espoir.

V.
Je n'en puis mes, se ma dame consent
En ceste amor son home a engignier;
Car j'ai apris a amer loiaument,
Ne ja nul jor repentir ne m'en quier.
Si me devroit a son pooir aidier
Ce que je l'aim si amorosement,
N'autre ne puis ne amer ne proier.

VI.
Li cuens Jofrois, qui me doit conseillier,
Dist qu'il n'est pas amis entierement
Qui nule fois pense a amors laissier.

I.
A la douçor de la bele seson,
que tote riens se reprent en verdor,
que sunt biau pré et vergier et buison,
et li oisel chantent desor la flor,
lors sui joianz quant tuit lessent amor,
qu'ami loial ne voi més se moi non;
seus vueil amer, et seus woil ceste honor.
 
II.
Mout m'ont grevé li trichëur felon,
més il ont droit, c'onques nes amai jor.
Lor deviner et lor fause acheson
fist ja cuidier que je fusse des lor.
Joie en perdi, si en crut ma dolor,
car ne mi soi garder de traison:
oncor en dot felon et traïtor.
 
III.
Entor tel gent ne me sai maintenir
qui tote honor lessent a lor pouoir;
tant con je m'aim les me couvient haïr,
ou je faudrai a ma grant joie avoir.
C'est grans ennuis que d'els amentevoir,
més tant les hé que ne m'en puis tenir;
ja lor mestier ne leront decheoir.
 
IV.
Or me dont Dex ma dame tant servir
qu'il aient duel de ma joie veoir;
bien me devroit vers li grant lieu tenir
ma loiauté qui ne puet remanoir.
Més je ne puis oncore apercevoir
qu'ele des biens me voille nus merir,
dont j'ai souffert les maus en bon espoir.
 
V.
Je n'en puis més, se ma dame consent
en ceste amor son home a engingnier,
car j'ai apris a amer loiaument,
ne ja nul jor repentir ne m'en quier,
si me devroit a son pouoir aidier
ce que je aim si amorosement,
n'autre ne puis ne amer ne proier.
 
VI.
Li quens Giefrois, qui me doit conseillier,
dit qu'il n'est pas amis entierement
qui nulle fois pense a amors lessier.
 

I.
A la douçor d'esté qui renverdoie
Chantent oisel et florissent vergier;
Mes je ne sai dont resjoïr me doie
Quant a merci fail quant je plus la quier;
S'en chanterai sens joie et sens proier;
Que ma mort voi, ne faillir n'i poroie,
Pues qu'Amors vuet que contre moi la croie.

II.
Dieus! qu'a Amors, qui toz les siens guerroie,
Ceus qu'ele puet grever et mestroier?
Li beaus semblanz qu'en ma dame veoie
M'a trop grevé, n'ainc ne m'i vout aidier.
Car s'ele fu crueus a l'acointier,
Bien sai de voir qu'a son tort me guerroie:
Si me covient qu'a sa volenté soie.

III.
Puis qu'ainsi est qu'a li ne puis contendre,
Or vueille ou non, servir la me covient;
Qui cuide avoir grant joie sens atendre
Bien doit servir; mes cil qui faillir crient
Est si destroiz quant secors ne li vient;
Mes je ne puis moi ne mon cuer defendre
De plus amer qu'Amor ne me vuet rendre.

IV.
Grant pechié fait qui son home vuet prendre 
Par beau semblant mostrer tant que le tient. 
Ainsi me list ma dame a li entendre 
Qu'eie me fet cuider que ce devient 
Qui en veillant faut et en dormant vient; 
S'en nest l'amor et croist, que ja n'ert mendre, 
Dont el me fait enflamber et esprendre. 

V.
Je ne tieng pas l'amor a droit partie 
Dont il covient morir ou trop amer; 
Si me covient que chant et jo et rie, 
Et fes semblant de ma joie cuider. 
Ma dame dit qu'ensi doi endurer : 
Muire esperanz en atente d'aïe. 
Joïr en puis, mes ne sai que j'en die. 

VI
Dame, beautez, valor et cortoisie 
At il en vos: il n'i a qu'amender; 
Se vos ces biens tornez en felonie, 
Por ochoison de vostre ami grever, 
Mout durement en feriez a blasmer;
Que vostres sui, de vostre seignorie, 
Et vostre amor me donra mort ou vie. 

VII.
Li cuens de Blois devroit bien honorer 
Force d'amor qui li dona amie. 
Amer pot il, mais il n'en morut mie.
 

I.
A la douçor du tens qui raverdoie
chantent oisel et florissent vergier;
mes je ne sai dont resjoïr me doie,
quant a merci fail quant je plus la qier;
je chanterai sanz joie et sanz proier,
que ma mort voi, ne faillir n'i porroie,
puis qu'amors veut que contre moi la croie.

II.
Dex! qu'a amors, qui touz les siens gerroie,
ceus qu'ele puet grever ne mestroier?
Li biax senblans qu'en ma dame trouvoie
m'a trop grevé, n'ainc ne m'i vout aidier;
cele m'i fu cruels a l'acointier;
je sai de voir qu'a son tort me mestroie,
si me couvient qu'a sa volenté soie.

III.
Puis qu'ensi est qu'a li ne puis contendre,
ou vueille ou non, servir la me couvient.
Qui cuide avoir grant joie sanz atendre
bien doit souffrir, mes cil qui faillir crient
est si destroiz quant secors ne li vient;
mes je ne puis moi ne mon cuer deffendre
de plus amer qu'amors ne me veut rendre.

IV.
Grant pechié fet qui son honme veut prendre
par biau senblant moustrer tant q'il le tient.
Ensi me fist ma dame a li entendre
dont or me fet tel cuidier, se devient,
qui en veillant faut et en dormant vient;
s'en nest l'amor et croist, qui ja n'iert mendre.
Dont el me fet et flanber et esprendre.
 
V.
Je ne tieng pas l'amor a droit partie,
dont il couvient morir en trop amer;
si me couvient que chant et gieu et rie
et faz senblant de ma joie cuidier.
ma dame dit qu'ensi doi endurer:
muire esperanz en atente d'aïe
– morir en cuit, mes ne sai que g'en die. –
 
VI.
Dame, valour, beauté et cortoisie
a tant en vos c'on n'i set qu'amender;
s'avuec ces biens acuilliez felonie
par achoison de vostre ami grever,
vostre fin cuer en ferïez blasmer,
que vostres sui en vostre seignorie,
en vostre amor, qui donra mort ou vie.
 
VII.
Li cuens de Blois devroit bien mercïer
force d'amour, qui li dona amie:
amer pot il, mes il n'en morut mie.
 

I.
A mal aise est qui sert en esperance
et dont ne set s'on li voudra merir
son service ne preu n'i afiance,
et s'il s'en dieut, ne l'ose descouvrir.
Las, einsi m'est, car adés criem faillir
ne ja ne quit a la joie avenir
u mes cuers tent
et a tendu longuement
si loiaument
c'ainc d'autre amour n'oi talent.
 
II.
J'aim la meilleur qui soit et la pluz france
si m'en dout mout que n'i doie faillir,
qu'ele est a tous de si douce acointance
c'adés samble que j'en doie joïr.
Li losengier me font maint mal sentir
et males gens qui Diex puist maleïr
prochainnement,
car il ont fet maint torment
a moi qui sent
les mauz d'amer aigrement.

I.
Amours qui a son oés m'a pris
me fait envoisier et chanter
pour vos, dame, ou j'ai mon cuer mis,
dont je ne[l] puis ne quier oster,
ainz vos vuil servir et amer
de cuer loial entier, sanz tricherie,
que d'autre amour n'ai talant ne envie,
et Dex me doint [tant] faire et tant valoir
que vos vuilliez de moi merci avoir,
car en vos est ou ma mort ou ma vie.
 
II.
Dame, vos m'avez si conquis
que je ne puis aillors penser
et j'ai si lëaument empris
de vos servir et honorer
que ja ne m'i verroiz fauser.
Mon cuer avez tot an vostre baillie,
s'avez sor moi pooir et seignorie,
ne ja més jor n'avrai autre voloir,
ainz servirai de cuer en bon espoir
vos et Amours qui s'est de moi saisie.
 
III.
Se de vos amer sui sopris,
qu'en puis je, quant j'oi tant loer
vostre grant beauté, vostre pris,
vostre sen, vostre bel parler,
vostre semblant, vostre acesmer,
vostre valour et vostre cortoisie;
vostre cors gent, que mes fins cuers n'oblie,
me fait sovent sopirer et doloir,
et tant vos dout et ain sanz decevoir
que mar vos vi, se de vos n'ai aïe.
 
IV.
Dame, onques mon cuer ne vos dis,
et toz jors le vos cuit celer,
et s'ai je aucune foiz empris
que je[l] vos cuidoie mostrer;
més quant j'en vuil a vos parler,
li sens me faut, la parole me lie,
je n'ai pooir que nule rien vos die,
si ne voi pas con le puissiez savoir,
se vostres sens ne vos fait parcevoir
la bone amour qui est en moi norrie.
 
V.
Sovant sui iriez et pensis
quant je ne puis a vos parler:
por felons de vostre païs
n'os venir vers vos ne aler.
Ainsi me covient endurer
grief mal por vos, et si nou savez mie;
més je vuil bien que ma chansons vous die
que bien poëz conoistre et parcevoir
a mon semblant quant je vos puis veoir
que plus vos ain que rien qui soit en vie.
 
VI.
Douce dame, cui n'os nommer amie,
des que je n'ai hardement ne pooir
de vos mostrer mon mal et mon voloir
en lieu de moi ceste chansons vos prie.
 
VII.
D'un Chastelain vuil que ma chansons die,
Huon, qu'il pant d'amer et de valoir
et esloignier touz cés a son pooir
qui sont vilain et ploin de felonie.
 

I.
En chantant m'estuet complaindre 
A ma dame et a Amors:
Servies les ai sens faindre, 
N'onques n'i trovai secors;
Ço n'est mie lor honors 
De moi grever et destraindre;
Qu'onques n'oi tant de dolors 
Que vosisse amer aillors. 

II.
Fine Amors ne puet remaindre 
Por mal tret; mais la paors 
De ce qu'on n'i puet ataindre 
Fet esmaier les plusors. 
Dame, mes vostre valors, 
Qui de totes est la graindre, 
Me fet et fera toz jors 
Prendre en gré maus et dolors. 

III.
Amors, je ne me plaing mie, 
Se cele me vuet grever 
Cui j'ai en mon cuer choisie 
Por servir et honorer. 
Ne m'en porroie lasser; 
Mais d'une rien muir d'envie:
Que sovent n'i os aler,
Ne sens li ne puis durer. 

IV.
Bele, por cui j'aim ma vie,
Je sui vostres sens fauser; 
Et se vos nel volez mie, 
Por ce ne m'en puis oster. 
Morir vueil ou achever;
Mes esperance m'afie 
Que cil doit merci trover,
Qui set servir et amer.

V.
Toz jors l'ai en remembrance 
Des que je primes la vi, 
Son gent cors et sa semblance
Et la grant beauté de li 
Qui si ont mon cuer saisi! 
N'onques n'oi duel ne pesance 
Que ne meïsse en obli 
Quant je parler en oï.

VI.
Por Deu, Amors, proiez li 
Que j'aie sa bienvoillance; 
Por pitié et por merci! 
Car, se j'i fail, mar la vi. 

VII.
Beaus compains de Valeri, 
D'amors vient tote vaillance; 
Et por Deu entendez i, 
Que je le vos lo et pri.
 

I.
An chantant m'estuet conplaindre
a ma dame et a Amors:
servies les ai senz faindre,
n'ainz n'i poi trover secors.
Ceu n'est mie lor honors
de moi grever et destraindre,
c'onques n'en oi tant dolors
que vosisse amer aillors.
 
II.
Bone Amors ne puet remaindre
por maltrait, més la paors
de ce c'on ne puet ataindre
fait esmaiier les plusors;
mais, dame, vostre valors,
qui desor totes est graindre,
me fait et fera toz jors
prendre en gré mals et dolors.
 
III.
Bele, por cui j'aim ma vie,
vostres sui toz senz falser;
et se vos nel volez mie,
por ce ne m'en puis oster.
Morir vuel ou eschiver,
mais esperance m'afie
que cil doit merci trover
qui seit servir et amer.
 
IV.
Amors, je ne me plaing mie
se cele me vuet grever
cui j'ai en mon cuer choisie
por servir et honorer;
ne m'en porroie lasser.
Mais d'une rien muir d'envie:
que sovent n'i os aler,
ne senz li ne puis durer.
 
V.
Toz jors l'ai en remambrance
des que premerains la vi,
son gent cors et sa semblance
et la grant bialté de li
ki si ont mon cuer saisi,
n'onques n'oi mal ne pesance
que ne meïsse en obli,
quant je parler en oï.
 
VI.
Por Deu, Amors, proiez li
que j'aie sa bienvoillance
por pitié et por merci,
car, se g'i fail, mar la vi.
 
VII.
Beax compainz de Valeri,
d'amors vient tote vaillance
et, por Deu, entendez i,
que je lo vos lou et pri.
 

I.
Au renoviau de la douçor d'esté, 
Que resclarcist la doiz en la fontaine 
Et que sont vert bois et vergier et pré 
Et li rosiers en mai florist et graine, 
Lors chanterai, car trop m'avra grevé 
Ire et esmai ki m'est al cuer prochaine; 
Et fins amis, a tort achaisonez, 
Est moût sovent de legier esfreëz. 

II.
Voir est qu'amors m'a estre loi mené, 
Mes mout m'est bel qu'a son plesir me maine, 
Car, se Dieu plet, encor me savra gré 
De mon travail et de ma longue paine. 
Mes paor ai que ne m'ait oublié 
Par le conseil de fausse gent vilaine, 
Dont li torz est coneûz et prouvez, 
Qu'a poine sui sans morir eschapez. 

III.
Tant ai d'amor mon fin cuer esprové 
Que ja sans li n'avrai joie certaine; 
Tant par sui mis tot a sa volenté 
Que nus travaus mon desir ne refraine
Quant plus me truis pensif et esgaré. 
Plus me confort es biens dont elle est plaine; 
Et vos, seignor, qui priez et amez, 
Fetes ensi se joïr en volez. 

IV.
Douce dame, tant m'ont achesoné 
Faus tricheor en lor parole vaine 
Que lor dehet m'ont si desconforté 
Près ne m'ont mort; Dieus lor dont maie estraine!
Mes, maugré aus, vos ai mon cuer doné, 
Plein de l'amor ki ja n'en iert lointaine; 
Tant s'est en vos finement esmerez 
Que si loiaus n'iert ja quis ne trovez. 

V.
Douce dame, car m'otroiez, por Dé, 
Un douz regart de vous en la semaine; 
Si atendrai par ceste seürté 
Joie et merci, se bons eürs la maine. 
Remembre vos que lede cruauté 
Fet qui ocit son lige home demeine. 
Douce dame, d'orgueil vos desfendez, 
Ne traïssiez vos biens ne vos biautez. 

VI
Fuiez, chançons, ja ne me regardez, 
Par mon seigneur Noblet vos en alez. 
Et dites lui de maie ore fu nez 
Qui toz jors aime et ja nen iert amez.

I.
Au renouvel de la douçour d'esté,
que resclarcist la dois par la fontainne
et tuit sunt vert bois et vergier et pré
et li rosiers en mai florist et grainne,
lors chanterai, quar trop m'avra grevé
ire et esmais que j'ai au cuer prochainne,
et fins amis a tort ochoisonez
est mout souvent de legier esfreez.
 
II.
Voirs est qu'amours m'a outre loi mené,
maiz mout m'est bel qu'a son plaisir me mainne,
quar, se Dieu plest, encor me savra gré
de mon travaill et de ma longe painne;
maiz paour ai que ne m'ait oublié
par le conseill de la fausse gent vainne,
dont li tors est couneüs et provez,
que ja sanz mort n'en quit estre eschapez.
 
III.
Douce dame, quar m'otroiez, pour dé,
un douz reguart de vous en la semainne!
Si atendrai par ceste seürté
joie d'amours, se mes eürs le mainne.
Souvieigne vous con laide cruauté
fet qui ocit son lige home demainne!
Douce dame, d'orgueill vous desfendez,
ne trahissiez vos bienz ne vos biautez!
 
IV.
Tant ai d'amours mon fin cuer esprouvé
que ja sans li n'avrai joie certainne;
tant par sui mis tout a sa volenté
que nus travauz mon desir ne refrainne;
quant pluz me truis pensif et esgaré,
pluz me confort as biens dont ele est plainne;
et vous, seigneur, qui proiez et amez,
faites ausi, se joïr en volez!
 
V.
Douce dame, mout m'ont achoisoné
faus recreant et lor parole vainne,
qu'en lonc espoir m'ont si desconforté:
prez ne m'ont mort (Diex lor doint male estrainne!);
et, maugré eus, vous ai mon cuer doné,
plain de l'amour qui ja n'en iert lontainne;
tant s'est en vous finement esmerez
qu'ainc si loiauz ne fu quis ne trouvez.
 
VI.
Fuiez, chansons, ja ne m'i reguardez!
par mon seigneur noblet vous en alez
 
VII.
et dites li de male hore fui nez
qui touz jours aim et ja n'i iere amez!
 

I.
Bel m'est quant je voi repairier 
Le tens d'esté et raverdir,
Et j'oi ces oiseaus renvoisier, 
Chascun chanter et resbaudir;
Adonques vueil merci proier 
Ma dame por cui je sospir;
Et quant ele m'i puet aidier, 
Hé las ! m'i laira donc morir?
Ahi! Amors, grant tort avez 
De moi, qui me menez a mort; 
Si ne savez por coi. 

II.
Amors, qui si avez dous non, 
Por quoi faites tel cruauté, 
De moi qui sui en vo prison, 
Quant je n'ai aillors mon pensé? 
Et car me rendez guerredon. 
Ou a tel m'eussiez livré 
Qui de moi preist raençon, 
Ainçois que m'eilst afolé. 

III.
Celé au gent cors et au cler vis 
Por cui je sui en tel dolor, 
S'ert roïne de Saint Denis 
S'averoit ele asez valor. 
Deus, com avroit gent paradis 
Qui seroit sire de s'amor! 
Mes ne sui pas de si haut pris
Que je ja aie tant d'onor.

IV.
Dame, mout grant pechié ferez 
Se me lessiez en cest torment; 
Se vostre lige home ocïez 
Mout esploiterez malement; 
Que puis l'ore que je fu nez 
D'autrui servir n'oi je talent. 
Mes cuers en est a vos alez, 
S'en faites vo conmandement. 

V.
Ne me sai mes ou conforter, 
Que j'ai mon cuer du tot a li, 
S'el ne m'en croit, viegne i garder: 
Vez, n'en a mie dedenz mi. 
Or se puet bien faire blasmer 
S'ele auques n'en a de merci. 
Car on ne vit pieça durer 
Home sens cuer longues ainsi. 

VI.
Sire Dieus, car me conseilliez, 
Ja ne puis je mes en avant; 
Ja sui je si affebloiez,
Tuit li membre me vont faillant, 
Quant a celi n'en prent pitiez 
Dont je cuidai avoir garant, 
Ne ja d'autrui n'i iere aidiez: 
Li cors faut, l'ame li conmant. 

VII.
Seignor, morz sui, sens nul refui. 
Mes je voudroie savoir bien 
S'onques ma dame en ot ennui 
Ne se il l'en pesa de rien. 
S'eleli dit: «Bien paiez sui», 
Se encore disoit: «Ça vien», 
Ou se ce non, avec Dieu sui, 
Mais je m'amaisse mout mieus sien.

I.
Biaus m'est estez quant retentist la brueille, 
Que li oisel chantent par le boschage, 
Et l'erbe vert de la rosée mueille 
Qui resplendir la fet lez le rivage. 
De bone amor vueil que mes cuers se dueille, 
Que nus fors moi n'a vers li fin corage; 
Et non pourquant, trop est de haut parage 
Cele cui j'ain; n'est pas droiz qu'el me vueille. 

II.
Fins amanz sui, coment qu'amors m'acueille, 
Car je n'ain pas com bons de mon aage, 
Qu'il n'est amis ne bons qui amer sueille 
Qui plus de moi ne truist amor sauvage; 
Ha las chaitis! ma dame a cui s'orgueille 
Vers son ami, cui dolor n'assoage? 
Merci, amors, s'ele esgarde parage, 
Dont sui je morz, mes penser que me vueille. 

III.
De bien amer amors grant sens me baille, 
Si m'a traï s'a ma dame n'agrée; 
La volonté pri Dieu que ne me faille, 
Car mout m'est bel quant ou cuer m'est entrée; 
Tuit mi penser sont a li, ou que j'aille, 
Ne rien fors li ne me puet estre mée 
De la dolor dont sospir a celée; 
A mort me rent, ainz que longues m'asaille. 

IV.
Mes bien amer ne cuit que riens me vaille, 
Car pitiez est et merciz oubliée 
Envers celi qui si grief me travaille 
Que jeus et ris et joie m'est vaée. 
Hé las, chaitis! si dure dessevraille! 
De joie part et la dolors m'agrée, 
Dont je sospir coiement, a celée; 
Si me rest bien, cornent qu'amors m'asaille. 

V.
De mon fin cuer me vient a grant mervoille 
Qui de moi est, et si me vuet ocire 
Qu'a essient en si haut lieu tessoille; 
Donc ma dolor ne savroie pas dire; 
Ensinc sui morz, s'amours ne m'i consoille; 
Car onques n'oi por li fors poine et ire, 
Mais mes sire est, si ne l'os escondire: 
Amer m'estuet, puis qu'il s'i aparoille. 

VI.
A mie nuit une dolors m'esvoille, 
Que l'endemain me toit joer et rire; 
Qu'adroit conseil m'a dit dedanz l'oroille: 
Que j'ain celi por cui muir a martire. 
Si fais je voir, mes el n'est pas feoille 
Vers son ami qui de s'amor consire. 
De li amer ne me doi escondire, 
N'en puis muer, mes cuers s'i aparoille. 

VII.
Gui de Pontiaus, Gasses ne set que dire: 
Li deus d'amors malement nos consoille.
 

I.
Biaus m'est estez que retentist la brueille,
que li oisel chantent par le boschage,
et l'erbe vert de la rousee mueille
qui resplendir la fat lés le rivage.
De bone Amour vueill que mes cuers se dueille,
car nus fors moi n'a vers li ferm corage;
et nonporquant trop est de haut parage
cele cui j'aim; n'est pas drois que me vueille.
 
II.
Fins amans sui, conment qu'Amours m'acueille,
car je n'aim pas con hom de mon eage,
qu'il n'est amis qui aint ne amer sueille
qui plus de moi ne truist amour sauvage.
Ha las, chaitis! ma dame a cui s'orgueille?
– vers son ami, cui dolour n'assouage.
Merci, Amors, s'ele esguarde parage,
donc sui je mors, més pensés que me vueille.
 
III.
De bien amer Amours grant sens me baille,
si m'a traï s'a ma dame n'agree;
la volenté pri Dieu que ne me faille,
car mout m'est bel quant u cuer m'est entree;
tout mi pens sunt a li, u que j'aille,
ne rienz fors li ne me puet estre mee
de la dolour dont souspir a celee;
a mort me rent, ainz que longues m'asaille.
 
IV.
Mes bien amers ne cuit que rienz me vaille,
quar pitiez est et mercis oublïee
envers cele qui si grief me travaille
que gieus et ris et joie m'est veee.
He las, chaitis! si dure dessevraille!
De joie part et la doleur m'agree,
dont je souspir coiement, a celee;
si me rest bien, conment qu'Amours m'assaille.
 
V.
De mon fin cuer me vient a grant mervoille,
qui de moi est, et si me vuet ocire
k'a essïent en si haut lieu tessoille;
donc ma dolour ne savroie pas dire;
ensinc sui morz, s'Amours ne mi consoille;
car onques n'oi par li fors poinne et ire,
mais mes sire est, si ne l'os escondire:
amer m'estuet, puis qu'il s'i aparoille.
 
VI.
A mie nuit une dolors m'esvoille,
que l'endemain me tolt joer et rire;
qu'a droit consoil m'a dit dedanz l'oroille:
que j'ain celi pour cui muir a martire.
Si fais je voir, més el n'est pas feoille
vers son ami qui de s'amour consire.
de li amer ne me doi escondire,
nou puis noier, mes cuers s'i aparoille.
 
VII.
Gui de Ponciaus, Gasçoz ne set que dire:
li dex d'amors malement nos consoille.
 

I.
Bien ait Amors qui m'ensaigne
e mos e chans a trover,
si que j'en doi bien chanter
quant altre rien n'i gahaigne
mes cuers qui mes fait penser,
ançois m'esprent plus d'amer,
e si me dist e semont et aonde
que je li face encor plus mais avoir;
mais Amors m'a si mis en nonchaloir
que ja ne quit que nuis biens me responde.
 
II.
Ce qu'ele m'est si estraingne
fait l'amour croistre e dobler
si que ne m'en puis torner.
Suens sui, coment que il praingne,
q'en tot cest mont n'a sa per
ne qui tant face a loer.
Bele est et gente e graile e graisse e blonde:
ce me fait plus mon desirier doloir,
mais encor cuit bone merci avoir,
s'ainc nus hom l'ot por bien amer el monde.
 
III.
Car donast or nostre Sire
que cascuns triciers e faus
fos tos torteus e tos caus,
ses porroit hom bien eslire
adés entre les loiaus,
car jo sai bien que par aus
avront sovent no vrai amant damatge.
Car pleüst or a Deu par son plaisir
che quant il doivent requerre et mentir,
qu'il ne seüssent parler en nul lengatge.
 

I.
Bien ait l'amor dont l'on cuide avoir joie 
De bien amer et servir longuement! 
Mais je n'atent fors la mort de la moie, 
Que j'ai empris d'amer si hautement, 
Et si n'i voi fors mon definement, 
Se ma dame de moi pitié ne prent, 
Ou loiautcz et Amors ne l'en proie. 

II.
S'il avenoit que, si joene et si bloie, 
De si haut pris amast si bassement, 
Espérance de guerison avroie 
De ma dolor, et des maus ke je sent; 
N'est pas ainsi, ains est tôt autrement: 
Car s'il avoit en moi valors tels cent, 
Si haute amor deservir ne porroie. 

III.
En Amors a si haute seignorie 
Qu'ele a pooir des povres enrichir; 
Por ce atent sa merci et s'aïe; 
Qu'el me puet faire en si haut point venir 
Que ja n'avront pooir de moi nuisir 
Faus losengier qui pensent de haïr 
Loial amor; c'est lor ancesserie. 

IV.
Douce dame, se j'ai dit par folie 
Nule chose dont maus doie venir, 
Ce fait Amors, qui si estroit me lie 
Que n'ai pooir de mon sens maintenir. 
Dedenz son cors vueil ellire et choisir 
Le plus fin cuer por loiaument servir 
Dont onques fust haute honor deservie. 

V.
Deservir! Dieus, qui porroit en sa vie 
Si haute emprise achever et fornir? 
Je ne di pas que ce soie je mie, 
Qu'Amors m'i fet endurer et sentir 
A ma dame les maus dont je sospir; 
Dont riens ne m'est médecine a guérir, 
S'en bien amer ne recovrois m'amie.
 

I.
Bien ait l'amor dont l'en cuide avoir joie
de bien amer et servir loiaument.
Més je n'atent fors la mort de la moie,
que j'ai enpris d'amer si hautement
et si n'i voi fors mon definement,
se ma dame de moi pitié ne prent
ou Loiautez et Amors ne l'en proie.
 
II.
S'il avenoit que si joene et si bloie,
de si haut pris amast si bassement,
esperance de garison avroie
de ma doleur et des max que je sent.
N'est pas ensi, ains est tout autrement:
car s'il avoit en moi valeurs tels cent,
si haute amor deservir ne porroie.
 
III.
En Amors a si haute seignorie
qu'ele a pouoir des povres enrichir.
Pour ce atent sa merci et s'aïe,
qu'el me puet fere en si haut point venir
que ja n'avront pouoir de moi nuisir
faus losengier qui pensent de traïr
loial amor; c'est lor ancesorie.
 
IV.
Douce dame, se j'ai dit par folie
nule chose dont max doie venir,
ce fet Amors, qui si estroit me lie
que n'ai pouoir de mon sens maintenir.
Dedenz son cors vueil ellire et choisir
me plus fin cuer por loiaument servir
dont onques fust haute heneur deservie.
 
V.
Deservir! Dex, qui porroit en sa vie
si haute enprise achever ne fornir?
Je ne di pas que ce soie je mie,
qu'Amors mi fet endurer et sentir
a ma dame les maus dont je souspir,
dont riens ne m'est medecine a guerir,
s'en bien amer ne recovroit m'amie.
 

I.
Bien cuidai toute ma vie 
Joie et chançons oblier;
Mais la contesse de Brie, 
Cui comant je n'os veer, 
M'a comandé a chanter; 
Si est bien droit que je die,
Quant li plest a comander. 

II.
Je di que c'est grans folie 
D'essaier ne d'esprover 
Ne sa moillier ne s'amie 
Tant com on la vuet amer;
Ainz se doit on bien garder 
D'enquerre par jalousie 
Ce qu'on n'i vodroit trover. 

III.
Cornent que je chant ne rie, 
Je deüsse mieus plorer, 
Quant la mieudre m'est faillie; 
Car, quant je vueil mieus parler 
Et a li merci crier, 
Lors me dist par contralie: 
«Quant irez vos outre mer?» 

IV.
Se ele est d'amors esprise, 
Malement li a membre 
Coment j'ai a sa devise 
Sens nul contredit esté; 
Mais, espoir, ce m'a grevé, 
Com ne cognoist bel servise 
Tant c'on ait autre esprové. 

V.
Aillors a s'entente mise, 
Si m'a laissié esgaré; 
Mes ja sa fiere cointise 
Ne vaincra ma loiauté. 
Ja tant ne m'avra fausé, 
Que s'ele iert de cent reprise, 
Si la prenroie je a gré. 

VI.
Bien deüsse avoir conquise 
S'amor a ma volenté, 
Por ce que j'ai sens faintise 
Toz jors loiaument amé. 
Or ne m'ait pas en vilté 
Por la fièvre qui m'a prise, 
Que j'en guerrai en esté.
 

I.
Bien cuidai toute ma vie
joie et chansons oblïer,
mais la contesse de Brie,
cui comant je n'os veer,
m'a conmandé a chanter,
si est bien drois que je die,
cant li plaist a conmander.
 
II.
Je di que c'est grans folie
d'esaier ne d'esprover
ne sa feme ne s'amie
tant con om la welt amer;
ains se doit om bien garder
d'enquerre par jalozie
ceu c'on n'i vodroit trover.
 
III.
Coment que je chant ne rie,
je deüsse melz plorer,
cant la miedre m'est faillie;
car, quant g'i veul muelz parler
et a li merci crier,
lors me dist par contrarie:
– cant ireis vos outre mer? –
 
IV.
Se elle est d'amors esprise,
malement li ait manbreit
conment j'ai a sa devise
sans nul contredit esté;
mais, espoir, ce m'a grevé,
c'on ne conoist boin servise
tant c'on ait autre esproveit.
 
V.
Aillors ait s'entente mise,
moi ait laissiet esgaré;
mais ja sa fiere contise
ne vanera ma lëauteit.
Jai tant ne m'avrait faceit,
que s'elle iert de .c. reprise,
si la prendroie j'a gré.
 
VI.
Bien deüsse avoir conquise
s'amor a ma volenteit,
por ceu ke j'ai sens faintixe
tous jors loiaulment ameit.
or ne m'ait pais an vilteit
por la fievre qui m'ait prise,
que j'en garai an esté.
 
VII.
Et sache bien de verté
que j'ai plus grant covoitise
de s'amor que de santeit.
 

I.
Cant voi l'aube dou jor venir,
nulle rien ne doi tant haïr,
k'elle fait de moi departir
mon amin, cui j'ain per amors:
or ne hais riens tant com le jour,
amins, ke me depairt de vos.
 
II.
Je ne vos puis de jor veoir,
car trop redout l'apercevoir,
et se vos di trestout por voir
k'en agait sont li enuious:
or ne hais riens tant com le jour,
amins, ke me depairt de vos.
 
III.
Quant je me gix dedens mon lit
et je resgairde en coste mi,
je n'i truis poent de mon amin,
se m'en plaing a fins amerous.
Or ne hais riens tant com le jour,
amins, ke me depairt de vos.
 
IV.
Biaus dous amis, vos en ireis,
a Deu soit vos cors comandeis.
Por Deu vos pri, ne m'oblieis.
Je n'ain nulle rien tant com vos:
or ne hais riens tant com le jour,
amins, ke me depairt de vos.
 
V.
Or pri a tous les vrais amans,
ceste chanson voixent chantant
ens en despit des medixans
et des mavais maris jalous:
or ne hais riens tant com le jour,
amins, ke me depairt de vos.
 

I.
Cant voi l'aube dou jor venir,
Nulle rien ne doi tant haïr,
K'elle fait de moi departir
Mon amin, cui j'ain per amors.
Or ne hais riens tant com le jour,
Amins, ke me depairt de vos.
 
II.
Je ne vos puis de jor veoir,
Car trop redout l'apercevoir,
Et se vos di trestout por voir
K'en agait sont li enuious.
Or ne hais riens [tant com le jour,
Amins, ke me depairt de vos].
 
III.
Quant je me gix dedens mon lit
Et je resgairde encoste mi,
Je n'i truis poent de mon amin,
Se m'en plaing a fins amerous.
Or ne hais riens [tant com le jour,
Amins, ke me depairt de vos].
 
IV.
Biaus dous amis, vos en ireis;
A Deu soit vos cors comandeis.
Por Deu vos pri, ne m'oblieis!
Je n'ain nulle rien tant com vos.
Or ne hais riens [tant com le jour,
Amins, ke me depairt de vos].
 
V.
Or pri a tous les vrais amans
Ceste chanson voixent chantant
Ens en despit des medixans
Et des mavais maris jalous.
Or ne hais riens [tant com le jour,
Amins, ke me depairt de vos].
 

I.
Chanson de plain et de souspir
et de veillier et de plorer
me couvient faire sans mentir,
que mençonge n'i quier trouver.
Je ne sai mais quel part aler
ne ou manoir ne ou fouir,
puis que la riens que plus desir
ne veut vers moi son cuer tourner.
 
II.
Bien voi qu'il me couvient mourir,
quant je ne puis merci trouver
la ou cuidoie sans faillir
toute ma joie recouvrer.
Quant qu'il couvient a bien amer
ai mis en li sans repantir;
mais ne puis ma doulour couvrir,
trop la me font Amours moustrer.
 
III.
Las, quel conseil de moy prendrai,
que je sui touz siens sans retour,
ne autre je ne servirai
fors la plus belle et la meillour
que Dieus ait en tonte s'onnour:
tout est souz lui quanque je voi.
Mais bien parra que je foloi
quant ne puis venir a s'amour.
 
IV.
N'est merveille se je m'esmay,
que assez ay ire et doulour,
si vient ma joie a grant delay
qu'a paines cuit avoir sejour.
Faus lossengier et tricheour,
vous m'avez mort, pour voir le sai,
quant de celle pour cui morrai
ne serai més amés nul jour.
 

I.
Chanter m'estuet ireement.
He las, conment porrai chanter,
quant je ne puis voër souvent
ma douce amie au biau vis cler?
Plus sui pour li en grant torment
que d'estre sanz batel en mer
et sanz nul autre garnement.
 
II.
Puis que felon m'ont tant grevé
que ne la puis voër souvent,
bien devroit mon fin cuer crever
de la grant doleur que je sent,
et si n'en os fere senblant
pour ces felons maleürez,
dont il est plus que d'autre gent.
 
III.
Onques d'amors n'oi se mal non
– ha las, conment porrai durer?
ne de ma dame guerredon
fors d'un seul petit regarder.
Las, q'ai je dit? dont n'est ce assez?
Li bons jors li soit hui donez,
qu'en tout le monde n'a sa per.
 
IV.
Ma dame, s'il ne vous fust griez,
feïssiez moi alegement.
Se vos felon m'i trouvissiez,
feïssiez moi autel senblant
con vos fere mi solïez,
si en seroit mes cuers plus liez
et si en seroit plus joianz.
 
V.
Onques si tres bele ne vi
n'onques de tel n'oï parler.
Ele a gent cors et cler le vis:
en li se porroit on mirer.
Les euz a vairs el chief assis,
ne hom qui soit de mere nez
ne vit si bele sanz fausser.
 

I.
Chanter me plest qui de joie est norriz: 
Mes par effort ne doit nus chançon faire; 
Puis ke solaz est de fin cuer partiz, 
Paine i covient, ainz qu'on li puist retraire.
Mes cil c'amors et talenz fait chanter,
De legier puet bone chançon trouver, 
Ce que nus hon ne feroit sens amer. 

II.
De fine amor est mes cuers esjoïz; 
Onques n'ama cil qui s'en puet retraire. 
Li envïeus en font pleintes et criz 
Qu'ele ne daigne a son servise atraire; 
Mes ma dame li doi je mercïer, 
Car nuit et jor me fet a li penser; 
Si ne me puet de rien tant honorer. 

III.
Quant je regart son cors et j'oi ses diz, 
Et voi son vis, toz li cuers m'en esclaire; 
Après en sui destroiz et esbahiz, 
Quant je ne puis de grant joie a chief traire; 
Et je cornent? — Quant n'oz a li parler, 
Ne n'oz voloir qu'ele le deint cuider, 
Tant me covient sa valor redoter. 

IV.
Mes granz désirs ne doit estre periz, 
Par ce m'en gart la raison de mesfaire; 
Si l'amerai, sens proier escondiz, 
Quant tant ne vail ke je li doie plaire. 
Dieus, qui li vout tant de ses biens doner, 
Que je ne l'os a seür esgarder, 
Me dont joïr de si haut désirer! 

V.
De ses valors ai en mon cuer escriz 
Tant et de teus que je nel sai retraire; 
Et quant avient que je sui endormiz, 
Solas en ai com celui qui doit plaire. 
Mes crueument le m'estuet comparer, 
Au resveiller, quant je ne puis trover 
Ce qu'en dormant m'estuet avisonner. 

VI.
Renaut, j'en sui legiers a conforter, 
Car se je muir por teus maus endurer, 
Plus vaut honors que morz ne puet grever.
 

I.
Chanters me plait qui de joie est norriz,
mais par esfort ne doit nuns chanson faire.
Puis que solaz est de fin cuer partiz,
poine i couvient, ainz qu'en li puist ratraire.
Mais cil qu'amors et talanz fait chanter
de legier puet bone chanson trover,
ce que nuns hons ne feroit sanz amer.
 
II.
De fine Amour est mes cuers esjoïz;
onques n'ama cil qui s'en puet retraire.
Li enuious en font plaintes et criz
qu'ele nes doigne a son servise atraire.
Mais ma dame doi je mout mercïer,
car nuit et jor me fait a li panser,
si ne me puet de riens tant honorer.
 
III.
Quant je resgart son cors et j'oi ses diz,
et voi son vis, toz li cuers m'en esclaire;
aprés en sui destroiz et esbahiz,
quant je ne puis ma grant joie a chief traire.
Et je comant? Quant n'os a li parler,
ne n'os voloir qu'ele le daint cuider,
tant me covient sa valor redouter.
 
IV.
Mes granz desirs n'en doit estre periz,
par ce m'en gart la raisons de meffaire;
si l'amerai, sanz proier escondiz,
quant tant ne vail que je li doie plaire.
Dex, qui li vost tant de ses biens doner
que je ne l'os a seür esgarder,
me doint joïr de si haut desirrer!
 
V.
De ses valors ai en mon cuer escriz
tant et de telx que je nel sai retraire;
et quant avient que je sui endormiz,
solaz en ai com celui qui doit plaire.
Més cruelment le m'estuet comparer
au resvoillier, quant je ne puis trover
ce qu'en dormant m'estuet avisoner.
 
VI.
Renaut, j'en sui legiers a conforter,
car se je muir por tel poinne endurer,
plus vaut honors que mors ne puet grever.
 

I.
Cil qui aime de bone volenté, 
Devroit adès estre en bone espérance
Et je, qui ai lonc tens de cuer amé, 
N'en puis avoir fors ire et grant pesance. 
Celi ne plest en cui j'ai ma fiance. 
Or me doint Dieus que je la serve en gré, 
Tant qu'ele m'ait de ma dolor geté. 

II.
Douce dame, por coi m'avez grevé?
C'onques vers vos ne fis descovenance;
Ainçois vos ai servie en leauté, 
Et servirai toz jors sens repentance. 
Por Deu vos pri qu'en aiez remembrance, 
Que me soient li mal guerredoné 
Que j'ai por vos soffert et enduré. 

III.
Tels genz i a qu'aprennent a mentir 
De bone amor, et dient vilonie: 
C'est por nient, qu'il n'en poront joïr, 
Que la bele ne les en croira mié
Ou il a tant valor et cortoisie 
Que morir cuit quant m'estuet sovenir 
De son gent cors ou ne puis avenir.

IV.
Or ne sai je que puisse devenir, 
Se fine Amors, qui m'a en sa baillie, 
Ne fet mon cuer en joie revertir; 
Pechié fera se ele ainsi m'oblie; 
Endroit de moi ne l'oblierai mie, 
Ainz sui toz siens por fere son plesir; 
Or soit en li de vivre ou de morir. 

V.
Li grant desir et li tres dous penser 
Que j'ai en vos me douent par droiture, 
Dame, que je vos doie plus amer 
Que je ne faz nule autre creature. 
S'en doiez bien vers moi estre mains dure, 
Tant que pitiez puisse amors mercier 
De moi qui sui toz vostres sens fauser. 

VI.
Chançons, di li que cil n'a d'amors cure 
Qui se peine de celés a guiler 
Ou on ne puet fors leauté trover.
 

I.
Cil qui aime de bone volenté
devroit adés estre en bone esperance,
et je qui ai lonc tens cuer amé
n'en poi avoir fors ire et grant pesance,
se li ne plaist en cui j'ai ma fiance.
Or me doint Dex que je la serve en gré,
tant qu'ele m'ait de ma dolor osté.
 
II.
Dolce dame, por coi m'avez grevé,
c'onques vers vos ne fis descovenance,
ainceis vos ai servie en lealté
et servirai toz jors senz repentance.
Por ceu lo di q'en aiez remambrance,
que me soient li mal guerredoné
que j'ai por vos soffert et enduré.
 
III.
Tels genz i a k'aprennent a mentir
de bone amor et dient vilonie.
Ceu n'a mestier: ja n'en poront joïr,
que la bele ne les en croira mie,
ou il a tant valor et cortoisie
que morir cuiz quant m'estuet sovenir
de son gent cors ou ne puis avenir.
 
IV.
Or ne sai je que puisse devenir,
se fine Amors qui m'a en sa baillie
ne fait mon cuer en joie revertir;
pechié fera se ele ensi m'oblie;
endroit de moi ne l'oblïerai mie,
ainz sui toz siens pour faire son plaisir:
or soit en li de vivre ou de morir.
 
V.
Li granz desirs et li tres dolz panser
que j'ai en vos me donnent par droiture,
dame, que je vos doie plus amer
que je ne faz nule altre creature,
s'en devez bien vers moi estre mains dure,
tant que Pitiez puisse Amors mercïer
por moi qui sui toz vostres senz falser.
 
VI.
Chansons, di li que cil n'a d'amors cure
qui se poine de celes a guiler
ou on ne puet fors lealt trover.
 

I.
Cil qui d'amor me conseille, 
Que de li doie partir, 
Ne set pas ki me resveille, 
Ne quel sont mi grief souspir. 
Petit a sens et voisdie. 
Cil qui m'en veut chastier, 
N'onques n'ama en sa vie. 
Cil fait trop nice folie, 
Qui s'entremet dou mestier 
Dont il ne se set aidier.

II.
Hé blanche, clere et vermeille, 
De vos sont tuit mi désir; 
Car faites en tel merveille 
Droiture et raison faillir. 
Quant je vos vueill a amie 
Droiz nel poroit otriier; 
Se vostre grant cortoisie, 
De gentil dousor garnie, 
Ne me deigne conseillier; 
Mar vos oi tant prisier. 

III.
Qui trop haut bée et teseille 
Maint desconfort puet oïr; 
Mes tres granz amors pareille 
Ce que li plaist a sesir; 
Sa tres haute seignorie 
Fait monter et abessier. 
Douce dame, vostre aïe! 
Celle qui m'a en baillie 
Puet bien conduire et haucier 
Mon outrageus desirier. 

IV.
Povres cuers se desconseille 
Et let de paor morir; 
Li viguereus s'apareille 
En biau confort de guérir. 
Dame, mais rien que je die 
Ne me vaut, car je sorquier; 
S'un petit de vilainie, 
Esprise de felonie, 
Vos fet pitié desvoier, 
Mar vos vi et ma mort quier. 

V.
Dedens mon cuer monte treille. 
Toute preste de florir: 
Granz amor fine et feeille 
Cui la daigneroit joïr. 
Mes amors qui n'est joie 
Ne puet cuer esleecier; 
Bien voi se mort ne chastie 
Ma volenté, m'anemie, 
Ne puis mon biau tort laissier 
Ne mon outrage changier. 

VI.
Bels Lorenz, félon, d'envie, 
Me firent joie esloignier. 
Meinte douce compeignie 
Ont a lor tort departie 
A mentir et a trichier, 
Et rien ne s'en puet vengier. 

VII.
Odins, cil cui amors lie, 
Est cheiiz en tel baillie, 
Que nus nel puet desliier, 
Se pitiez ne vuet aidier.
 

I.
Cil qui d'Amours me conseille
que de li doie partir
ne set pas qui me resveille
ne quel sunt mi grief souspir.
Petit a sens et voisdie
cil qui me veut chastoier,
n'onques n'ama en sa vie,
si fait trop nice folie
qui s'entremet du mestier
dont il ne se set aidier.
 
II.
Ha, blanche, clere et vermeille,
de vous sunt tout mi desir;
car faites en tel merveille
droiture et raison faillir.
Que je vous tieigne a amie
drois nei porroit otroier;
se vostre grant cortoisie,
plainne de bonté guarnie,
ne me deigne conseillier,
mar vous oï tant prisier.
 
III.
Povres cuers se desconseille
et lait de paour morir,
et viguereuz s'appareille
en biau confort de guerir.
Dame, maiz rienz que je die
ne me vaut, quar je sourquier;
s'un petit de vilenie,
esprise de felonie,
vous fait pitié desvoier,
mar vous vi et ma mort quier.
 
IV.
Qui trop haut bee et teseille
maint desconfort puet oïr;
maiz tres granz amours pareille
ce que li plaist a saisir:
sa tres haute seignorie
fait monter et abessier.
Douce dame, vostre aïe!
cele qui m'a en baillie
puet bien conduire et haucier
mon outrageus desirrier.
 
V.
Dedenz mon cuer monte treille
toute preste de flourir:
bone amours fine et feeille
qui la deigneroit joïr.
Maiz amours qui n'est joïe
ne puet cuer esleecier;
bien voi, se mort ne chastie
ma volenté, m'anemie,
ne puis mon biau tort leissier
ne mon outrage changier.
 
VI.
Beaus Lorenz, felon, d'envie,
me firent joie esloignier.
mainte douce conpaignie
ont a lor tort departie
a mentir et a trichier,
et riens ne s'en puet vangier.
 
VII.
Odins, cil cui Amors lie
est cheoiz en tel baillie
que nuns nel puet deslïer,
se Pitiez n'i vuet aidier.
 

I.
Cil ki toz les maus essaie 
Doit bien amer loiaument; 
Je sui cil qui ne s'esmaie 
Ne de rien ne se repent. 
Se j'ai servi en manaie, 
Cent guerredon en atent. 
S'en chant sovent. 
Nuls maus que j'en traie 
Nel me defent. 

II.
Cuidiez qu'a deduit m'atraie 
Li solaz de l'autre gent? 
Mout petit de bien m'apaic, 
Quant autre merci n'atent 
De ma dame simple et gaie,
A cui trestoz biens s'atent, 
Au douz couvent, 
Qui si me delaie 
Ne sai cornent. 

III.
De legier mepuet aprendre 
Ma douce dame a amer;
Ains que j'i vousisse atendre 
N'i cuidoie ja penser; 
Mes cuers n'i garda l'emprendre 
A coi ce deiist torner. 
Bien puis jurer 
Qu'aine nel vi d'atendre 
Desconforter.
 

I.
Cil qui touz les max essaie
doit bien amer loiaument;
je sui cil qui ne s'esmaie
ne de riens ne se repent.
Se j'ai servi en manaie,
gent guerredon en atent,
si chant souvent,
ne mal que je traie
nel me desfent.
 
II.
De legier me puet aprendre
ma douce dame a amer;
ainz que me seüsse entendre
(n'i cuidoie ja penser),
mes cuers esgarda l'emprendre,
qui ne s'en povoit torner:
bien puis jurer
qu'ainc nel vi d'atendre
desconforter.
 

I.
Compaignon, je sai tel cose
ki chanter me fait sovent:
dame plus belle que rose
ki maintient joie et jovent.
Garis est ki servir l'ose
et qui sa merite atent,
k'adés est sa chambre enclose
de tous biens entierement;
tot adés m'en resosvient:
droit a ki Amors maintient,
puis k'onours et pris l'en vient.
 
II.
Ma dame est si douce chose
ke, kant je la voi, sovent
li cuers m'en rist et repose
ens el cors plux doucement.
Maix de tant mes cuers m'oposet
ke je ne li os noiant
requerre, ke ne me chose,
car trop dout son maltalent.
Tot adés m'en resosvient:
droit a ki Amors maintient,
puis k'onours et pris l'en vient.
 
III.
Douce dame deboinaire,
tant ne mi ferés de maus,
se mi faisiés vestir haire,
si quideroie estre saus.
Tant ne mi ferés mal traire
ke ne soie plus loiaus,
car vostres clers vis m'esclaire
plus que l'estoille jornaus.
Tot adés m'en resosvient:
droit a ki Amors maintient,
puis k'onours et pris l'en vient.
 
IV.
Dame, en qui j'ai ma fiance,
car aiés merchi de moi!
ke vaut longe demourance?
Cuer et cors tot vous otroi,
car tant vous aim, douce et france,
et je bien faire le doi,
k'en vous a sens et vaillance,
beauté, honor, ensi croi.
Tot adés m'en resosvient:
droit a ki Amors maintient,
puis k'onours et pris l'en vient.
 

I.
Con cest amor me traveille et confont
ke ne me lait chanteir ne joie faire
et m'est antree ans el cors si parfont
ke a nul jor ne m'an kier a retraire,
ne je nel veul, ne ja Deus nel me donst,
ke tut li mal ke m'an vienent et vont
me sont si dous ke miels ameir me font,
et la dolors m'est douce et debonaire.
 
II.
Ma dame ains plus ke rien ke soit el mont,
mais loxangier ke ne s'an veulent taire
mi vont noisant; ja Deus ne lor pardonst,
car anuious se font d'atrui afaire.
C'est por noiant: ja mar s'an peneront,
ke tant conois les biens ki an li sont
ke ja force ne poioir nen avront
de nostre amor enpirier ne defaire.
 
III.
Je m'an vois, dame, a cor Deu vos conmant
ke vous rande les biens et la franchise
ke m'aveis fait docement en riant.
a tous jors mais iere en vostre servise,
conmant c'amors s'an pairte en sospirant.
Li departirs me fait dolor si grant
por poc mes cuers ne s'an pairt en plorant;
se fait il, lais, mais ne sai en keil guise.
 

I.
Contre le froit tans d'yver qui fraint pluie,
que fuille et flour voi mout descolorer,
li plus dou mont laisse joie et oblie,
et je sui cil qui ne puis oblïer:
touz jors ai remembrance
vers fine Amor, qui m'aprent a chanter,
et vers celi cui je n'os ma pesance
ne mon voloir autrement demostrer.
 
II.
Et se me faut que de li n'aie ahie,
je sai mout bien cui je doi plus blasmer:
mon cuer, mes eux, qui firent la folie
et qui en si haut lieu m'ont fait baer;
mais sa douce semblance
mi par plait tant quant la puis resgarder,
quant je la voi s'ai plus que rois de France,
et quant m'en part cist geus torne a plorer.
 
III.
Dame, en esmai vos sert cist las et prie
qui envers vos ne puet merci trover.
Quant conquis sui, honor n'i avez mie
de moi faire plus mal ne de grever,
car nule deffendance
n'ai envers vos fors que merci crier:
humilitez est m'espee et ma lance,
qu'amors n'est prouz c'on conquiert par mesler.
 
IV.
Sens, pris, biautez, valour et cortoisie
a plus en vos que l'en n'i puet loer,
par que mes cuers, dame, m'ocit d'envie
et si ne prent en vos fors que panser;
mais la bone Esperance,
dont joie aten, me fait en joie ester,
qu'ele set bien que vos avez poissance
quant vos plaira de ces max restorer.
 

I.
Contre tens que voi frimer 
Les arbres et blanchoier, 
M'est pris talenz de chanter, 
Si n'en eusse mestier; 
Qu'amors me fet comparer 
Ce qu'onques ne soi trichier, 
N'onques ne poi endurer 
A avoir faus cuer legier, 
Por ce ai failli a amie. 

II.
Mout par me sout bien grever 
Ce qui me deiist aidier: 
Ce est leiament amer; 
Qu'ailleurs ne me soi vengier. 
Dieus la me laist oublier 
Por estre hors de dangier! 
Neporquant, bien doi trover 
Folie quant je la quier. 
Ha! las, foleur n'est ce mie. 

III.
A tort m'ocïez, dolor. 
Que point n'en deüsse avoir, 
Mes cil qui trichent amor, 
Et servent por décevoir. 
De tant m'a fet Dieus honor. 
Dont je li doi gré savoir, 
Qu'einc ne fu hore de jor 
Que ne me feïst doloir 
Ma douce dame enemie. 

IV.
Dame, por le creator 
Créez moi, car je di voir, 
Qu'en moi n'a tant de vigor 
Que le vos face savoir. 
Al cuer en sospir et plor; 
Mes ne li daigne chaloir; 
Melz me venist ke valor 
Faillist quant l'alai veoir, 
Et biauté et cortoisie. 

V.
Ha las, je pri et reblant 
Ce ki me fera morir ; 
Qu'amors n'aloit el kerant 
Mes que me peust traïr; 
Mal bailli sont li amant 
Qu"en sa merci puet tenir ! 
De moi ne voi nul senblant 
Cornent je m'en puisse issir, 
Se pitiez ne m'en deslie. 

VI.
Amors vuet tot son talent 
De moi grever acomplir. 
Grant merveille est que j'aim tant, 
Es maus que m'estuet sofrir. 
A li m'otroi et cornant, 
Car bien le me puet merir; 
Hons qui aime en repentant 
N'en puet pas au loins joïr, 
Se d'eür n'a grant aie. 

VII.
A Guiot de Ponceaus mant 
Que nus ne puet trop servir; 
Por Deu qu'il ne s'esmait mie. 

VIII.
Gasses define son chant
Qui tos jors vuet maintenir 
Bone amor, sens tricherie.
 

I.
Contre tanz que voi frimer
les arbres et blanchoier,
m'est pris talenz de chanter
si n'en eüsse mestier;
qu'Amours me fet comperer
ce c'onques ne seu trichier,
n'onques ne peu endurer
a avoir faus cuer legier,
pour ç'ai failli a amie.
 
II.
Mout par me seut bien grever
ce qui me deüst aidier:
ce est loiaument amer;
qu'ailleurs ne me soi vengier.
Dieus le me laist oublïer
pour estre hors de dangier!
neporquant, bien doi trover
folie quant je la quier.
ha! las, folours n'est ce mie.
 
III.
A tort m'ocïez, Dolour,
que point n'en deüsse avoir,
maiz ciaus qui trichent Amour
et servent pour decevoir.
De tant m'a Diex fet honour,
dont bon gré li doi savoir,
c'ainc ne vi hore de jour
que ne me feïst doloir
ma douce dame anemie.
 
IV.
Dame, pour le Creatour
creez moi, je vous di voir,
qu'en moi n'a tant de vigour
que le vous face savoir.
Au cuer en souspir et plour;
maiz ne vous daigne chaloir;
mieus me venist que valour
faussist, quant l'alai veoir,
et biautez et cortoisie.
 
V.
Ha! las, je pri et reblant
ce qui me fera morir;
qu'Amours n'aloit el querant
maiz que me peüst trahir;
mal bailli sont li amant
qu'en sa merci puet tenir!
de moi ne voi nul samblant
conment e m'en puisse issir
se pitiez ne m'en deslie.
 
VI.
Amours veut tout son talent
de moi grever acomplir.
grant merveille est que j'aim tant
es maus que m'estuet soufrir.
A li m'otroi et conmant,
quar bien le me puet merir;
hons qui aime en repentant
n'em puet pas au loins joïr,
se d'eür n'a grant aïe.
 
VII.
A Guiot de Ponceaus mant
ke nus ne puet trop servir;
pour Dieu, k'il ne s'esmait mie.
 
VIII.
Gasses define son chant
ki tos jors velt maintenir
boenne amor sans trecherie.
 

I.
Dame, merci: se j'aim trop hautement, 
Ne me vueilliez por ma folor grever. 
Merci vos pri issi fetierement, 
Qu'il ne vos poist se je vos vueil amer; 
Qu'au sovenir me puis tant déliter 
En vo gent cors, ou il n'a qu'amender, 
Car Dieus le fist sor toz autres plus gent. 

II.
Ahi! Amors, con savez sagement 
Ceus que volez a vostre part torner; 
Qu'avant fetes a lor oès un présent, 
Qu'il ne puissent a lor cuer trestorner. 
Ainsi me fet Amors embriconner, 
Que por ma mort me fet adès penser,
La ou valors et raisons me defent.

III.
Raisons me dit et raisons me consent,
Douce dame, que je vos doie amer;
Mais vo beautez qui m'atire et esprent 
Est la raisons qui bien me puet grever; 
Car n'est pas droiz que doiez avaler 
Vostre haut pris, por moi tant alever, 
Se par pitié resons ne le consent.

IV.
Se vrais amis puet nul recovrent
En gentil cuer par loiauté trover
Donc ne doit pas Amors son jugement 
Desloiaument encontre moi fauser, 
Qu'ele doit bien par tout droit délivrer 
Ceus qu'ele voit por li embriconner, 
Quant mis i sont par son esfoxcent.

V.
Certes, dame, se j'aim trop folement, 
Nus ne m'en doit les coupes demander; 
Qu'Amors fet si de moi a son talent
Que ne me puis de riens amesurer;
Car le délit de joie desirrer 
Me done adès; et si me fet penser 
Tant que je sui hors de mon essiënt.
 

I.
Dame, merci! se j'aing trop hautement,
ne me voeilliez pour ma folour grever.
Merci vous proi et si faitierement
qu'il ne vous poist se je vous voeil amer,
que au souvenir me puis tant deliter
en vo gent cors, ou il n'a qu'amender,
car dieus le fist sur tous autres plus gent.
 
II.
Hai!, amours, com savez sagement
ceus que voulez a vos part atorner,
que avant faites a leur iex un presant
qu'il ne leur puet a leur cuer trestorner!
Ainsi me seut amours enbriconner
que pour ma mort m'a fait adés penser
la ou valours et raisons me desfant.
 
III.
Raison me dit et raison me consent
que vous doie, douce dame, honnorer;
mais vos biautez qui m'atisse et esprent
est la raison qui bien me puet grever,
car n'est pas drois que doiez avaler
vostre haut pris pour moi tant alever,
se par pitié raison ne le consent.
 
IV.
Se vrais amis puet nul recouvrement
en gentil cuer pour loiauté trouver,
dont ne doit pas amours son jugement
desloiaument encontre moi fausser,
qu'elle doit bien par tout droit delivrer
ceus qu'elle voit pour li enbriconner,
quant mis i sont par son esforcement.
 
V.
Certes, dame, se j'ain trop folement,
nulz ne m'en doit les coupes demender,
que amours de moi fet si a son talent
que ne me puis de riens amesurer,
car li delit de joie desirrer
me donne adés, et si me fait penser
tant que j'en sui hors de mon ensïent.
 

I.
De bien amer grant joie atent, 
Car c'est ma greigneur envie; 
Et sachiez bien certainement 
Qu'amors a tel segnorie 
Qu'au doble guerredon en rent 
Celui ki en li se fie; 
Et cil qui d'amer se repent 
S'est bien travailliez por noient. 

II.
Cele est de douz acointement 
Et de bone conpaignie, 
Et sage entre enuieuse gent, 
Qui de mon cuer est saisie. 
Sens et biautez en li s'estent, 
Et het toute vilenie, 
Fors que trop me greive sovent 
Qu'el ne set mie ke je sent. 

III.
Onques ne fis a escient 
Contre amor sens ne folie, 
Ainz sui a son comandement 
Et serai toute ma vie. 
Cil remaint enuieusement 
De cui amors est partie. 
Dame ce m'ensaigne et aprent 
Qu'eneurs est d'amer loiaument. 

IV.
Granz amorz ne me peut grever;
Quant plus m'ocit, plus m'agrée, 
Et melz vueil morir et amer 
Qu'un seul jour l'aie oubliée. 
Dame, ki me poëz doner 
Ma grant joie desirrée, 
Ce me fait souvent sospirer. 
Qu'enuios font enui cuider. 

V.
Dame, de toutes la nonper, 
Bele et bone, a droit loée, 
Ja ne deiissiez escouter 
Fausse gent malëurée; 
Qu'entre mentir et deviner 
Ont mainte amor destorbée, 
Qui puis ne savoit assener 
La ou ele deiist aler[.]

VI.
Dame, onques ne vos soi celer 
Mon désir ne ma pensée; 
Ainz vos aim de cuer sens fauser 
Plus que nule autre rien née; 
En vos servir et honorer 
Ai si m'amor atornée 
Que ne puis, sens merci trover, 
Ne loingz garir, ne près durer. 

VII.
Cuens de Blois, senz ensi amer 
Ne puet nus en haut pris monter. 

VIII.
Dou Barrois, vos doit remembrer 
Qu'amors fet les bons amender.
 

I.
De bien amer grant joie atent,
car c'est ma greigneur envie;
et sachiez bien certainnement
qu'Amours a tel seignourie
qu'au double guerredon en rent
celui qui en li se fie;
et cil qui d'amer se repent
s'est bien traveilliez pour noient.
 
II.
Onques ne fis a escïent
contre Amor sens ne folie,
ainz sui a son conmandement
et serai toute ma vie.
Cil remaint anuieusement
de cui Amours s'est partie.
dame si m'enseigne et aprent
qu'onours est d'amer loiaument.
 
III.
Cele est de douz acointement
et de bone conpaigne,
et sage entre anuieuse gent,
qui de mon cuer est saisie.
Senz et biautez en li s'estent,
si het toute vilenie,
fors que trop me grieve sovent;
maiz ne set mie que je sent.
 
IV.
Granz amours ne me puet grever:
quant pluz m'ocit, pluz m'agree;
et mieuz aim morir et amer
qu'un seul jor l'aie oublïee.
Dame, qui me poez doner
ma grant joie desirree,
ce me fait souvent souspirer
qu'anuious font ennui cuider.
 
V.
Dame, de toutes la nomper,
bele et bone, a droit loee,
ja ne devrïés escouter
fausse gent maleüree;
qu'a mentir et a deviner
ont mainte amour dessevree,
qui puis ne savoit assener
la u ele deüst aler.
 
VI.
Dame, onques ne vous seu celer
mon desir ne ma pensee;
ainz vous ain de cuer sanz fausser
pluz que nule autre riez nee;
a vous servir et honorer
ai si m'amour atournee
que ne puis, sanz merci trover,
ne loinz guerir, ne pres durer.
 
VII.
Quens de Blois, sanz einsi amer
ne puet nus en grant pris monter.
 
VIII.
Du Barrois vous doit remembrer,
qu'amours fet les bons amender.
 

I.
De bone amor et de loial amie
Me vient souvent pitiez et remenbrance; 
Si que jamès a nul jor de ma vie 
N'oublierai son vis ne sa semblance; 
Por ce, s'amors ne s'en vuet plus souffrir, 
Qu'ele de touz ne face à son plaisir 
Et de toutes; mes ne puet avenir 
Que de la moie aie bone espérance. 

II.
Coment porroie avoir bone esperance 
A bone amor ne a loial amie. 
Ne a vers oilz, n'a la douce semblance 
Que ne verrai jamès jor de ma vie? 
Amer m'estuet, ne m'en pois plus sofrir, 
Celi cui l'a ne venraa plaisir; 
Et si ne sai cornent puist avenir 
Qu'aie de li ne secors ne aïe. 

III.
Cornent porai avoir secors n'aie 
Vers fine amor, la ou nus n'a puissance? 
Amer me fait ce qui ne m'aime mie, 
Dont Ja n'avrai fors enui et pesance; 
Ne neli os mon corage gehir 
Celi qui tant de maus me fet sentir, 
Que de tel mort sui jugiez a morir, 
Et si ne puis veoir ma delivrance. 

IV.
Je ne vois pas querant tel délivrance 
Par quoi amors soit de moi departie; 
Ne ja nul jour n'en quier avoir puissance, 
Ainz amerai ce qui ne m'aime mie. 
Ce n'est pas droiz que jel doie gehir 
Por nul dcstroit que me fasc sentir, 
Et si n'i a confort que du morir, 
Puisque je sai que ne m'ameroit mie. 

V.
Ne m'ameroit? ice ne sai je mie; 
Mes fins amanz puet par bone atendance 
Et par sofrir conquerre haute amie; 
Mes je ne puis avoir bone fiance, 
Que cele est tels, pour qui pleing et souspir, 
Que ma dolor ne deigneroit oïr; 
Si me vaut mieus garder mon bon taisir, 
Que dire rien qui li tort a grevance. 

VI.
Ne vos doit pas trop torner a grevance 
Se je vos aim, dame, plus que ma vie. 
Que c'est la rien ou j'ai greignor fiance, 
Quant par moi seul vos os nomer amie, 
Et por ce fes meint doleros souspir, 
Que ne vos puis ne veoir ne oïr, 
Et quant vos voi, n'i a que du tesir, 
Que si sui pris que ne sai que je die.

VII.
Mes beaus conforz ne m'en porra garir, 
De vos amer ne me porrai partir, 
N'a vos parler; ne ne m'en puis tesir 
Que mon mal treit en chantant ne vos die. 

VIII.
Par Deu, Huet, ne m'en puis plus sofrir 
Qu'en ma dame est et ma mort et ma vie.
 

I.
De bone amour et de leaul amie
me vient sovant pitiez et remembrance,
si que ja mais a nul jor de ma vie
n'oblïerai son vis ne sa semblance;
pouroec, s'Amors ne s'en vuet plus sosfrir
qu'ele de touz ne face a son plaisir
et de toutes, mais ne puet avenir
que de la moie aie bone esperance.
 
II.
Coment porroie avoir bone esperance
a bone amor ne a leal amie,
ne a vairs yeuz, n'a la douce semblance
que ne verrai ja més jor de ma vie?
amer m'estuet, ne m'en puis plus sosfrir,
celi cui ja ne vanra a plaisir;
et si ne sai coment puist avenir,
qu'aie de li ne secours ne ahie.
 
III.
Coment avrai ne secors ne ahie
vers fine Amour, la ou nus n'a puissance?
amer me fait ce qui ne m'ainme mie,
dont ja n'avrai fors ennui et pesance;
ne ne li os mon corage gehir
celi qui tant m'a fait de max sentir,
que de tel mort sui jugiez a morir
dont ja ne quier veoir ma delivrance.
 
IV.
Je ne vois pas querant tel delivrance
par quoi amors soit de moi departie;
ne ja nul jor n'en quier avoir poissance,
ainz amerai ce qui ne m'ainme mie,
n'il n'est pas droiz que li doie gehir
por nul destroit que me face sentir;
n'avrai confort, n'i voi que dou morir,
puis que je sai que ne m'ameroit mie.
 
V.
Ne m'ameroit? Ice ne sai je mie;
que fins amis doit par bone atendance
et par soffrir conquerre haute amie.
Més je n'i puis avoir nulle fiance,
que cele est tex, por cui plaing et sopir,
que ma dolor ne doigneroit oïr;
si me vaut mieuz garder mon bon taisir,
que dire riens qui li tort a grevance.
 
VI.
Ne vos doit pas trop torner a grevance
se je vos aing, dame, plus que ma vie,
car c'est la riens ou j'ai greignor fiance
quant par moi seul vos os nonmer amie,
et por ce fais maint dolorous sopir
que ne vos puis ne veoir ne oïr,
et quant vos voi, n'i a que dou taisir,
que si sui pris que ne sai que je die.
 
VII.
Mes biaus conforz ne l'en porra garir;
de vos amer ne me porrai partir,
n'a vos parler, ne ne m'en puis taisir
que mon maltrait en chantant ne vos die.
 
VIII.
Par Deu, Hüet, ne m'en puis plus soffrir,
qu'en Bertree est et ma morz et ma vie.
 

I.
De la joie que desir tant 
D'Amors qui m'a a soi torné, 
Ne puis lessier que je ne chant 
Puis que ma dame vient a gré, 
En cui j'ai mis cuer et pensé, 
A trestote ma vie; 
Mes trop me font ennui de lé 
Cil cui Deus maleïe. 

II.
A tel fes joie sens talant,
Por s'amor, que de mon cuer hé: 
Félon, losengier, mesdisant 
Dont deable font tel planté 
Que trestote lor poësté 
Tornent en felonie,
Qu'ainçois sont de mal apensé 
Que l'amor soit jehie. 

III.
Petit puet lor guerre valoir 
Quant ma dame voudra amer, 
Et s'ele a talent ne voloir 
Du plus loial ami trover 
Qui soit, dont me puis je vanter 
Qu'a haute honor d'amie 
Ne porroit nus amis monter 
Por nule seignorie. 

IV.
Se longue atente et bon espoir 
Ne me font joie recovrer, 
Donc m'a Amor traï por voir, 
Qui toujours la me fait cuider; 
Mes uns vis m'en doit conforter 
Qui mainte ame a traïe; 
si sai qu'en desesperer 
A orgueil et folie. 

V.
Bele douce dame, merci 
De moi qui onc mes ne fu pris 
D'Amors, mais or m'en est ainsi, 
Qu'a toz amans m'en aatis: 
De cuer vos pri volenteïs 
Qu'en vostre compaignie 
M'acueilliez, ainz qu'il me soit pis, 
De felenesse envie. 

VI.
Dame, mout ai petit servi, 
A tel don com je vos ai quis; 
Mes mes cuers vers vos a plevi 
D'estre li plus leaus amis 
Dou mont; si le serai toz dis; 
Qu'Amor n'ai pas lessie,
Ains est tote en moi, ce m'est vis, 
Tant qu'a loial partie. 

VII.
Odin pri et mant et devis 
Que ceste chanson die 
A ceus qu'il savra ententis 
D'amer sens tricherie.
 

I.
De la joie que desir tant
d'Amors, qui m'a a soi tourné,
ne puis leissier que je chant
puiz que ma dame vient a gré,
en cui j'ai mis cuer et pensé
a trestoute ma vie;
maiz trop me font anui de lé
cil cui Diex maleïe.
 
II.
A tel faiz joie sans talent,
por s'amor, que de mon cuer hé:
felon, anuieuz, mesdisant
dont deable font tel plenté
que trestoute lor poesté
tournent en felenie,
qu'ançoiz sunt de mal apensé
que l'amour soit jehie.
 
III.
Petit puet lor guerre valoir,
quant ma dame voudra amer,
et s'ele a talent ne voloir
du plus loial ami trover
qui soit, dont me puis je vanter,
qu'a haute honeur d'amie
ne porroit nus a moi monter
pour nule seignourie.
 
IV.
Se Longue Atente et Bon Espoir
ne me font joie recovrer,
dont m'ont Amours trahi pour voir,
car touz jours le m'ont fet cuider;
maiz uns ris m'en doit conforter
qui mainte ame a trahie;
et si sai qu'en desesperer
a orgueill et folie.
 
V.
Bele douce dame, merci
de moi qui ainc maiz ne fui priz
d'Amours, maiz or m'en est einsi
qu'a tous amans m'en aatiz.
de cuer vous proi volenteïz
qu'en vostre conpaignie
m'acueilliez ainz qu'il m'en soit piz
par felenesse envie.
 
VI.
Dame, mout ai petit servi
a tel don con je vous ai quis,
maiz mes cuers m'a vers vous plevi
d'estre li pluz loiauz amis
del mont, et si serai touz dis,
qu'Amours ai si saisie
que nus n'en a point, ce m'est vis,
tant que l'aie, partie.
 
VII.
Odin proi et mant et devis
que ceste chanson die
a ciaus qu'il savra ententiz
d'amer sanz tricherie.
 

I.
De la joie que desir tant
D'amors, qui m'a a soi tourné,
Ne puis leissier que je ne chant
Puiz que ma dame vient a gré,
En cui j'ai mis cuer et pensé
A trestoute ma vie;
Maiz trop me font anui de lé
Genz, qui Dieus maleïe!

II.
A touz faiz joie sans talent,
Neis ciauz que de mon cuer hé:
Felon, anuieuz, mesdisant,
Dont deable font tel plenté
Que trestoute lor pöesté
Tournent en felenie;
Ançoiz sunt du mal apensé
Que l'amour soit jehie.

III.
Petit puet lor guerre valoir
Quant ma dame voudra amer;
Et s'ele a talent ne voloir
De plus loial ami trover
Qui soit, donc me puis je vanter
Qu'a haute honeur d'amie
Ne porroit nus a moi monter
Pour nule seignourie.

IV.
Se longue atente et bon espoir
Ne me font joie recovrer,
Donc m'ont amours trahi pour voir,
Car touz jours le m'ont fet cuider;
Maiz uns vis m'en doit conforter
Qui mainte ame a trahie,
Et si sai qu'en desesperer
A orgueill et folie.

V.
Bele douce dame, merci
De moi, qui ainc maiz ne fui priz
D'amours! Maiz or m'en est einsi
Qu'a tous amans m'en aatiz.
De cuer vous proi volenteïz
Qu'en vostre compaignie
M'acueilliez, ainz qu'il m'en soit piz
Par felenesse envie.

VI.
Dame, mout ai petit servi
A tel don con je vous ai quis,
Maiz mes cuers m'a vers vous plevi
D'estre li pluz loiauz amis
Del mont, si le serai touz dis,
Qu'amour ai si saisie
Que nus n'en a point, ce m'est vis,
Tant que l'aie [en] partie.

VII.
Odin proi et mant et devis
Que ceste chançon die
A ciaus qu'il savra ententiz
D'amer sanz tricherie.
 

I.
Des or me vueill esjoïr
En chantant, en tel maniere
Que jamès ne quier issir
De riens qu'Amours me requiere,
Que si bel m'a fait choisir
Qu'a l'un ne puis mes faillir:
Ou beau vivre, ou beau morir,
En merci et en priiere.
 
II.
Et puis qu'il vient a plesir
A la debonaire fiere,
Qu'ele mon chant daingne oïr,
Toute autre rien met ariere;
Qu'ainsi me puist bien venir,
Com je plus l'aim et desir
Que ne savroie jehir:
Com plus i pens, plus l'ai chiere.
 
III.
Et s'aucune fois m'aïr
Pour fole gent nouveliere,
Tost me covient revenir
A ma matiere premiere,
Dont ne querroie partir;
Mes tant redout lor mentir,
Que sovent me font fremir
De lor maudire en derriere.
 
IV.
Quant sa grant beauté remir,
Qui est tant fiere et entiere,
Le beau cors, qu'a grant loisir
Fist Deus en joie pleniere,
Les biaus ieus qui pour traïr
Ne sevent clore n'ovrir,
Sachez que d'a li venir
Est ma volentez maniere.
 
V.
S'el me doigne retenir,
Dies, si tres joianz en iere!
Maiz ce m'a fet esbahir
Qu'ele n'est pas costumiere
De tel guerredon merir,
N'autres ne m'en puet guerir.
Por ce ne doi acueillir
Volenté fause et legiere.
 
VI.
Hon ne se puet mieus honir
Que de son bon repentir.
Si vueill mieus en ce fenir
Ne jamais partis n'en iere.

VII.
Chançons, di mon Bel Desir
Qu'a li, s'el me daigne oïr,
N'en doit on nule aatir
D'Espaigne trusqu'en Baviere.
 
VIII.
Beaulandois, li grief sospir,
Qu'a laron fais sens dormir,
Me font volentiers guenchir
Vilainne gent, mal parliere.
 

I.
Des or me vueill esjoïr
en chantant, en tel maniere
que ja maiz ne quier issir
de rienz qu'Amours me requiere,
que si bel m'a fait choisir
qu'a l'un ne puis maiz faillir:
u bel vivre, u bel morir,
en merci et en proiere.
 
II.
Et puiz qu'il vient a plaisir
a la debonaire fiere
qu'ele mon chant deigne oïr,
toute autre rienz met arriere;
qu'einsi me puist biens venir,
com je plus l'aim et desir
que ne savroie jehir:
com pluz i pens, pluz l'ai chiere.
 
III.
Et s'aucune foiz m'aïr
pour fole gent nouveliere,
tost me couvient revenir
a ma pensee premiere,
dont ne querroie partir;
maiz tant redout lor mentir
que sovent me font fremir
de lor maudire en derriere.
 
IV.
Quant sa grant biauté remir,
qui si est fine et entiere,
le biau cors, qu'a son loisir
fist Diex en joie pleniere,
les biaux ieux qui pour trahir
ne sevent clorre n'ouvrir,
sachiez que d'a li venir
est ma volentez maniere.
 
V.
S'el me doigne retenir,
Diex, si tres joianz en iere!
maiz ce me fait esbahir
qu'ele n'est pas coustumiere
de tel guerredon merir,
n'autres ne m'en puet guerir.
Pour ce ne doi acueillir
volenté fausse et legiere.
 
VI.
L'en ne se puet mieuz honir
que de son bon repentir.
si vueill mieuz en ce fenir
ne ja mais partis n'en iere.

VII.
Chansons, di mon Bel Desir
qu'a li, s'el me deigne oïr,
n'en doit on nule aatir
d'Espaigne jusqu'en Baiviere.
 
VIII.
Gallandois, li douz souspir,
qu'a larron faiz sanz dormir,
me font volentiers guenchir
vilainne gent malparliere.
 

I.
Desconfortez, plains d'ire et de pesance,
ferai chanson contre le tens qui vient,
qu'a ma doleur n'a mestier alejance
se par chanter joie ne me revient.
tant a biautez cele pour qui me tient
li tres douz maus dont ja jor de ma vie
ne qier avoir ne confort ne aïe,
ne guerison
n'avrai ja se par li non,
car plus l'aim que je ne die.
 
II.
Mult a en li courtoisie et vaillance,
simple resgart qui trop bien li avient;
ses biaus parlers, sa simple contenance
me fet penser plus qu'a moi ne couvient.
Dex, que ferai? s'ele ne me retient
a son ami, trop iert mal conseille,
qu'ainz par autrui ne fu si bien servie
sanz traïson;
trop fera grant mesprison,
quant je l'aim, s'de m'oublie.
 
III.
Nus ne porroit contre sa mescheance
si biau servir que ja li vausist nient
més ja pour ce ne doit avoir doutance
fins cuers loiax qui bone amor maintient,
car loiautez le destraint tant q'il crient
a mesprendre envers sa douce amie;
ne je de ce ne me desconois mie,
ainz m'abandon
a fere sanz ochoison
quanqu'Amors conmande et prie.
 
IV.
– Douce dame, la plus bele de France –,
dire puis bien, – de moi ne vous souvient –,
car des l'eure que g'estoie en enfance,
li donai je mon cuer qu'ele tant tient,
si sai de voir qu'a morir me couvient,
s'el ne m'envoie du sien une partie;
se je l'avoie, je n'en morroie mie,
més guerison
avroie et trestout son bon
feroie et sa conmandie.
 
V.
Bele vaillans, doulce, cortoise et franche,
de qui valour nuit et jour me sovient,
alegiés moi pour Dieu la mesestance
que li miens cuers pour vostre amor soustient,
c'a vostre honour certes pas n'apartient
que vos faciés a nului vilonie,
et je vos sent de tele conpaignie,
de si douç non,
que j'arai mon guerredon,
s'en vos n'est pitiés faillie.
 
VI.
Por moi lo di, qui sui en tel balance
por la bele qui trop bel se maintient;
mi conpaignon, ou j'avoie fiance,
mi ont grevé, ne sai dont ce lor vient.
mult me mervoil de coi lor resovient,
n'en i at nul qui sor moi n'ait envie;
al moins font il pechié et vilonie,
que senz raison
Vont querant tel mesprison
par koi je perde m'amie.
 
VII.
Chanson, va t'en sanz nule demorance
as fins amanz, si leur di de par moi:
des mesdisanz vos envoit Dex venjance,
qui vos heent, si ne sevent pour quoi;
trop sont vilain et de mauvaise loi,
s'en prïerai Jhesus le filz Marie
Que tel mehaig leur envoit en l'oïe,
qu'el front en haut
soient seignié d'un fer chaut,
qu'i pere tonte lor vie.
 

I.
Desconfortez, plains de dolour et d'ire,
M'estuet chanter, qu'aillors n'ai ou entende.
Tout le mont voi, fors moi, joer et rire,
Ne je ne truis qui d'ennui me defende.
Cele m'ocit cui mes cuers plus desire,
S'en sui iriez, quant ele ne l'amende.
Chascuns dit qu'il aime autresi,
Por ce ne conoist on ami.
 
II.
Ele ne set mon duel ne mon martire,
Por ce m'estuet que sa merci atende;
Touz faus amanz par qui ma joie empire
Pri je a Dieu qu'en enfer les descende.
J'aim, fet chascuns: grant loisir ont dou dire,
Mais pou en voi qui a amors s'entende.
Chascuns, etc.
 
III.
De moi grever est amors costumiere;
Si me fait bien por coi de li me plaingne;
Mes a soufrir m'est la peine legiere,
Se ce li plet que a amer m'ensaingne.
Mes cuers me dit que souvent la requiere,
Si m'est noaus quant el plus me desdaigne.
Chascuns, etc.
 
IV.
Onques ne fis vers li fausse proiere,
Car je nel sai ne ja ne le m'apraingne:
La moie amors n'est mie noveliere,
Qu'il n'est fors li nule ou mes cuers remaingne.
Se plus n'i prent, l'angoisse en ai mout chiere,
Puis qu'il li plait qu'el ensi me destraigne.
Chascuns, etc.
 
V.
Cil n'aime pas qui s'en cuide retraire
Se il i voit ce qu'a merci n'aviegne;
Par Dieu, seignor, de ce ne me puis taire:
Mieus aim morir que pis m'en mesaviegne.
Car tuit li mal que j'ai me doivent plaire
Tant que ma dame en joie me maintiengne.
Chascuns, etc.
 
VI.
Conseilliez moi, dame, quil poëz faire;
S'ensi me muir ne sai mes qui me tiegne
A bone amor, dont li miens cuers s'esclaire,
Quant je vos voi, se joie m'en aviegne.
Mout me merveil qu'en franc cuer debonere
Poëz penser rien dont je morir criegne.
Chascuns, etc.
 
VII.
Douce dame por Dieu vos pri
Que je n'aie du tot failli!
 
VIII.
Gasçozes a son chant defeni,
Qui toz jors aime et n'a merci.
 

I.
Desconfortez, pleins de dolour et d'ire,
m'estuet chanter, qu'aillors n'ai ou entende.
Tout le mont voi, fors moi, joer et rire,
ne je ne truis qui d'ennui me desfende.
cele m'ocit cui mes cuers plus desire,
s'en sui iriez, quant ele n'en amende.
Chascuns dit qu'il ainme autresi,
pour ce ne conoist l'en ami.
 
II.
Ele ne seit mon duel ne mon martyre,
por ce m'estuet que sa merci atende;
touz faux amanz par cui ma joie empire
pri je a Deu qu'en enfer les descende.
J'ain, fait chascuns: grant loisir ont dou dire,
mais po en voi qui a Amors se rende.
Tuit se ventent d'amer ensi,
pour ce ne conoist l'en ami.
 
III.
De moi grever est Amors costumiere:
si me fait bien, por quoi de li me plaingne?
mais au soffrir m'est la poinne legiere,
se ce li plait que a amer m'ensaingne.
Mes cuers me dit que souvent la requiere,
mais nouauz est quant el plus me desdaingne.
Chascuns dit qu'il anme autresi,
pour ce ne conoist l'en ami.
 
IV.
Onques ne fis vers li fause proiere,
car je nel sai ne ja ne le m'apreingne:
la moie amors n'est mie noveliere,
qu'il n'est fors li nule ou mes cuers remaingne.
Se plus n'i preng, l'angoisse en est mout chiere,
puis qu'il li plait qu'ele ainsi me destreingne.
Chascuns dil qu'il ainme autresi,
pour ce ne conoist l'en ami.
 
V.
Cil n'ainme pas qui se cuide retraire
se il voit ce que a merci ne veingne;
par Deu, seignor, de ce ne me puis taire:
mieuz ain morir que pis m'en mesaveingne,
car tuit li mal que j'ai me doivent plaire
tant que ma dame en joie me maintiengne.
Chascuns dit qu'il ainme autresi,
pour ce ne conoist l'en ami.
 
VI.
Consoilliez moi, dame, quel poez faire;
s'ainsi me muir ne sai mais qui se teingne
a bone Amour, dont touz li cuers m'esclaire,
quant je vos voi, se joie m'en aveingne.
Mout me mervoil qu'en franc cuer debonaire
pouez panser riens dont je morir criengne.
Chascuns dit qu'il ainme autresi,
pour ce ne conosl l'en ami.
 
VII.
Douce dame, por Deu vos pri
que je n'aie dou tout failli!
 
VIII.
Gasses a son chant defeni,
qui touz jors sert et n'a merci. 
 

I.
Deus saut ma dame et doint honor et joie
qui d'amors m'a mon chant, renovelé.
He las! iriez et sanz amor estoie,
mais ele m'a de mon corrouz osté.
Leals Amors cui j'en doi savoir gré
tot mon anui m'a a joie torné.
Or me plaist chans et fuelle et flors d'esté,
k'Amors me fait de ma grant dolor joie.
 
II.
Liez sui je molt et bien doi avoir joie
quant ma dame m'a dit et conmandé
que je por li chant et demoigne joie,
soie merci, quant il li vient a gré.
Pues k'ele m'a de la dolor geté
ou mes fins cuers a lonc tens demoré,
Amors m'a si mon affaire atorné:
tuit mei panser sont de bien et de joie.
 
III.
Liez sui je molt et doi avoir grant joie
de vostre amor, dolce dame, en non Dé,
k'amorox sui en quel leu que je soie,
quant me sovient de vostre grant bealté,
de vostre vis cler, plain d'umelité.
Quant je vos voi et venir et aler
lors m'est avis que jaie tot trové:
or doigne Deus que de vos soit ma joie.
 

I.
Douce dame, grez et graces vous rent,
Quant il vos plaist que je soie envoisiez;
Atendu ai vostre comandement,
Si chanterai por vos joianz et liez,
Et, s'il vos plaist, de moi merci aiez.
En tel guise vos en praigne pitiez
Qu'il ne vos poist se j'aim si hautement.
 
II.
Je sai de voir que resons me defent
Si haute amor se vos ne l'otroiez;
Maiz haut et bas sont d'un contenement,
Qu'amor les a a son talent jugiez;
Siens est li bas qui por li s'est hauciez,
Et siens li hauz qui s'en est abaissiez;
Qu'a son voloir les monte et les descent.
 
III.
Je ne di pas que nus aint bassement,
Puis que d'amor est sorpris et liiez,
Honorer doit la joie qu'il atent,
S'il estoit rois, et ele iert a ses piez.
Maiz je sui, las, sor toz autres puiez,
De hautement amer a mort jugiez;
Mes mout muert bel qui fait tel hardement.
 
IV.
Par Dieu, dame, l'amors de vos m'esprent,
Qui m'occira, se vos ne m'en aidiez.
El ne fait mes qu'a son comandement,
Si li ert bel se por li m'ociez.
Et s'endroit vous est vaincue pitiez,
Moie ert la perte, et vostres li pechiez,
Que dou partir de vous n'i a nient.
 
V.
Fine biauté plesant et cors tres gent
Vos dona Dieus, dont il soit merciez.
Nus ne porroit loer si finement
Voz granz valors con vos les mostreriez,
En touz bienfèz et en toz biens proisiez;
Et s'il vous plaist honorez n'essaussiez
N'iert ja a droit qui d'amor ne l'atent.
 
VI.
Chantez, Renaut, qui antan amïez;
Or m'est avis que vos en retraiez.
Se du partir estes appareilliez,
Ja onques Deus oan ne vos ament.
 
VII.
Par Dieu, Gilet, faus amanz desloiez,
Qui d'amor s'est partiz et esloigniez,
Vaut assez plus qu'uns autres enragiez;
Chastoiez en vos et l'autre dolent.
 

I.
Douce dame, grez et grasses vous rent,
quant il vous plaist que je soie envoisiez;
atendu ai vostre conmandement,
si chanterai pour vous joianz et liez,
et, s'il vous plaist, de moi merci aiez.
En tel guise vous en prende pitiez
qu'il ne vous poist, se j'aim si hautement.
 
II.
Je sai de voir que Raisons me desfent
si haute amour, se vous ne l'otroiez;
maiz haut et bas sunt d'un contenement,
puiz que les a a son talent jugiez;
suenz est li bas qui pour li s'est hauciez,
et suens li haus qui s'en est abaissiez;
a son voloir les monte et les descent.
 
III.
Je ne di pas que nus aint bassement,
puiz que d'amours est soupris et liiez,
hounourer doit sa joie qu'il atent,
se il iert rois, et ele iert a ses piez.
Maiz je sui, las, seur touz autres puiez,
de hautement amer a mort jugiez;
maiz molt muert bel qui fait tel hardement.
 
IV.
Par Dieu, dame, l'amours de vous m'esprent,
qui m'ocirra, se vous ne m'en aidiez.
ele ne fait qu'a son conmandement,
si li iert bel se pour li m'ociiez.
Et s'endroit vous est veincue pitiez,
moie iert la perte, et vostres li pechiez,
que dou partir de vous n'i a neient.
 
V.
Fine biautè plaisant et cors tres gent
vous dona Diex, dont il soit merciiez.
Nus ne porroit loer si finement
vos granz valors come vous moustriiez
en tous bons faiz et en touz biens prisiez;
et s'il vous plaist, honorez n'essaussiez
n'iert ja a droit qui d'Amours ne l'atent.
 
VI.
Chantez, Renaut, qui antan amiiez;
or m'est avis que vous en retraiez.
Se du partir estes appareilliez,
ja onques Dieux puiz jour ne vous ament.
 
VII.
Par Deu, Gilet, faux amanz desloiez,
qui d'amors s'est partiz et esloigniez,
vaut assez pis c'uns autres enragiez;
chastoiez en vous et l'autre dolant.
 

I.
En douz tens et en bone hore
Vueill retrere ma chanson.
Mestiers est qu'or me secore
Fausse riens, a cuer felon,
A cui je ai m'atendance.
Gardez con sui en balance
Qui en atent guerredon!
 
II.
Quant de moi est au desore,
N'i a rien se merci non;
Mes trop asez me demore,
S'en doi avoir garison.
S’au darreain ne m'avance,
Donques m'a mort esperance,
En guise de traïson.
 
III.
N'os pas tot mon penser dire
Celi qui amis je sui;
Mes duels m'ocirra et ire
Se je l'aim avec autrui.
G'en parol com en faillance,
Car de dure contenance
La trovai, las, quant g'i fui.
 
IV.
Conseill quier de mon martire,
Seignor, mais ne sai a cui;
Coment puet sa joie eslire
Qui partout voit son ennui?
Mais j'ai apris des m'enfance
Une fole acoustumance,
D'amer la ou je ne dui.
 
V.
Cil est bien en aventure
Qu'amours a en son pouoir;
Toz me mis en sa mesure,
Por ma greignor joie avoir;
Mais tant dout ma mescheance,
Que je n'ai mie fiance
Que rienz me puisse valoir.
 
VI.
Li enuis qui tant me dure
M'eüst mort au mien espoir;
Mes adès me rasseüre
Et fait ma dolour voloir;
Car une douce samblance
Me dist sanz apercevance
Un mentir por decevoir.
 
VII.
Gasses de sa mesestance
Mande a Odin en France;
Pour Dieu qu'il en die voir!
 

I.
En dous tans et en bone eure
vueill retraire ma chanson.
Mestiers est qu'or me sekeure
fausse rienz, a cuer felon,
en cui je ai m'atendance.
Guardez com sui en balance
qui en atent guerredon!
 
II.
Quant de moi est au desseure,
n'i a rienz se merci non;
maiz trop d'assez me demeure,
s'en doi avoir guerison.
S’au daerrain ne m'avance,
donques m'a mort esperance,
en guise de trahison.
 
III.
N'os pas tout mon pensé dire
celi qui amis je sui;
mais duels m'ocirra et ire
se je l'aim avec autrui.
G'en parol com en faillance,
quar de dure contenance
la trovai, las, quant g'i fui.
 
IV.
Conseill quier de mon martire,
seigneur, maiz ne sai a cui;
conment puet sa joie eslire
qui par tout voit son anui?
Maiz j'ai apris des m'enfance
une fole acoustumance
d'amer la u je ne dui.
 
V.
Cil est bien en aventure
qu'Amours a en son pooir;
tous me mis en sa mesure
pour ma greigneur joie avoir;
maiz tant dout ma mescheance,
que je n'ai mie fiance
que rienz me puisse valoir.
 
VI.
Li anuis qui tant me dure
m'eüst mort au mien espoir;
maiz adés me rasseüre
et fait ma dolour voloir;
quar une douce samblance
me dist sanz aparcevance
un mentir pour decevoir.
 
VII.
Gasses de sa mesestance
mandet a Odin en France;
pour Dieu qu'il en die voir!
 

I.
En tous tans ma dame ai chiere;
en yver et en estey
m'est s'amour frache et premiere,
tous seus a sa volentei,
se ne m'an peus traire arriere,
ke trop m'i seus ans bouteis;
mon cuer ait enrasineit,
mais pais n'i voi ma santeit,
e n'ai gaires joie sovant,
mais la grignor del mont atant.
 
II.
Anui font gent noveliere,
de mort soient acoreit,
ke par lor face prïere
ont ci cest siede atorneyt
c'Amours n'est mais droituriere:
c'est coneüt et proveit
ke cil ke plus ait peneit
en ait plus petit de greit;
trop sont de dous acointemant,
plusors en ait greveit sovant.
 
III.
Simple et de bone maniere
fui cant g'i mis mon panseir,
or la truis crüele et fiere,
sans pitiet et sans bonteit,
et met çou davant darriere;
li mavais ont tot torneit
et font faillir bonteit,
s'an ai mon cuer aïreit.
Dame ki gueredon ne rans,
a tes cors ne faille a tormant.
 

I.
Fine amour et bone esperance
Me ramoine joie et chanter,
Se cele m'oste ire et pesance
Qui tant m'avra fait endurer;
Qu'ainc ne me vout guerredonner;
Pour ce ai esmai et doutance,
Se loiauté de bien amer
Ou sa granz pitiez ne m'avance.
 
II.
Ja nel tenisse a mesestance
Qu'a ma dame m'estuet penser,
Se par aucune seürance
I cuidaisse merci trouver.
Mais quant je pluz m'i doi fier
Lors i retruis male voillance
Si que je n'os a li parler,
Ains me muir en itel souffrance.
 
III.
Douce dame en cui j'ai fiance
De ma grant joie recouvrer,
Membre vous qu'en longue atendance
Me poroit amors trop grever.
Ne je ne m'en sai conforter,
Car en vos est ma delivrance;
Dame, si vos en doit membrer,
Selon vostre doulce semblance.

IV.
Dan Dieus, quant remir sa semblance,
Trestot le cuer me fet trembler,
Ni mi oil <n'>ont tant de puissance
Qu'il osent son cors regarder,
Eins les covient aillors torner,
si que n'i puis faire atendance;
Et quant li doi merci crier,
Lors me faut cuer et hardiance.

V.
Tote m'amor fine et entiere
Doing a ma dame, ligement;
Ja pour ce, s'el n'ot ma proiere,
Ne l'aim je pas mains finement.
Ce n'est pas amors autrement,
Puis qu'el va avant et arriere;
La paine en trait legierement
Qui aime d'amor noveliere.
 
V.
Icele gent fole et parliere
Nos abaisse joie et jovent;
Et fause drue noveliere,
Qui cestui laisse et autre prent.
Si voit on avenir souvent
Que la plus fole est la plus fiere;
Por ce vait amors a neent,
Que pou trove on mes qui l'ait chiere.
 

I.
Fine amours et bone esperance
me ramainne joie et chanter,
se cele m'oste ire et pesance
qui tant m'avra fait endurer,
c'ainc ne m'i vout guerredonner;
pour ce ai esmai et doutance,
se loiautez de bien amer
u sa granz valours ne m'avance.
 
II.
Ja ne tenisse a mesestance
qu'a ma dame m'estuet penser,
se par aucune asseürance
i cuidaisse merci trouver;
maiz quant je pluz mi doi fïer,
lors i retruis male vueillance,
si que je n'ose a li parler,
ainz me muir en itel soufrance.
 
III.
Douce dame en qui j'ai fiance
de ma grant joie recouvrer,
membre vous qu'en longue atendance
me porroit amours trop grever;
je ne m'en puis reconforter,
quar en vous est ma delivrance,
dame, si vous en doit membrer,
selonc vostre douce samblance.
 
IV.
Toute m'amour ferme et entiere
doins a ma dame ligement;
ja pour ce, s'el n'ot ma proiere,
ne l'amerai mainz loiaument,
quar n'est pas amours autrement:
puiz c'on vait avant et arriere,
sa painne en trait legierement
qui aimme dame nouveliere.
 
V.
Icele gent fole et ondiere
nous abaissent joie et jouvent,
et fausse drue nouveliere,
qui cestui leisse et autre prent;
si voit l'en avenir souvent
que la pluz fole est la pluz fiere;
pour ce va amours a noient,
que pou trove on maiz qui l'ait chiere.
 

I.
Fueille ne flors, ne rosée ne mente
Ne chanz d'oisel ne me puet conforter;
Ne mes cuers n'a pooir qu'il se repente
De ma dame servir et honorer.
En dolor est m'esperance finée,
Dont ma peine m'avra longue durée,
Qu'en desconfort et en lontain desir
Voi qu'Amors fait ma joie defenir.
 
II.
Bien m'est avis qu'Amors veut que je sente.
Trestoz les maus qu'ele me puet doner;
Et ma dame i met toute s'entente,
Qu'ele me veut a son pooir grever.
C'est a grant tort, se ma mort li agrée,
Car je l'aim plus que moi n'autre riens née;
Et s'il li plet, certes, bien vueil morir
Quant par ma mort la puis a gré servir.
 

I.
Foille ne flours, ne rousee ne mente
ne chans d'oisel ne me puet conforter,
ne mes cuers n'a pooir qu'il se repente
de ma dame servir et honourer.
En dolour est m'esperance finee,
dont ma painne m'avra longue duree,
qu'en desconfort et en lontain desir
voi qu'Amours fait ma joie defenir.
 
II.
Bien m'est avis qu'Amours veut que je sente
trestouz les maus qu'ele me puet doner;
et ma dame i met toute s'entente,
qu'ele me veut a son pooir grever.
C'est a grant tort se ma mort li agree,
car je l'aim pluz que moi n'autre rienz nee;
et s'il li plaist, certes, bien vueill morir,
quant par ma mort la puiz a gré servir.
 

I.
Gasse, par droit me respondez,
De vos le me couvient oïr,
Se je me sui abandonnez
Loiaument a amor servir,
Et cele me vueille traïr
A qui m'estoie abandonez.
Dites moi, lequel me loez,
Ou del atendre, ou del guerpir?
 
II.
– Sire, n'en sui pas esgarez,
De ce sai bien le mieus choisir:
Se finement de cuer amez,
Et loial sont vostre desir,
N'i a nïant del repentir,
Mais a vostre pooir servez;
Nuls n'iert ja tant d'amor grevez,
Qu'elle ne poist cent tans merir.
 
III.
– Qu'est ce, Gasse, estes vous desvez?
Me volez vos afolatir?
Ceste amor, que vous me loez,
Devroit touz li mondes haïr.
Touz jours amer, et puis morir!
Vilainement me confortez.
Quant je ai les maus endurez,
Lors en devroie bien joïr.
 
IV.
– Sire, por Dieu, or entendez.
A droit et raison maintenir,
Cuers qui bien est enamorez,
Coment puet il d'amor partir?
Nes que je puis blons devenir,
N'en poroit il estre tornez.
Se vos plest, de ce me creëz:
Qu'ami traï muerent martir.
 
V.
– Gasse, bien sai que vous pensez,
Mes amor lais a covenir;
Ne sui pas si amesurez,
Que je plus li vueille obeïr;
Ne poroie plus consentir
Ses felenesses cruautez,
Et vos qui goute n'i veëz,
Ne vos en savez revenir.
 
VI.
– Sire, onc mes puis que je fui nez,
Ne vos vi de riens esbahir;
Ou la raison ne m'escoutez,
Que le voir ne volez oïr.
Coment se puet avelenir
Fins cuers et loiaus volentez?
Laidement vers amor fausez,
S'einsi vos en volez partir.
 
VII.
– Gasse, si fais quant je m'aïr:
Touz est li gens cors oubliez,
Et ses dous vis fres colourez;
Ja ne quier mes que j'en sospir.
 
VIII.
– Sire, mout a vilain loisir
Fins amis haïz ou amez,
Se il est d'amors sormenez,
S'il por ce la veut relenquir.
 

I.
– Gasse, par droit me respondez;
de vous le me couvient oïr:
se je me sui abandonnez
loiaument a Amour servir,
et celle me vueille traïr
a qui je m'estoie donnez,
dites moi le quel me loez,
ou de l'atendre ou del guerpir.
 
II.
– Sire, n'en sui pas esgarez;
de ce sai bien le miex choisir.
se finement de cuer l'amez
et loial sont vostre desir,
n'i a noient del repentir.
Més outre vo pooir servez:
nulz n'iert ja tant d'Amours grevez
qu'ele ne puist cent tans merir.
 
III.
– Qu'est ce, Gasse? Estes vous desvez?
Me volez vous afolatir?
Ceste amour que vous me loez
devroit tous li mondes fuïr.
Tous jours amer et puis morir!
Vilainement me confortez.
Quant j'en ai les maulz endurez,
dont deveroie bien joïr.
 
IV.
– Sire, pour Dieu, or entendez
a droit et reson maintenir!
Cuers qui bien est enamourez
comment puet il d'amours partir?
Nes que je puis blons devenir
n'en porroit il estre tournez.
S'il vous plest, de ce me creez:
ami traï muerent martir.
 
V.
– Gasse, bien sai que vous pensez;
més Amours lais a couvenir.
Ne sui pas si amesurez
que je plus le vueille obeïr.
Ne porroie plus consentir
les felenesses cruautez,
et vous, qui goute n'i veés,
ne vous en savez revenir.
 
VI.
– Sire, one mais puis que je fui nez
ne vous vi de riens esbahir,
ou la raison me mescontez,
que le voir ne volez jehir.
Comment se puet avilonnir
fins cuers et loiaux volentez?
Laidement vers Amours faussez,
s'ensi vous en volez partir.
 
VII.
– Gasse, si fais quant je m'aïr.
tous est li gens cors oublïez
ma dame et ses vis colourez;
ja ne quier mais que j'en soupir.
 
VIII.
– Sire, moult a vilain loisir
fins amans haïs ou amez,
se il est d'Amours sourmenez,
s'il pour ce la veult relenquir.
 

I.
Grant pechié fet qui de chanter me prie,
Car sanz reson n'est pas droiz que je chant,
Qu'onques ne fis chanson jor de ma vie,
Se fine amor nel m'enseigna avant.
Mais par leur gré chanterai sanz talant,
Einsi com cil qui par acostumance
Fet tel chançon ou n'a fors contenance.
 
II.
Je ne di pas c'amours se soit partie
De mon fin cuer, ja ne vive je tant!
Mais losengier et felon plein d'envie
M'ont grant mal fet, bien est aparissant;
Souvent me font membrer en sospirant:
Qu'onc Deus ne fist si cruel desevrance
Come de joie et de douce acointance.
 
III.
Je sai de voir, se de loial amie
Peüsse avoir de joie un bel semblant,
Que j'ai un cuer qui de legier oublie
Ire et travail; et fause, en decevant,
Trop longuement m'a trouvé sanz garant;
Tolu m'avoit mon cuer par mescheance,
Mes rescos l'ai a paine et a grevance.
 
IV.
Car quant recort la douce conpaignie
Et les deduis dont je sueil avoir tant,
Donc n'a el mont chose si esbahie
Conme est mes cuers que j'ai triste en pensant.
Donc pens et di que mal vive je tant!
Qu'amors me vout alegier ma grevance,
Et chascun jor double ma mesestance.
 
V.
Volage cuer et ondiere folie
Ont maint anui fet a loial amant:
Avoir cuidai joieuse conpaignie,
Par lonc travaill, amoureuz desirrant;
Maiz losengier par furent si poissant
Qu'il m'ont tolu ma loial esperance
De la grant joie u j'avoie fiance.
 
VI.
Outrage ont fet orgueill et felenie
Qui se sunt mis en la pluz avenant
Qui onques fust a ami anemie,
Et qui pluz a biauté douce et pleisant.
Merveilles faiz quant je vois ramembrant
Sa grant biauté ou je n'ai mais fiance,
N'en nul confort ne truis ma delivrance.
 

I.
Grant pechié fait qui de chanter me prie,
car sanz raison n'est pas drois que je chant,
qu'onques ne fis chanson jour de ma vie,
se fine Amours nel m'enseigna avant.
Maiz pour leur gré chanterai sanz talant,
ausint com cil qui par acoustumance
fait tel chanson u n'a fors contenance.
 
II.
Je ne di pas c'amours se soit partie
de mon fin cuer, ja ne vive je tant!
Maiz losengier et felon et envie
m'ont trop mal fet, bien est apparissant;
sovent me font membrer en souspirant
c'ains Diex ne fist si cruel dessevrance
conme de joie et de douce acointance.
 
III.
Je sai de voir, se de loial amie
peüsse avoir de joie un bel samblant,
que j'ai un cuer qui de legier oublie
ire et travaill et fausse decevant
qui longuement m'a trové sanz guarant;
tolu m'avoit mon cuer par mescheance,
maiz rescous l'ai a painne et a grevance.
 
IV.
Car quant recort la douce conpaignie
et les deduis dont je sueil avoir tant,
donc n'a el mont chose si esbahie
conme est mes cuers que j'ai triste en pensant.
Donc pens et di que mal vive je tant
qu'Amours me vout alegier ma grevance,
et chascun jor double ma mesestance.
 
V.
Volage cuer et ondiere folie
ont maint anui fet a loial amant:
avoir cuidai joieuse conpaignie,
par lonc travaill, amoureuz desirrant;
maiz losengier par furent si poissant
qu'il m'ont tolu ma loial esperance
de la grant joie u j'avoie fiance.
 
VI.
Outrage ont fet orgueill et felenie
qui se sunt mis en la pluz avenant
qui onques fust a ami anemie,
et qui pluz a biauté douce et pleisant.
Merveilles faiz quant je vois ramembrant
ses granz valors u je n'ai maiz fiance,
n'en nul confort ne truis ma delivrance.
 

I.
Ire d'amour qui en mon cuer repaire 
Ne me lest tant que de chanter me tiengne.
Grant merveille est se chançon en puis traire, 
Ne je ne sai dont l'ocheson me viengne; 
Car li désirs et la grant volentez, 
Dont je sui si pensis et esgarez, 
M'ont si mené, ce vous puis je bien dire, 
Qu'a paines sai conoistre joie d'ire. 

II.
Et nonporquant, touz li cuers m'en esclaire 
D'un dous espoir, Dieus doint que il aviengne! 
Mout par devroit a ma dame desplaire 
Se ceste amour m'ocist; bien l'en coviengne! 
Mort m'a ses cors, li genz, li acesmez, 
Et ses douz vis freschement colorez, 
Et sa biautez dont il n'est riens a dire; 
Dieus, pour qu'en et tant a moi desconfire? 

III.
Irié me font celé gent de male aire 
Plus que nus maus que por amour sostiengne; 
Mes ne lor vaut: que ja ne porront faire 
Qu'amours ne m'ait et qu'au cuer ne me tiengne; 
Si loiaument me sui a li donez 
Que sens morir n'en serai desevrez. 
Nes qu'on se puet vers amour escondire 
Ne puet on pas loial amie eslire? 

IV.
Loial desir, dont j'ai plus de cent paire, 
M'ocirront voir, ainz que ma joie viengne 
Qui touz jors m'est pramise pour atraire : 
Mes je ne cuit qu'a ma dame en soviengne, 
Ou Dieus a mis tant valours et bontez; 
Mes envers moi s'est tant orguels mellez 
Que n'ai pooir de tel mort contredire, 
Puis que mes cuers se veut por li ocire. 

V.
Tres grans amours me fet folie faire, 
Si ai paour que longues ne me tiengne; 
Mes je n'en puis mon corage retraire, 
Ensi me plaist, conment qu'il m'en aviengne. 
Par tel reson sui povres asasez 
Quant je plus vuel ce dont sui plus grevez, 
Et en esmai m'estuet joer et rire; 
Ainc mes ne vi si décevant martire. 

VI.
Ha! cuens de Blois, vous qui fustes amez, 
Tiengne vous en et vous en remembrez, 
Car qui d'amer oste son cuer et tire, 
Aventure iert s'il grant honor desire.

I.
Ire d'amors qui en mon cuer repere
ne mi let tant que de chanter me tiengne.
Grant merveille est se chanson en puis trere,
ne je ne sai dont l'acheson me viengne,
car li desirs et la grant volentez,
dont je sui si pensis et esgarez,
m'ont si mené, ce vos puis je bien dire,
qu'a paine sai quenoistre joie d'ire.
 
II.
Et neporquant, touz li cuers m'en esclere
d'un bon espoir; Dex dont que il aviengne!
mout par devroit a ma dame deplere
se ceste amor m'ocit; bien l'en couviengne!
mort m'a ses cors, li genz, li acesmez,
et ses douz vis freschement colorez,
et sa biautez dont il n'est riens a dire.
Dex, por qu'en ot tant a moi desconfire?
 
III.
Irié me font cele gent de male aire
plus que nus mals que por Amors soustiengne;
més ne lor vaut: ja ne porront deffaire
qu'Amors ne m'ait et q'au cuer ne me tiengne.
Si fetement me sui a li donez
que ja sanz mort n'en cuit estre tornez.
Puis q'ons se puet vers Amors escondire,
nel doit l'on pas a fins amis eslire?
 
IV.
Loial desir, dont j'ai pius de .c. pere,
m'ocirront voir, ainz qu'en la joie viengne
qui toz jorz m'est pramise por atrere;
més je ne cuit qu'a ma dame en souviengne,
cui Dex dona valeur et trop biautez.
més contre moi si est orguels mellez,
si n'ai pouoir de tel tort contredire
puis que mes cuers me veut por li ocirre.
 
V.
Tres grant amor me fet folie fere,
si ai peür que longues la maintiengne;
més je n'en puis mon corage retrere.
Issi me plest, conment q'il m'en aviengne.
Par tel reson sui povres asazez
quant je plus vueil ce dont plus sui grevez,
et en l'esmai m'estuet joer et rire:
onc més ne vi si decevant martire.
 
VI.
Ha! quens de Blois, vos qui fustes amez,
tiengne vos en si vos en remenbrez,
car qui d'amors oste son cuer et tire,
aventure ert se grant heneur desire.
 

I.
Ire d'amors, anuis et mescheance
m'ont teil moneit, ne sai maix ke penseir;
si m'est torneis duels en acostumence
c'a resjoïr ne me sai retorner,
et quant je chant et me cuit conforteir,
ma grans dolors me vient en remenbrence:
perde [d'] amors ke ne puis oblieir.
 
II.
Si grief chans fais et a pouc de plaissence,
a merveille nel doit on atorneir.
Quant cuers se duelt et cors ait mesestance,
malvaixement puet joious chant troveir
ki per[t] espoir; joie ne seit moneir.
Morte est amors lai ou fault esperance,
dont joie estuet faillir et desclineir.
 
III.
En bone Amor, ou j'ai si grant fiance
ke je ne sou mon damaige eschivier,
grans seürteis met home en sorcuidance,
et cil est fols ki ne dagne douteir.
Ki haute Amor sert, muels se doit gairdeir;
com muels en est mu[e]ls gairt s'acoentance;
pertie amor e[s]t griés a rasembleir.
 
IV.
Pertenopés nous moustre sens doutance
perde d'amors est gris a andureir.
Li maltalent d'amors et la pesence,
ki n'ait sentit les duels ne seit ameir.
Amors se veult servir et honoreir.
k'an veult joïr, gairt soi de mesprenance:
mefais d'amours ne fait a perdoneir.
 
V.
Haute Amor ait desdaig et grant viltance,
quant a[s] siens voit ces comans refuseir:
per Gingamur en avons la provence.
[...].
 

I.
Iriez et destroiz et pensis
Chanterai amorosement,
Que contre mon cuer l'ai empris;
A pou que je ne m'en repent!
Car qui savroit le grief torment
Dont la nuit et le jor me sent,
Por fine amour veraie,
De voir savroit qu'a son grant tort m'essaie.
 
II.
Deus! tant m'avra cist maus sopris,
S'en garrai, si ne sai coment;
Et se je muir leaus amis
Gariz sui honoréement;
Et s'en morant ma joie atent,
Je l'atendrai mout bonement,
Quel que mal que j'en traie.
Bien ait dolor qui si grant joie apaie!
 
III.
En maintes menieres devis
Ma joie, mes trop me vient lent;
Se j'en fusse poesteïs
Sachez qu'il alast autrement;
Car quant plus a amer entent
Amor me grieve plus forment;
Sens nul bien que j'en aie;
Fors seulement esperance m'espaie.
 
IV.
Onques ma dame ne requis
Riens outre son comandement;
Mes ses gens cors et ses clers vis
Et sa grans valors me defent
Que je n'aie fol hardement
De prier ainsi hautement;
Ainz atendrai manaie.
Deus, que ferai, se s'amor me delaie!
 
V.
Mout i ai eüz enemis
Faus et crueus vilainement;
Car plus dout et ferai toz dis
Lor ennui qu'autrui hardement,
Car plus aiment decevenment.
Li traïtres qui jure et ment
Ocit plus tost sens plaie
Que li hardiz qui en valor s'essaie.
 
VI.
Sire, se ma vie me rent
Cele qui m'a mort longuement,
A son oés revivroie;
Cil ne vit pas, cui granz ire maistroie.
Sire, por Deu, priez li que m'en croie.