[c. 64va]
 |
De nouuiau mestuet chanter ou tens que plus sui marris q(ua)nt ne puis merci trouer bien doi chant(er) aenuiz. ne ie nos a li parler de ma chan con faz message que tant est cortoise (et) Se pois se oubli sage que ne puis aillors penser. er sa biau te (et) ses bons diz (et) son tres douz esgarder bien poisse estre garis mes nen puis mo(n) cuer oster tant i pens de fin corage espoir sai fait g(ra)nt folaige mes moi couient en |
[c. 64vb]
 |
durer Chascuns dit qui muert damors mes ie nen quier ia morir mielz aim sos frir ma dolor uiure (et) atendre (et) languir quele me puet bien merir mes max (et) ma (con)sirree. naime pas adroit qui bee q(ue) len porroit auenir. Dame qui a grant paor souuent lestuet esbahir (et) penser a tel folor dont ie ne me puis tenir sil est a uostre plaisir siert b(ie)n ma peine sauuee que seul de la desirree me fait mon cuer resbaudir. Nus ne puet grant ioie auoir sil nera des max apris qui toz iors fait son uoloir apaine ert ia fins amis por ce fait amors doloir q(ue)le uelt guerredon rendre caux qui bien seuent atendre (et) seruir a son uoloir. Dame dex tot mon pooir mo tro auos sanz (con)tendre que sanz uos ne me puet rendre nus bien ne ne quier a uoir. |