| G Aucelms faiditz si fo dun borc que a nom userta. q(ue) es deleueschat de lemozin. e fo fills dun borzes. echanta ua pieitz domen del mon. efetz mout bos sons ebons motz. e fetz se ioglars per o chaion que el perdet aioc tot son auer hom fo que ac mout gran larguessa. e fo mout glotz demaniar e debeure. e p(er)so el uenc gros outra mesura. Mout fo longa sazon desastrucs de dons edo nor aprendre que plus de .xx. ans anet ape p(er)lomon que el ni sas chanssos non eron uolgudas ni grazidas. epres p(er) moiller una soudadieira qel menetab se lonc temps p(er) cortz. que avia nom Guillelma monia. fort fo bella eben en seignada. euenc grossa cum era el. Et ella fo dun ric borc que a nom elest de la marca deproenssa. qes dela seignoria den bernat dandusa. E misier lo mar ques demonferrat bonifacis lo mes pois en auer et en raubas (et) en gran pretz lui esas chanssons. |
Gaucelms Faiditz si fo d’un borc que a nom Userta, que es de l’eveschat de Lemozin; e fo fills d’un borzes. E chantava pieitz d’omen del mon, e fetz mout bos sons e bons motz. E fetz se ioglars per ochaion que el perdet a ioc tot son aver. Hom fo que ac mout gran larguessa, e fo mout glotz de maniar e de beure; e per so el venc gros outra mesura. Mout fo longa sazon desastrucs de dons e d’onor a prendre, que plus de .xx. ans anet a pe per lo mon, que el ni sas chanssos non eron volgudas ni grazidas. E pres per moiller una soudadieira, q’el menet ab se lonc temps per cortz, que avia nom Guillelma Monia. Fort fo bella e ben enseignada, e venc grossa cum era el. Et ella fo d’un ric borc que a nom Elest de la Marca de Proenssa, q'es de la seignoria d’En Bernat d’Andusa. E misier lo marques de Monferrat Bonifacis lo mes pois en aver et en raubas, et en gran pretz lui e sas chanssons. |