I.
Ahi! Amors, com dure departie 
Me convenra faire de la millor 
Ki onques fust amee ne servie! 
Dieus me ramaint a li par sa douçour, 
Si voirement con j'en part a dolor! 
Las! k'ai je dit? ja ne m'en part je mie! 
Se li cors va servir Nostre Signor, 
Mes cuers remaint del tot en sa baillie.

II.
Por li m'en vois sospirant en Surie, 
Car je ne doi faillir mon Creator. 
Ki li faura a cest besoig d'aïe, 
Saiciés ke il li faura a grignor; 
Et saicent bien li grant et li menor 
Ke la doit on faire chevallerie 
Ou on conquiert Paradis et honor 
Et pris et los et l'amor de s'amie.

III.
Dieus est assis en son saint iretaige; 
Ore i parra con cil le secorront 
Cui il jeta ce la prison ombraje, 
Quant il fu mis ens la crois ke Turc ont. 
Honi soient tot chil ki remanront, 
S'il n'ont poverte ou viellece ou malaige! 
Et cil ki sain et jone et riche sont 
Ne poevent pas demorer sans hontaige.

IV.
Tot li clergié et li home d'eaige 
Qui ens ausmogne et ens biens fais manront 
Partiront tot a cest pelerinaige, 
Et les dames ki chastement vivront 
Et loiauté feront ceaus ki iront; 
Et s'eles font par mai consel folaige, 
A lasques gens mauvaiscs le feront, 
Car tot li boin iront en cest voiaige.

V.
Ki chi ne velt avoir vie anuieuse 
Si voist por Dieu morir liés et joieus, 
Car cele mors est douce et savereuse 
Dont on conquiert le resne presïeus, 
Ne ja de mort n'en i morra uns sels, 
Ains naistront tot en vie glorïeuse; 
Et saiciés bien, ki ne fust amereus, 
Mout fust la voie et boine et deliteuse.

VI.
Dieus! tant avons esté preus par huiseuse, 
Or i parra ki a certes iert preus; 
S'irons vengier la honte dolereuse 
Dont chascuns doit estre iriés et honteus; 
Car a no tans est perdus li sains lieus 
Ou Dieus soffri por nos mort angoisseuse. 
S'or i laissons nos anemis morteus, 
A tos jors mais iert no vie honteuse.
 

I.
Au conmencier de ma nouvele amor 
ferai chanson, car pris m'en est talent; 
si prïerai ma dame, qui j'aor, 
a qui je sui du tout obediant. 
Pour Dieu li pri qu'el ne soit desdaignant; 
ainz doit vouloir que de moi soit servie, 
si en serai plus liez toute ma vie.

II.
Ce ne me doit nus tenir a folor, 
se je desir estre son bienvoillant, 
puis que biauté fist de li mireor 
et en touz biens sont si entendement. 
Deus, tant serai renvoisiés et joiant, 
se ja nul jor envers moi s'umilie 
que par son gré l'ose apeler amie.

III.
Tant me delis en l'espoir qu'en li ai 
si doucement q'il m'est souvent avis 
qu'ele m'otroit s'amor de cuer verai; 
mes tost me rest cil douz espoir failliz. 
De poor sui iriez et esbahis 
et dout reson, se ele i met s'entente; 
sanz estre amez cuit morir en atente.

IV.
Et nepourquant touz jorz la servirai, 
sanz fausseté, conme loiaus amis, 
car mes fins cuers ne doit estre avec moi, 
puis que il s'est en si haut lieus assis; 
ainz doit penser conment soit deserviz 
li tres grant bien ou il m'a mis s'entente, 
ne ja por mal q'il ait ne s'en repente.

V.
Il m'est avis, qui a droit veut jugier, 
que nus ne doit de bone Amour partir, 
qu'en pou d'eure rent ele tel loier 
que nus n'avroit povoir de deservir. 
Pour ce la vueil bonement obeïr 
et vueil proier a ma dame honoree 
qu'avec biautez soit pitiez assenblee.

VI.
Quens de Ghelre, rienz ne puet avancier 
tant com amours celui qui a lui bee; 
entendez i, s'iert vostre honor doublee.
 

I.
Belle doce Dame chiere, 
Vostre grans beautés entiere 
M'a si pris 
Ke, se iere em Paradis, 
Si revenroie je arriere, 
Por convent ke ma proiere 
M'eüst mis 
La ou fuisse vostre amis 
Ne vers moi ne fuissiés fiere, 
Car ainc ens nule maniere 
Ne forfis 
Par coi fuissiés ma guerriere.

II.
Ne lairai ke je ne die 
De mes maus une partie 
Come irous. 
Dehaiz ait cuers covoitos, 
Fausse, plus vaire ke pie, 
Ki m'envoia en Surie! 
Ja por vous 
N'avrai mais les ieus plorous. 
Fous est ki en vous se fie, 
Ke vos estes l'Abeïe 
As Soffraitous, 
Si ne vous amerai mie.
 

I.
Bien me deüsse targier 
De chanson faire et de mos et de chans, 
Quant me convient eslongier 
De la millor de totes les vaillans, 
Si em puis bien faire voire vantance, 
Ke je fas plus por Dieu ke nus amans, 
Si en sui mout endroit l'ame joians, 
Mais del cors ai et pitié et pesance.

II.
On se doit bien efforchier, 
De Dieu servir, ja n'i soit li talans, 
Et la char vaintre et plaissier, 
Ki tos jors est de pechier desirans; 
Adont voit Dieus la doble penitance. 
Hé! las, se nus se doit sauver dolans, 
Dont doit par droit ma merite estre grans, 
Car plus dolans ne se part nus de France.

III.
Vous ki dismés les croisiés, 
Ne despendés mie l'avoir ensi; 
Anemi Dieu en seriés. 
Dieus! ke porront faire si anemi, 
Quant tot li saint trambleront de dotance 
Devant Celui ki onques ne menti! 
Adont seront pecheor mal bailli, 
Se sa pitiés ne cuevre sa poissance.

IV.
Ne ja por nul desirier 
Ne remanrai chi avoc ces tirans, 
Ki sont croisiet a loier 
Por dismer clers et borgois et serjans; 
Plus en croisa covoitiés ke creance. 
Et quant la crois n'en puet estre garans, 
A teus croisiés sera Dieus mout soffrans, 
Se ne s'en venge a peu de demorance.

V.
Li Quens s'en est ja vangiés, 
Des haus barons, qui or li sont faillit. 
C'or les eüst anpiriés, 
Qui sont plus vil que onques mais ne vi! 
Dehait li bers qui est de tel sanblance 
Con li oixel qui conchïet son nit! 
Po en i a n'ait son renne honi, 
Por tant qu'il ait sor ses homes possance.

VI.
Qui ces barons empiriés 
Sert sans eür, ja n'ara tant servi 
K'il lor em prenge pitiés; 
Pour çou fait boin Dieu servir, ke je di 
Qu'en lui n'afiert ne eür ne kaance; 
Mais ki mieus sert, et mieus li est meri. 
Pleüst a Dieu k'Amors fesist ausi 
Ensvers tos ceaus qui ens li ont fiance.

VII.
Or vos ai dit des barons ma sanblance; 
Si lor an poise de ceu que je di, 
Si s'an praingnent a mon mastre d'Oissi, 
Qui m'at apris a chanter tres m'anfance.
 

I.
Chançon legiere a entendre 
Ferai, car bien m'est mestiers 
Ke chascuns le puist aprendre 
Et c'on le chant volentiers; 
Ne par autres messaigiers 
N'iert ja ma dolors mostree 
A la millor ki soit nee.

II.
Tant est sa valors doblee 
C'orgeus et hardemens fiers 
Seroit, se je ma pensee 
Li descovroie premiers; 
Mais besoins et desiriers 
Et çou c'on ne puet atendre 
Fait maint hardement emprendre.

III.
Tant ai celé mon martire 
Tos jors a tote la gent 
Ke bien le devroie dire 
A ma dame solement, 
K'Amors ne li dit noient; 
Ne por quant, s'ele m'oblie, 
Ne l'oublierai je mie.

IV.
Por quant, se je n'ai aïe 
De li et retenement, 
Bien fera et cortoisie 
S'aucune pitiés l'em prent. 
Au descovrir mon talent 
Se gart bien de l'escondire, 
S'ele ne me velt ochirre.

IV.
Fols sui ki ne li ai dite 
Ma dolor, ki est si grans. 
Bien deüst estre petite 
Par droit, tant sui fins amans; 
Mais je sui si meschaans 
Ke quanques drois m'i avance 
Me retaut ma mescheance.

V.
Tous i morrai en soffrance, 
Mais sa beautés m'est garans, 
De ma dame, et la samblance 
Ki tos mes maus fait plaisans, 
Si ke je muir tous joians; 
Ke tant desir sa merite 
Ke ceste mors me delite.

VI.
Noblet, je sui fins amans, 
Si aim la millor eslite 
Dont onques cançons fust dite.
 

I.
L'autrier un jor aprés la Saint Denise 
Fui a Betune, ou j'ai est sovent. 
La me sosvint de gent de male guise 
Ki m'ont mis sus mençoigne a entïent: 
Ke j'ai chanté des dames laidement; 
Mais il n'ont pas ma chanson bien aprise: 
Je n'en chantai fors d'une solement, 
Qui bien forfist ke venjance en fu prise.

II.
Si n'est pas drois ke on me desconfise, 
Et vous dirai bien par raison coment: 
Car se on fait d'un fort larron justise. 
Doit il desplaire as loiaus de noient? 
Nenil, par Diu! qui raison i entent; 
Mais la raisons est si arriere mise 
Ke çou c'on doit loer blasment la gent 
Et loent çou que nus autres ne prise.

III.
Dame, lonc tans ai fait vostre servise, 
La merci Deu! c'or n'en ai mais talant, 
Que m'est ou cuer une autre amor assise 
Que me requiert et alume et esprant 
Et me semont d'amer si hatement, 
C'an li n'en a ne orgoil ne faintise; 
Et jel ferai, ne puet estre autrement, 
Si me metrai dou tout an sa franchise.

IV.
A la millor del roiaume de France, 
Voire del mont, ai mon cuer atorné, 
Et non por quant pavor ai et dotance 
Ke sa valors ne me tiegne en vilté, 
Car tant redoc orgelleuse beauté; 
Et Dieus m'en doinst trover bone esperance, 
K'en tot le mont n'a orgoill ne fierté 
K'Amors ne puist plaissier par sa poissance.
 

I.
[L']autre ier avint en cel autre païs
c'uns chevaliers ot une dame amee. 
Tant com la dame fu en son bon pris, 
li a s'amour escondite et veee. 
puiz fu uns jours qu'ele li dit: – Amis, 
menez vous ai par parole mainz dis; 
or est l'amour couneüe et moustree: 
d'ore en avant serai a vo devis. –

II.
Li chevaliers la reguarda el vis, 
si la vit mout pale et descoulouree. 
– Dame –, fait il, – certes mal sui baillis 
que n'eüstes pieça ceste pensee. 
Vostre clers vis, qui sambloit flour de lys, 
est si alez, dame, de mal en pis 
qu'il m'est avis que me soiez emblee; 
a tart avez a moi cest conseill pris. –

III.
Quant la dame s'oï si ramprosner, 
grant honte en ot, si dit par sa folie: 
– Par Dieu! vassal, jel vous dis pour gaber; 
cuidiez vous dont qu'a certes le vous die? 
onques nul jour ne me vint en penser. 
Savriez vous dont dame de pris amer? 
Nenil, par Dieu! Ainz vous prendroit envie 
d'un bel vallet baisier et acoler! –

IV.
– Dame –, fait il, – j'ai bien oï parler 
de vostre pris, maiz ce n'est ore mie; 
et de Troie rai jë oï conter 
qu'ele fu ja de mout grant seignorie; 
or n'i puet l'en fors les places trouver. 
Et si vous lo einsi a escuser 
que cil soient reté de l'iresie 
qui des or maiz ne vous voudront amer. –

V.
– Par Dieu! vassal, mout avez fol pensé 
quant vous m'avez reprouvé mon eage. 
Se j'avoie mon jouvent tout usé, 
si sui je riche et de si grant parage 
c'on m'ameroit a petit de biauté. 
Encor n'a pas un mois entier passé 
que li Marchis m'envoia son message 
et li Barrois a pour m'amour jousté. –

VI.
– Dame –, fait il, – ce vous a molt grevé 
que vous fiez en vostre seignorage; 
mes tel .vii. ont ja pour vouz sospiré, 
se vous estiés fille au roi de Cartage, 
qui ja mes jour n'en aront volenté. 
On n'aimme paz dame pour parenté, 
maiz quant ele est bele et courtoise et sage. 
Vouz en savroiz par tanz la verité. –

I.
L’autrier avint en cel autre païs 
C'uns chevaliers eut une dame amee. 
Tant com la dame fu en son bon pris, 
Li a s'amor escondite et veee. 
Puis fu uns jors k'ele li dist: “Amis, 
Mené vous ai par parole mains dis; 
Ore est l'amors coneüe et provee.
Des or mais sui tot a vostre devis.”

II.
Li chevalliers la regarda el vis,
Si la vit mout pale et descoulouree.
"Dame", fait il, "certes mal sui baillis
Ke n'eüstes piech'a ceste pensee.
Vostres clero vis, ki sambloit flors de lis,
Est si alés, dame, de mal em pis
K'il m'est a vis ke me soiés emblee.
A tart aves, dame, cest consell pris."

III.
Quant la dame s'oï si ramprosner,
Grant honte en ot, si dist par sa folie:
"Par Dieu, vassal, jel dis por vos gober.
Quidiés vos dont k'a certes le vos die?
Onques sul for ne me vint em penser.
Sariés vos dont dame de pris amer?
Nenil, par Dieu! ains vos prendroit envie
D'un bel vallet baisier et acoler."

IV.
– "Dame", fait il, "j'ai bien oï parler
De vostre pris, mais ce n'est ore mie;
Et de Troie rai jou oï conter
K'ele fu ja de mout grant signorie;
Or n'i puet on fors les plaices trover.
Et si vous lo ensi escuser
Ke cil soient reté de l'iresie
Qui des or mais ne vous vauront amer."

V.
– "Par Dieu, vassal, mout avés fol pensé,
Quant vous m'avés reprové mon eaige.
Se j'avoie tot mon jovent usé,
Si sui jou riche et de si haut paraige
C'om m'ameroit a petit de beauté.
Encoir n'a pas un mois entir passé
Ke li Marchis m'envoia son messaige,
Et li Barrois a por m'amor josté."

VI.
– "Par Dieu, dame, ce vos a mout grevé
Ke vos fïés tos jors ens signoraige;
Mas tel set ont ja por vos sospiré,
Se vos estiés fille au Roi de Cartaige,
Ki ja mais jor n'en aront volenté.
On n'aime pas dame por parenté,
Mais quant ele est belle et cortoise et saige.
Vos en savrés par tans la verité."

I.
Mout me semont Amors ke je m'envoise, 
Quant je plus doi de chanter estre cois; 
Mais j'ai plus grant talent ke je me coise, 
Por çou s'ai mis mon chanter en defois; 
Ke mon langaige ont blasmé li François 
Et mes cançons, oiant les Champenois 
Et la Contesse encoir, dont plus me poise.

II.
La Roïne n'a pas fait ke cortoise, 
Ki me reprist, ele et ses fieus, li Rois. 
Encoir ne soit ma parole franchoise, 
Si la puet on bien entendre en franchois; 
Ne chil ne sont bien apris ne cortois, 
S'il m'ont repris se j'ai dit mos d'Artois, 
Car je ne fui pas norris a Pontoise.

III.
Dieus! ke ferai? Dirai li mon coraige?, 
Li irai je dont s'amor demander? 
Oïl, par Dieu! car tel sont li usaige 
C'on n'i puet mais sans demant riens trover; 
Et se jo sui outraigeus del trover, 
Se n'en doit pas ma Dame a moi irer, 
Mais vers Amors, ki me font dire outraige.
 

I.
Se raige et derverie 
Et destrece d'amer 
M'a fait dire folie 
Et d'amors mesparler, 
Nus ne m'en doit blasmer. 
S'ele a tort m'i fausnie, 
Amors, qui j'ai servie, 
Ne me sai ou fïer.

II.
Amors, de felonie 
Vous vaurai esprover; 
Tolu m'avés la vie 
Et mort sans deffïer. 
La m'avés fait penser 
Ou ma joie est perie; 
Cele qui jou em prie 
Me fait d'autre esperer.

III.
Plus est belle k'imaige 
Cele ke je vos di, 
Mais tant a vil coraige, 
Anuieus et failli, 
K'ele fait tot ausi 
Com la leuve sauvaige 
Ki des leus d'un boskaige 
Trait le pieur a li.

IV.
N'a pas grant vasselaige 
Fait, s'ele m'a traï; 
Nus ne l'en tient por saige. 
Ki son estre ait oï; 
Mais puis k'il est ensi 
K'ele a tort m'i desgaige, 
Je li renc son homaige 
Et si me part de li.

V.
Mout est la terre dure, 
Sans eve et sans humor 
Ou j'ai mise ma cure, 
Mais n'i keudrai nul jor 
Fruit ne foille ne flor, 
S'est bien tans et mesure 
Et raisons et droiture 
Ke li rende s'amor.
 

I.
Si voiremant con cele don je chant 
Valt melz que totes les bones qui sont, 
Et je l'aim plus que ren qui soit el mont, 
Si me doint Deus s'amor senz decevoir; 
Que tel desir en ai et tel voloir, 
Ou tant ou plus, Deus en seit la verté, 
Si con malades desirre santé, 
Desir je li et s'amor a avoir.

II.
Or sai je bien que riens ne puet valoir 
Tant con celi de cui j'ai tant chanté, 
C'or ai veü et li et sa bealté 
Et si sai bien que tant a de valor 
Que je doi faire et outrage et folor 
D'amer plus halt que ne m'avroit mestier; 
Et non por cant maint povre chevalier 
Fait riches cuers venir a halte honor.

III.
Ainz que fusse sospris de ceste amor, 
Savoie je autre jent conseillier, 
Et or sai bien d'altrui geu enseignier 
Et si ne sai mie lo mien juër; 
Si sui con cil qui as eschas voit cler 
Et qui tres bien ensengne as autres gens, 
Et kant il jue, si pert si son sens 
Qu'il ne se seit escore de mater.

IV.
Hé! las, dolanz, je ne sai tant chanter 
Que ma dame parçoive mes tormenz, 
N'encor n'est pas si granz mes hardemanz 
Ke je li os dire les mais que trai, 
Ne devant li n'en os parier ne sai; 
Et kant je sui aillors devant autrui, 
Lors i parol, mais si pou m'i dedui 
K'un anui valt li deduiz que j'en ai.

V.
Encor devis comment je li dirai 
La grant dolor que j'en trais senz anui, 
Ke tant l'ador et desir, kant g'i sui, 
Que ne li os descovrir ma raison; 
Si va de moi con fait del champion 
Qui de lon tens aprent a escremir, 
Et kant il vient ou champ as cous ferir, 
Si ne seit rien d'escu ne de baston.
 

I.
Tant ai amé c'or me convient haïr 
Et si ne quier mais amer, 
S'en tel lieu n'est c'on ne saice traïr 
Ne dechevoir ne fausser. 
Trop longement m'a duré ceste paine 
K'Amors m'a fait endurer; 
Et non por quant loial amor certaine 
Vaurai encoir recovrer.

II.
Ki or vauroit loial amor trover 
Si viegne a moi por coisir! 
Mais bien se doit belle dame garder 
K'ele ne m'aint pour traïr, 
K'ele feroit ke fole et ke vilaine, 
S'em porroit tost mal oïr, 
Ausi com fist la fause Chapelaine, 
Cui tos li mons doit haïr.

III.
Assés i a de celes et de ceaus 
Ki dient ke j'ai mespris 
De çou ke fis covreture de saus, 
Mais mout a boin droit le fis, 
Et de l'anel ki fu mis en traïne, 
Mais a boin droit i fu mis, 
Car par l'anel fu faite la saisine 
Dont je sui mors et traïs.

IV.
A moult boen droit en fix ceu ke j'e fix, 
Se Deus me doinst boens chevals! 
Et cil ki dient ke i ai mespris 
Sont perjuré et tuit fauls. 
Por ceu dechiet bone amor et descline 
Que on lor souffre les mals, 
Et cil ki cellent lor faulse covine 
Font les pluxors deloiauls.